స్వీయ నియంత్రణతోనే కరోనా కట్టడి

• రాత్రి 9 వరకే సిటీ బస్సులు
• 6.30 నుంచి 7.45 వరకు మెట్రో సేవలు
• క్లబ్‌లు, పబ్‌లు, థియేటర్లు బంద్‌
• బోసిపోనున్న నైట్‌ బజార్లు
• సిటీ నైట్‌ కల్చర్‌కు కొన్నాళ్లు బ్రేక్‌

వేగంగా విస్తరిస్తున్న మహమ్మారిని కట్టడి చేయడంతో పాటు ప్రజా శ్రేయస్సును దృష్టిలో పెట్టుకొని ప్రభుత్వం రాత్రి కర్ఫ్యూకు మొగ్గు చూపింది. దీంతో నగర జీవి తన దైనందిన జీవనంలో కొన్ని మార్పులు చేసుకోవాల్సిన అనివార్య పరిస్థితి తలెత్తింది. రాత్రి 9 నుంచి ఉదయం 5 వరకు కర్ఫ్యూ విధించడంతో ఇకపై నగరంలో నైట్‌ బజార్లు బంద్‌ కానున్నాయి. క్లబ్‌లు, పబ్‌లు, థియేటర్లు మూతపడనున్నాయి. మెట్రో, సిటీ బస్సుల వేళల్లోనూ మార్పులు జరిగాయి. ఇకపై ప్రతి ఉదయం 6.30 గంటలకు ప్రారంభమయ్యే మెట్రో సేవలు రాత్రి 7.45 గంటలకు ముగియనున్నాయి. ఇక సిటీ బస్సులు ప్రతి రోజు ఉదయం ఆరు గంటలకు అన్ని డిపోల నుంచి బయలుదేరి రాత్రి తొమ్మిది లోపుగమ్యస్థానాలకు చేరుకోనున్నాయి. దీంతో రాత్రి ప్రయాణాలకు బ్రేకులు పడనున్నాయి.

• కరోనా వైరస్‌ విజృంభణ.. మరోసారి రాత్రి కర్ఫ్యూ విధించేలా చేసింది.
• వేగంగా విస్తరిస్తున్న మహమ్మారిని కట్టడి చేయడంతో పాటు.. ప్రజల శ్రేయస్సును దృష్టిలో పెట్టుకున్న ప్రభుత్వం అనివార్యంగా రాత్రి కర్ఫ్యూను విధించింది.
• దీంతో ఇప్పుడిప్పుడే తేరుకుంటున్న నగరవాసి నేటి నుంచి మళ్లీ తన జీవన శైలిని మార్చుకోవాల్సిన పరిస్థితి అనివార్యమైంది.
• ఇక ప్రతి పనిని ప్రణాళికాబద్ధంగా పూర్తి చేయక తప్పని పరిస్థితి.
• ఉదయం, రాత్రి అన్న తేడా లేకుండా నగరంలోని పలు పరిశ్రమలు, ఫుడ్‌, ఎంటర్‌టైన్‌ మెంట్‌ రంగాలు తమ కార్యకలాపాలను నిర్వహిస్తుంటాయి.
• ఇందులో లక్షలాది మంది ఉద్యోగులు షిఫ్ట్‌ల వారీగా విధులు నిర్వహిస్తుంటారు.
• మరోవైపు రాత్రి సమయాల్లో జోరుగా సాగే మార్కెట్లు ఇక ఎప్పటిలా కాకుండా తమ వర్క్‌ టైం టేబుల్‌ను మార్చుకోవాల్సి రావడం ఖాయంగా కనిపిస్తోంది.

కర్ఫ్యూకు తగ్గట్టు ప్లాన్‌..

• నగరవాసులు చాలా వరకు రాత్రి సమయాల్లోనే ఎక్కువగా బయటకు వస్తుంటారు.
• ఫ్యామిలీలతో పర్యాటక ప్రాంతాల్లో సేద తీరుతుంటారు. ఇక బంజారాహిల్స్‌, జూబ్లీహిల్స్‌, హైటెక్‌ సిటీ, ఫిల్మ్‌నగర్‌, మణికొండ లాంటి ప్రాంతాలు రాత్రిపూటే తెల్లారినట్టుగా దర్శనిస్తాయి.
• రాత్రి వేళల్లో వందలాది మంది రోడ్లపై తిరుగుతుంటారు.పబ్‌లు, క్లబ్‌లు, థియేటర్లలో సందడి రాత్రే ఎక్కువ.
• అంతేకాదు మధ్యరాత్రి నగరంలోని చార్మినార్‌, బేగంబజార్‌, దిల్‌సుఖ్‌నగర్‌, మోండా మార్కెట్‌, కోఠి, అబిడ్స్‌ తదితర మార్కెట్లన్నీ కొనుగోళ్లతో కళకళలాడుతుంటాయి.
• లక్షల్లో వ్యాపారం సాగుతుంది. ఇకపై కర్ఫ్యూ దరిమిలా నగరమంతా నిర్మానుష్యంగా మారనుంది.
• దీంతో వ్యాపారులంతా తమ వ్యాపారాలను రాత్రి 8 లోపే ముగించుకోవాల్సి ఉంటుంది.
• హోటల్స్‌, రెస్టారెంట్లు తమ మెనూను రాత్రి ఎనిమిది గంటల వరకే ప్రదర్శించాల్సిన పరిస్థితి.
• ఇక షాపింగ్‌ మాల్స్‌ పరిస్థితి చెప్పాల్సిన అవసరం లేదు.

9 లోపు బస్సులు డిపోలకు..

• జీహెచ్‌ఎంసీ పరిధిలో తిరిగే సిటీ బస్సుల వేళల్లోనూ మార్పులు జరిగాయి.
• ప్రతిరోజు ఉదయం ఆరు గంటలకు అన్ని డిపోల నుంచి బయలు దేరే బస్సులు రాత్రి తొమ్మిది లోపు తిరిగి గమ్యస్థానం చేరుకుంటాయని ఆర్టీసీ జీహెచ్‌ఎంసీ జోన్‌ ఎగ్జిక్యూటివ్‌ డైరెక్టర్‌ వి.వెంకటేశ్వర్లు తెలిపారు.
• కర్ఫ్యూ అమలులో ఉన్నంత వరకు ఈ వేళల్లో మార్పులు ఉండరాదని అన్ని డిపో మేనేజర్లకు మంగళవారం ఆదేశాలు జారీ చేశారు.
• అయితే ప్రయాణికుల రద్దీని బట్టి బస్సులను నడిపించాలని.. ఈ విషయంలో డిపో మేనేజర్లే తగు నిర్ణయం తీసుకోవాలన్నారు.
• అన్ని బస్సులను ప్రతిరోజు శానిటైజ్‌ చేయాలన్నారు.
• అంతేకాక ప్రయాణికులు భౌతిక దూరం పాటించేలా డ్రైవర్లు, కండక్టర్లు చూడాలని కోరారు.

చివరి మెట్రో రైలు 7.45కే..

• రాత్రి కర్ఫ్యూ నేపథ్యంలో మెట్రో రైళ్ల వేళల్లో మార్పులు చేసినట్లు మెట్రో ఎండీ ఎన్వీఎస్‌ రెడ్డి తెలిపారు.
• ఇక ప్రతిరోజు ఉదయం 6.30 గంటలకు ప్రారంభమయ్యే మెట్రో సేవలు రాత్రి 8.45 గంటలకు ముగుస్తాయని అన్నారు.
• మూడు కారిడార్లలో ఆఖరి మెట్రో రైలు రాత్రి 7.45 గంటలకు ప్రారంభమై చివరి స్టేషన్‌కు 8.45 గంటలకు చేరుకుంటుందని తెలిపారు.
• మరోవైపు మెట్రో ప్రయాణికులు తప్పనిసరిగా కొవిడ్‌ నిబంధనలు పాటించాలని ఆయన సూచించారు.
• ప్రయాణికుల భద్రతే లక్ష్యంగా సిబ్బంది ప్రతిరోజు ప్రతి మెట్రో స్టేషన్‌తో పాటు రైళ్లను శానిటైజ్‌ చేస్తారని అన్నారు.
• అంతేకాక ప్రయాణికులు మాస్క్‌లు ధరించడం, భౌతిక దూరం పాటించేలా చూస్తారని అన్నారు.

అత్యవసరమైతేనే..

చాలా మంది ఉద్యోగులు తమ విధులు ముగించుకుని రాత్రి సమయాల్లోనే ఎక్కువగా ప్రయాణాలు పెట్టుకుంటారు. రాత్రిపూట ఇంటికి చేరుకుని తెల్లారి మరో షిఫ్ట్‌నకు ఉద్యోగానికి హాజరయ్యే వాళ్లు ఎందరో. అయితే కర్ఫ్యూతో ఆ పరిస్థితికి బ్రేకులు పడింది. రాత్రి 9 గంటల తర్వాత బస్సులు బంద్‌ కానున్నాయి. ఇకపై వారి ప్రయాణాల్లో మార్పులు చేసుకోక తప్పని పరిస్థితులు నెలకొన్నాయి. ప్రజలు కూడా తమ ప్రయాణాలను అత్యవసరమైతే తప్ప పెట్టుకోకూడదు. కొవిడ్‌ వ్యాప్తి చెందకుండా ప్రభుత్వ ఆదేశాలను విధిగా పాటించాల్సిన బాధ్యత ప్రతి ఒక్కరిపై ఉంటుందని అధికారులు గుర్తు చేస్తున్నారు.