ఐజీహెచ్‌జీడీలో సర్టిఫికెట్‌ కోర్సుకు దరఖాస్తుల ఆహ్వానం

ఉస్మానియా యూనివర్సిటీ, ఆగస్టు 4 : ఉస్మానియా యూనివర్సిటీ అనుబంధ సంస్థ అయిన ఇన్‌స్టిట్యూట్‌ ఆఫ్‌ జెనిటిక్స్‌ అండ్‌ హాస్పిటల్‌ ఫర్‌ జెనిటిక్‌ డిసీజెస్‌ (ఐజీహెచ్‌జీడీ)లో ‘క్లినికల్‌ జెనిటిక్స్‌ ,డయోగ్నస్టిక్స్‌ అండ్‌ మేనేజ్‌మెంట్‌’అనే అంశంపై సర్టిఫికెట్‌ కోర్సుకు దరఖాస్తులను ఆహ్వానిస్తున్నట్లు ఐజీహెచ్‌జీడీ డైరెక్టర్‌ డాక్టర్‌ బి. విజయలక్ష్మి ఒక ప్రకటనలో తెలిపారు.

మెడిసిన్‌, డెంటిస్ట్రీ, జెనిటిక్స్‌, బయోటెక్నాలజీ, బయోకెమిస్ట్రీ, జువాలజీ, మైక్రోబయాలజీ, ఫార్మసీ, నర్సింగ్‌ తదితర విభాగాలలో కనీసం యాభై శాతం మార్కులతో డిగ్రీ, పీజీ పూర్తి చేసిన వారు ఈ కోర్సులో చేరేందుకు అర్హులని చెప్పారు.

ఆరు నెలల వ్యవధి గల ఈ కోర్సులో 20 సీట్లు అందుబాటులో ఉన్నట్లు పేర్కొన్నారు. ఆసక్తి ఉన్న అభ్యర్థులు తమ వెబ్‌సైట్లు www.instituteofgenetics.org, www.osmania.ac.in లోకి ప్రవేశించి ఆన్‌లైన్‌ దరఖాస్తును ఈ నెల 25వ తేదీలోగా పూర్తి చేయాలని సూచించారు. దరఖాస్తులను పరిశీలించి, అర్హులైన వారిని ఇంటర్వ్యూ విధానం ద్వారా ఎంపిక చేస్తామన్నారు.

ఎంపికైన వారి జాబితాను 27వ తేదీన తమ వెబ్‌సైట్‌లో ఉంచుతామని, వచ్చే నెల 1వ తేదీ నుంచి తరగతులు ప్రారంభమవుతాయని వివరించారు. ఇతర వివరాలకు తమ వెబ్‌సైట్‌లో చూసుకోవచ్చని ఆమె సూచించారు.