ప్రజల కోసమే.. పట్టణ ప్రగతి

ప్రతి గడపను తట్టి సమస్యలను తెలుసుకొని, పరిష్కరించేందుకే పట్టణ ప్రగతి కార్యక్రమాన్ని చేపడుతున్నామని ప్రజాప్రతినిధులు తెలిపారు.

• శిథిలావస్థకు చేరిన ఇండ్లకు నోటీసులు
• సమస్యలు తెలుసుకొని.. పరిష్కారానికి హామీలు ఇస్తున్న ప్రజాప్రతినిధులు

మేడ్చల్‌ జోన్‌ బృందం, జూన్‌ 14 : ప్రతి గడపను తట్టి సమస్యలను తెలుసుకొని, పరిష్కరించేందుకే పట్టణ ప్రగతి కార్యక్రమాన్ని చేపడుతున్నామని ప్రజాప్రతినిధులు తెలిపారు. మేడ్చల్‌ నియోజకవర్గంలోని పలు మున్సిపాలిటీలు, కార్పొరేషన్‌లలో పట్టణ ప్రగతి కార్యక్రమం ముమ్మరంగా కొనసాగుతున్నది. ఈ సందర్భంగా ప్రజాప్రతినిధులు, అధికారులు వార్డుల్లో పర్యటించి ప్రజలను సమస్యలు అడిగి తెలుసుకొని పరిష్కారానికి హామీ ఇస్తున్నారు. గుండ్లపోచంపల్లి మున్సిపాలిటీ పరిధిలోని 13వ వార్డులో పట్టణ ప్రగతిలో భాగంగా చైర్‌పర్సన్‌ మద్దుల లక్ష్మీశ్రీనివాస్‌ రెడ్డి పర్యటించారు. రోడ్లు, డ్రైనేజీ, విద్యుత్‌ సమస్యలను గుర్తించి, పరిష్కారానికి చర్యలు తీసుకోవాలని నిర్ణయించారు. హరితహారంలో భాగంగా మొక్కలు నాటారు. ఈ కార్యక్రమంలో వైస్‌ చైర్మన్‌ ప్రభాకర్‌, కౌన్సిలర్‌ దొడ్ల మల్లికార్జున్‌, ప్రత్యేక అధికారి రాంచందర్‌, కమిషనర్‌ రాములు, మేనేజర్‌ శ్రీనివాస్‌ గౌడ్‌, ఈఈ నరసింహ రెడ్డి తదితరులు పాల్గొన్నారు.

• తూంకుంట మున్సిపాలిటీ పరిధిలోని దేవరయాంజాల్‌లో శిథిలావస్థకు చేరిన ఇండ్లకు నోటీసులు జారీ చేశారు. వార్డులోని వివిధ కాలనీల్లో పారిశుధ్య పనులు చేపట్టారు. ముళ్ల పొదలను తొలగించారు. చైర్మన్‌ కారంగుల రాజేశ్వర్‌రావు, కమిషనర్‌ జెతురామ్‌, మాజీ సర్పంచ్‌ గోల్డ్‌ శ్రీనివాస్‌, కౌన్సిలర్లు పాల్గొన్నారు.
• జవహర్‌నగర్‌ మున్సిపల్‌ కార్పొరేషన్‌లో కమిషనర్‌ జ్యోతిరెడ్డి, కార్పొరేటర్లు మొక్కలునాటి నీరు పోశారు. కార్యక్రమంలో కార్పొరేటర్లు డీఈఈ చెన్నకేశవులు, పానుగంటి బాబు, టీఆర్‌ఎస్‌ సీనియర్‌ నాయకులు నర్సింహాయాదవ్‌, స్థానిక నాయకులు, మున్సిపల్‌ సిబ్బంది, కాలనీవాసులు తదితరులు పాల్గొన్నారు.
• దమ్మాయిగూడ మున్సిపాలిటీ పరిధిలోని పలు వార్డుల్లో చైర్‌పర్సన్‌ ప్రణీతాశ్రీకాంత్‌ గౌడ్‌ పర్యటించారు. ప్రజల నుంచి సమస్యలు తెలుసుకొని, రోడ్లు, అండర్‌ గ్రౌండ్‌ డ్రైనేజీ నిర్మాణ పనులు చేపడుతామని హామీ ఇచ్చారు. కార్యక్రమంలో వైస్‌ చైర్మన్‌ మాదిరెడ్డి నరేందర్‌, కమిషనర్‌ స్వామి, డీఈఈ సుమతి, మేనేజర్‌ వెంకటేశం తదితరులు పాల్గొన్నారు.
• పల్లె ప్రగతి కార్యక్రమంలో కీసర మండలంలోని భోగారంలో జిల్లా పంచాయతీ అధికారి రమణమూర్తి, ఎంపీడీవో పద్మావతి, ఎంపీవో మంగతాయారులతో పాటు పలు పంచాయతీలకు సంబంధించిన పంచాయతీ కార్యదర్శులు గ్రామాల్లో పర్యటించి పల్లె ప్రగతిలో తీసుకోవాల్సిన జాగ్రత్తలపై స్థానిక సర్పంచ్‌లకు వివరించారు. కీసర, గోధుమకుంట, కరీంగూడ, చీర్యాల్‌ తదితర గ్రామాల్లో సర్పంచ్‌లు, ఎంపీటీసీలు, పంచాయతీ సభ్యులు, వివిధ శాఖల అధికారులు పర్యటించారు.