GHMC | వార్డుల విభజన ఆగమాగం.. మూడు ముక్కలైన మేడ్చల్‌

జీహెచ్‌ఎంసీ (GHMC) విలీనంలో మేడ్చల్‌ (Medchal) నియోజకవర్గం మూడు ముక్కలైంది. 7 మున్సిపాలిటీలు, మూడు కార్పొరేషన్‌లను 16 డివిజన్‌లుగా విభజించడంతో పాటు మూడు జోన్‌లలో కలిపారు.

మేడ్చల్: జీహెచ్‌ఎంసీ (GHMC) విలీనంలో మేడ్చల్‌ (Medchal) నియోజకవర్గం మూడు ముక్కలైంది. 7 మున్సిపాలిటీలు, మూడు కార్పొరేషన్‌లను 16 డివిజన్‌లుగా విభజించడంతో పాటు మూడు జోన్‌లలో కలిపారు. పీర్జాదిగూడ, మేడిపల్లి, పోచారం, ఘట్‌కేసర్‌, ఎదులాబాద్‌, దమ్మాయిగూడ, కీసర డివిజన్లను ఎల్‌బీనగర్‌ జోన్‌లో.. జవహర్‌నగర్‌, చంద్రపురి కాలనీ, నాగారం, బోడుప్పల్‌, చెంగిచెర్ల, తూంకుంటను సికింద్రాబాద్‌ జోన్‌లో… గుండ్లపోచంపల్లి, కిష్టాపూర్‌, మేడ్చల్‌ను కూకట్‌పల్లి జోన్‌లోకి వెళ్లాయి. అయితే జోన్‌ల విజభన సరిగా లేదంటూ నియోజకవర్గ ప్రజాప్రతినిధులు, ప్రజల నుంచి అభ్యంతరాలు వెల్లువెత్తాయి.

అసమగ్రంగా విభజన..

జవహర్‌నగర్‌లో 3 లక్షల వరకు జనాభా ఉండగా రెండు డివిజన్లుగా విభజించారు. దమ్మాయిగూడులో లక్షా 30వేల పైగా జనాభా ఉంటే రెండు డివిజన్లు చేయగా, లక్షకు పైగా జనాభా ఉన్న నాగారం మున్సిపాలిటీని విభజించలేదు. లక్ష వరకు జనాభా ఉన్న పోచారాన్ని కూడా విభజించలేదు. లక్ష వరకు జనాభా ఉన్న మేడ్చల్‌ను, 80వేల వరకు జనాభా ఉన్న ఘట్‌కేసర్‌ను రెండు డివిజన్లుగా విభజించారు. లక్షా 80వేల వరకు జనాభా ఉన్న బోడుప్పల్‌ను రెండు డివిజన్‌లుగా విభజించారు. లక్షన్నర వరకు జనాభా ఉన్న పీర్జాదిగూడను రెండు డివిజన్లుగా ఏర్పాటు చేశారు. ఇలా పొంతన లేకుండా జరిగిన విభజనతో ప్రజాప్రతినిధులు, ప్రజల నుంచి భారీ సంఖ్యలో అభ్యంతరాలు వెల్లువెత్తాయి.

ప్రధాన అభ్యంతరాలు

• బోడుప్పల్‌, పీర్జాదిగూడలను ప్రస్తుతం రేండేసి డివిజన్లుగా విభజించారు. అత్యధికంగా ఉన్న జనాభాను దృష్టిలో పెట్టుకొని బోడుప్పల్‌ను నాలుగు డివిజన్లుగా, పీర్జాదిగూడను నాలుగు డివిజన్లుగా విభజించాలి..
• లక్ష వరకు జనాభా ఉన్న నాగారంను రాంపల్లి కేంద్రంగా మరో డివిజన్‌ను ఏర్పాటు చేయాలి
• దమ్మాయిగూడ డివిజన్‌ను రెండు డివిజన్లుగా విభజించాలి
• దమ్మాయిగూడ సరిహద్దులను మార్చాలి
• బోగారంను కీసర డివిజన్‌లో కలపాలి
• పోచారంను రెండు వార్డులుగా విభజించాలి
• రెండు డివిజన్లుగా విభజించిన జవహర్‌నగర్‌ను మూడు డివిజన్లుగా మార్చాలి
• చంద్రపురి కాలనీ డివిజన్‌ను బాలాజీనగర్‌, అంబేద్కర్‌నగర్‌లో మార్చాలి
• శామీర్‌పేటను ప్రత్యేక డివిజన్‌గా ఏర్పాటు చేయాలి
• తూంకుంట పేరును తూంకుంట శామీర్‌పేటగా మార్చాలి
• ఆలియాబాద్‌-తూంకుంట హద్దులను రహదారి ఆధారంగా నిర్ణయించాలి
• గుండ్లపోచంపల్లిలోని అర్కెలగూడ, మునీరాబాద్‌ను కిష్టాపూర్‌ డివిజన్లో కలపాలి
• గౌడవెల్లిని మేడ్చల్‌లో కలపాలి
• మేడ్చల్‌లో జోనల్‌ కార్యాలయాన్ని ఏర్పాటు చేయాలి
• కిష్టాపూర్‌ను అత్వెల్లి డివిజన్‌గా మార్చాలి
• కిష్టాపూర్‌ను పూడూరు లేదా కిష్టాపూర్‌-పూడూరుగా మార్చాలి

డివిజన్ల వారీగా అభ్యంతరాలు

• నాగారం- 51
• దమ్మయిగూడ- 11
• మేడ్చల్‌- 34
• జవహర్‌నగర్‌- 27
• చంద్రపురి కాలనీ- 11
• పోచారం- 64
• కీసర- 4
• తూంకుంట- 5
• గుండ్లపోచంపల్లి- 21
• బోడుప్పల్‌- 324
• పీర్జాదిగూడ- 17