Ganesh Laddu Auction | అదరహో అన్నట్లుగా గణపతి లడ్డూ వేలం.. కోటి 26 లక్షలు పలికిన రిచ్‌మండ్‌ విల్లాస్‌ లడ్డూ

నగరంలో గణపతి లడ్డూ వేలం అదరహో అన్నట్లుగా సాగింది. గల్లీ నుంచి మొదలుకుంటే బడా గణేశుడి వరకు లడ్డూ దక్కించుకునేందుకు పోటాపోటీగా పాల్గొన్నారు.

• గ్రేటర్‌లో సరికొత్త రికార్డులను క్రియేట్‌ చేస్తున్న లడ్డూ ధరలు
• ఊహకందని రీతిలో రూ.కోటి 26లక్షలు పలికిన రిచ్‌మండ్‌ విల్లాస్‌ లడ్డూ..
• బాలాపూర్‌ లడ్డూ ధర రూ. 27లక్షలు

Ganesh Laddu Auction | సిటీబ్యూరో, సెప్టెంబర్‌ 28(నమస్తే తెలంగాణ) : నగరంలో గణపతి లడ్డూ వేలం అదరహో అన్నట్లుగా సాగింది. గల్లీ నుంచి మొదలుకుంటే బడా గణేశుడి వరకు లడ్డూ దక్కించుకునేందుకు పోటాపోటీగా పాల్గొన్నారు. నవరాత్రుల కంటే చివరి రోజున జరిగే లడ్డూ వేలం నిర్వహణకు ప్రత్యేక ఆకర్షణ ఉండగా… ఏటా గణేశుడి లడ్డూలు రికార్డు ధరలు పలుకుతున్నాయి. బండ్లగూడ జాగీర్‌ సమీపంలో ఉండే రిచ్‌మండ్‌ విల్లాస్‌ గేటెడ్‌ కమ్యూనిటీలో జరిగిన లడ్డూ వేలంలో రూ.కోటి 26లక్షలు పలికింది. గతేడాది కంటే రెండింతలు రేటుతో లంబోధరుడి లడ్డూను దక్కించుకున్నారు.

కోటి పలికిన రిచ్‌మండ్‌ లడ్డూ…

ఒకప్పుడు బాలాపూర్‌ గణేశుడి లడ్డూ వేలం అంటేనే సర్వత్రా ఆసక్తి నెలకొని ఉండేది. ఇప్పటికీ అదే తీరుగా వేలంను నిర్వహిస్తున్నప్పటికీ… నగరంలోని పలు గణేశ్‌ మండపాల వద్ద అంతకు మించిన ధరలకు లడ్డూలను కొనుగోలు చేస్తున్నారు. బాలాపూర్‌ లడ్డూకు గట్టి పోటీనిస్తూ సరికొత్త రికార్డులు ఏటా బండ్లగూడ జాగీర్‌లోని సన్‌సిటీ రిచ్‌మండ్‌ విల్లాస్‌ గేటెడ్‌ కమ్యూనిటీ నెలకొల్పుతున్నది. తాజాగా నిర్వహించిన లడ్డూ వేలంలో రూ. కోటి 26లక్షలకు లడ్డూలను దక్కించుకున్నారు. గతేడాదిలో నిర్వహించిన లడ్డూ వేలంలో రూ. 65లక్షలకు అమ్ముడుపోగా… ఈసారి రెండింతలు ధర పలికింది. ఈసారి లడ్డూ వేలంలో వచ్చిన డబ్బులను సామాజిక కార్యక్రమాల్లో వినియోగించనున్నట్లు తెలిసింది.

అట్టహాసంగా లడ్డూ వేలం పాటలు

గ్రేటర్‌ వ్యాప్తంగా 95వేలకు పైగా గణేశ్‌ విగ్రహాలను ఏర్పాటు చేశారు. నిర్వాహకులు దశల వారీగా నిమజ్జనం నిర్వహిస్తూనే ఉన్నారు. నవరాత్రుల్లో చివరి రోజు కావడంతో లడ్డూ వేలాలు భారీగా జరిగాయి. ఈ క్రమంలో గల్లీలు, గేటెడ్‌ కమ్యూనిటీలు, అపార్టుమెంట్లు, కాలనీ గణేశుడి మండపాల వద్ద నిర్వాహకులు అట్టహాసంగా వేలం ప్రక్రియను చేపట్టారు.

బాలాపూర్‌ గణేశ్‌ లడ్డూ రూ.27లక్షలు

• లడ్డూను దక్కించుకున్న దాసరి దయానంద్‌ రెడ్డి

బడంగ్‌పేట, సెప్టెంబర్‌ 28: ఇబ్రహీంపట్నం నియోజకవర్గంలోని తుర్కయంజాల్‌ పాటిగూడ గ్రామానికి చెందిన రియల్టర్‌ దాసరి దయానంద్‌ రెడ్డి బాలాపూర్‌ గణనాథుని లడ్డూను వేలంలో రూ.27లక్షలకు దక్కించుకున్నారు. 1994లో రూ.450తో ప్రారంభమైన బాలాపూర్‌ గణనాథుని లడ్డూ 2023 నాటికి రూ.27లక్షల రికార్డు స్థాయి ధర పలికింది. వేలంలో పాల్గొనడానికి వచ్చిన 36 మంది పేర్లు ఉన్న జాబితాను ఉత్సవ సమితి సభ్యుడు వంగేటి లక్ష్మారెడ్డి చదివి 10.40 గంటలకు వేలంను ప్రారంభించారు. 15 నిమిషాల పాటు వేలం కొనసాగింది. వేలంలో రూ. 27లక్షలకు దాసరి దయానంద్‌రెడ్డి లడ్డూను దక్కించుకున్నారు. గత సంవత్సరం రూ.24.60 లక్షలకు బాలాపూర్‌కు చెందిన ఉత్సవ సమితి సభ్యుడు వంగేటి లక్ష్మారెడ్డి దక్కించుకోగా… ఈ సారి రూ. 2.40లక్షలు ధర పెరిగింది.

బాలాపూర్‌ గణనాథునికి పూజలు చేసిన మంత్రి, ఎంపీ…

ఉదయం 5 గంటలకు ఉత్సవ సమితి అధ్యక్షుడు కళ్లెం నిరంజన్‌ రెడ్డి ఆధ్వర్యంలో బాలాపూర్‌ గణనాథుడికి చివరి పూజా కార్యక్రమం నిర్వహించారు. ఉత్సవ కమిటీ సభ్యులతో పాటు చేవెళ్ల ఎంపీ జి.రంజిత్‌ రెడ్డి దంపతులు ప్రత్యేక పూజలో పాల్గొన్నారు. అనంతరం గణేశ్‌ శోభాయాత్ర నిర్వహించారు. శోభాయాత్రలో విద్యాశాఖ మంత్రి పి.సబితా ఇంద్రారెడ్డి పాల్గొని ప్రత్యేక పూజలు చేశారు. ఈ సందర్భంగా మంత్రి మాట్లాడుతూ… గణేశ్‌ ఉత్సవాలను ప్రజలు శాంతియుత వాతావరణంలో జరుపుకోవాలని సూచించారు. ఈ కార్యక్రమంలో రంగారెడ్డి జిల్లా జడ్పీ చైర్‌పర్సన్‌ తీగల అనితారెడ్డి, మాజీ ఎమ్మెల్యే తీగల కృష్ణారెడ్డి, మేయర్‌ పారిజాత నర్సింహా రెడ్డి, ఉత్సవ సమితి అధ్యక్షుడు నిరంజన్‌ రెడ్డి, కార్పొరేటర్లు, పోలీస్‌ అధికారులు, వివిధ పార్టీల నాయకులు, ఉత్సవ సమితి నాయకులు తదితులు పాల్గొన్నారు.

మాదాపూర్‌లో రూ.23 లక్షలు

మాదాపూర్‌లోని సాయినగర్‌లో సాయి నగర్‌ యూత్‌ అసోసియేషన్‌ ఆధ్వర్యంలో ఏర్పాటు చేసిన వినాయకుడి లడ్డూను వేలంలో రూ. 23 లక్షలకు దక్కించుకున్న ప్రముఖ వ్యాపారి శ్రీనివాస్‌ చౌదరిచౌదరి

బడంగ్‌పేటలో రూ.17లక్షలు

బడంగ్‌పేటలో వీరాంజనేయ భక్త సమాజం అధ్యక్షుడు లోకం ఆధ్వర్యంలో ఏర్పాటు చేసిన గణనాథుని లడ్డూను పెద్ద బావి వెంకట్‌ రెడ్డి రూ.17లక్షలకు దక్కించుకున్నారు. గత సంవత్సరం రూ.14లక్షలు పలికింది. ఈ ఏడాది మూడు లక్షలు ఎక్కువ.

అత్తాపూర్‌ లడ్డూ రూ.10.11లక్షలు

అత్తాపూర్‌ న్యూస్టార్‌ భక్త సమాజం ఆధ్వర్యంలోని గణేశ్‌ లడ్డూ రూ.10.11 లక్షలు పలుకగా అత్తాపూర్‌కు చెందిన గుమ్మడి భూపాల్‌రెడ్డి దక్కించుకున్నారు.

• నార్సింగి మున్సిపాలిటీ పరిధిలోని ఖానాపూర్‌లో శ్రీ ఆంజనేయ స్వామి దేవాలయ కమిటీ ఆధ్వర్యంలో ఏర్పాటు చేసిన గణేశ్‌ లడ్డూ 10 లక్షల 1116 రూపాయలకు డాకూరి శివరాజ్‌ కుటుంబ సభ్యులు దక్కించుకున్నారు.
• నిజాంపేటలోని స్ప్రింగ్‌ విల్లా కాలనీలో గణనాథుడి లడ్డూను కాలనీకి చెందిన దివ్యసుబ్రహ్మణ్యం రూ.10 లక్షల 116 కు దక్కించుకున్నారు.
• మణికొండ మున్సిపాలిటీ పరిధిలోని నవజ్యోతి యువజన సంఘం ఆధ్వర్యంలో ఏర్పాటు చేసిన వినాయకుడి లడ్డూను రూ.9 లక్షలకు ముంగి మోహన్‌రెడ్డి దక్కించుకున్నారు.
• భోలక్‌పూర్‌ డివిజన్‌లో సిద్ధి వినాయక భగత్‌ సింగ్‌ యూత్‌ అసోసియేషన్‌ ఆర్గనైజర్‌ జి. అనిల్‌కుమార్‌ ఆధ్వర్యంలో ఏర్పా టు చేసిన వినాయకుడి లడ్డూకు వేలం నిర్వహించగా గౌతమి గౌడ్‌ అనే యువతి రూ. 5.68 లక్షలకు దక్కించుకున్నారు.
• ఫతేనగర్‌ పైపులైన్‌ రోడ్డు నేతాజీకాలనీలోని శ్రీ సిద్ధి వినాయక యూత్‌ వెల్ఫేర్‌ అసోసియేషన్‌ ఆధ్వర్యంలో ఏర్పాటు చేసిన వినాయకుడి లడ్డూకు వేలం నిర్వహించారు. ఈ వేలంలో రూ. 5 లక్షల 5 వేలకు ఇషాన్‌ శర్మ లడ్డూను దక్కించుకున్నారు.
• రామంతాపూర్‌ ప్రధాన రహదారి పక్కన డీ మార్టు వద్ద అతి పెద్ద లక్ష్మీగణపతి వినాయక మండపం వద్ద లడ్డూకు నిర్వహించిన వేలంలో వంగాల సతీశ్‌ గుప్తా పాల్గొని 5 లక్షల 61 వేలకు దక్కించుకున్నారు.
• మణికొండ మున్సిపాలిటీ పంచవటికాలనీ వినాయక లడ్డూను రూ.5లక్షల 59వేలకు దిలీప్‌రెడ్డి దక్కించుకున్నారు.
• కూకట్‌పల్లి సేవాలాల్‌నగర్‌ గణేశుడి మండపంలో లడ్డూను వేలంలో సభావత్‌ కృష్ణ నాయక్‌ రూ.8.61 లక్షలకు దక్కించుకున్నారు.
• కేపీహెచ్‌బీ కాలనీ లోదా మెరీడియన్‌ గేటెడ్‌ కమ్యూనిటీలో నిర్వహించిన వేలంలో లడ్డూను నగేశ్‌ దేవా, రమేశ్‌ దేవా సోదరులు రూ.7.90 లక్షలకు కైవసం చేసుకున్నారు.
• సర్దార్‌పటేల్‌ నగర్‌లో లడ్డూను యు.ఉమామహేశ్వర్‌ రావు రూ.5.01 లక్షలకు వేలంలో దక్కించుకున్నారు.
• కూకట్‌పల్లి బీజేపీ కార్యాలయం వద్ద గణనాథుడి మండపంలో లడ్డూకు వేలం నిర్వహించగా ఎస్‌.కె.చౌదరి వేలంలో రూ.7.01 లక్షలకు దక్కించుకున్నాడు.
• సాహెబ్‌నగర్‌ శ్రీరామ్‌ గణేశ్‌ యూత్‌ ఆధ్వర్యంలో నిర్వహించిన వినాయకుడి లడ్డూ వేలంలో ఇంజాపూర్‌కు చెందిన వినయ్‌గౌడ్‌ రూ.5.10లక్షలకు దక్కించుకున్నాడు.