పుస్తకాల జాతర

తెలంగాణ కళాభారతి (ఎన్టీఆర్‌ స్టేడియం)లో 35వ హైదరాబాద్‌ జాతీయ పుస్తక ప్రదర్శన ఆదివారం కిటకిటలాడింది. సెలవు రోజు కావడంతో పుస్తక జాతరకు సాహితీ ప్రియులు, రచయితలు, చిన్నారులు సహా జనం పోటెత్తారు

• కొనుగోళ్లతో సందర్శకులు బిజీ బిజీ..
• 35వ పుస్తక వేడుకలకు సాహితీప్రియుల వెల్లువ

సిటీబ్యూరో, డిసెంబర్‌ 25 (నమస్తే తెలంగాణ): తెలంగాణ కళాభారతి (ఎన్టీఆర్‌ స్టేడియం)లో 35వ హైదరాబాద్‌ జాతీయ పుస్తక ప్రదర్శన ఆదివారం కిటకిటలాడింది. సెలవు రోజు కావడంతో పుస్తక జాతరకు సాహితీ ప్రియులు, రచయితలు, చిన్నారులు సహా జనం పోటెత్తారు. పలువురు ప్రముఖులు కూడా సందర్శించి తమకు నచ్చిన పుస్తకాలను కొనుగోలు చేసి మురిసిపోయారు.

ప్రజా ప్రస్థానం పుస్తకాన్ని ఆవిష్కరిస్తున్న పుస్తక ప్రదర్శన అధ్యక్షుడు జూలూరు గౌరీశంకర్‌ తదితరులు

 

రాళ్లకుచ్చె పుస్తకావిష్కరణ..
దాసరి మోహన్‌ రాసిన రాళ్లకుచ్చె కథా సంపుటిని తెలంగాణ సాహిత్య అకాడమీ సౌజన్యంతో తెలంగాణ రచయితల సంఘం జంటనగరాల ఆధ్వర్యంలో తెలంగాణ కవులు ఆవిషరించారు. ఈ సందర్భంగా తెలంగాణ సాహిత్య ఆకాడమీ పూర్వ చైర్మన్‌ నందిని సిధారెడ్డి మాట్లాడుతూ.. తెలంగాణ గ్రామీణ సౌందర్యాన్ని దాసరి మోహన్‌ ఈ కథలో పొందుపర్చడం సంతోషకరమని అన్నారు. తెలంగాణ పల్లె పరిమళాలు రాళ్లకుచ్చెలో ఉన్నాయని అన్నారు. ఈ కార్యక్రమంలో తంగేడు పత్రిక ఎడిటర్‌ కాంచనపల్లి గోవర్ధన్‌, తెలంగాణ రచయితల సంఘం జంటనగరాల అధ్యక్షుడు కందుకూరి శ్రీరాములు, ప్రముఖ కవి కూర చిదంబరం తదితరులు పాల్గొన్నారు.

• రిటైర్డ్‌ వింగ్‌ కమాండర్‌ ఎన్‌. సోమశేఖర్‌రావు రచించిన వాయుసేన విజయసాధన పుస్తకాన్ని ఎయిర్‌ మార్షల్‌ ఆథవాల్‌ ఆవిషరించారు. ఒక ఇంజినీర్‌గా ఎన్‌.సోమశేఖర్‌రావు తాను దేశం కోసం జరిగే యుద్ధాల్లో పాల్గొన్న అనుభూతులను పంచుకున్నారు.
• ప్రభాకర్‌ రచించిన ప్రజాస్వామ్య ప్రస్థానం అమ్మయాది కవిత్వాన్ని పుస్తక ప్రదర్శన అధ్యక్షుడు జూలూరు గౌరీశంకర్‌ ఆవిషరించారు.
• అరణ్యకృష్ణ రచించిన ‘కొంచెం నిప్పు – కొంచెం నీరు’ పుస్తకాన్ని ప్రఖ్యాత రచయిత ఓల్గా ఆవిషరించారు. ముఖ్యఅతిథిగా ప్రొఫెసర్‌ జి.హరగోపాల్‌, ఆత్మీయ అతిథులు కె.సజయ, తేళ్ల అరుణ తదితరులు పాల్గొని ప్రసంగించారు. ఓల్గా, హరగోపాల్‌లు మాట్లాడుతూ స్త్రీలు ఎదుర్కొనే బాధలు, వారి సమస్యలపై రచయిత అరణ్యకృష్ట తన రచనలో స్పష్టం చేశారన్నారు. కేంద్ర సాహిత్య అకాడమీ అవార్డు గ్రహీత సజయ మాట్లాడుతూ.. అరణ్యకృష్ట చేసే ప్రయత్నం ఇప్పుడు అవసరమని చెప్పారు.

మన ముఖ్యమంత్రి స్టాల్‌లో దటీజ్‌ కేసీఆర్‌ పుస్తకాన్ని ప్రదర్శిస్తున్న ఎమ్మెల్సీ కవిత, చిత్రంలో తెలంగాణ సాహిత్య అకాడమీచైర్మన్‌ జూలూరు గౌరీశంకర్‌

 

వాల్మీకి, బసవేశ్వరుడు,బుద్ధ పుస్తకాల పునర్ముద్రణ సభ..
బీసీసీఈ పుస్తకాలు వాల్మీకి, బసవేశ్వరుడు, బుద్ధ పుస్తకాల పునర్ముద్రణ సభను నిర్వహించారు. ప్రొఫెసర్‌ తిరుమలి, రిటైర్డ్‌ జేసీ వై.సత్యనారాయణ, కవి అధ్యాపకులు, నాళేశ్వరం శంకరం తదితరులు ప్రసంగించారు. ప్రొ. తిరుమలి మాట్లాడుతూ స్ఫూర్తిప్రదాతల సంక్షిప్త జీవిత చరిత్రలపై పుస్తకాలు రావడం ఆహ్వానించదగ్గ విషయమని అన్నారు.సభలో వాల్మీకి బోయ ప్రతినిధులు, లింగాయతులు, పాల్గొన్నారు.