Dating App Fraud | ఒంటరి మగాళ్లే టార్గెట్.. గే అని నమ్మించి.. ఇంటికెళ్లి చోరీలు.. హైదరాబాద్లో ముఠాగుట్టు రట్టు
Dating App Fraud | గేలుగా నమ్మించి.. మోసాలకు పాల్పడుతున్న ముఠా గుట్టు రట్టయ్యింది. గ్రిండర్(Grindr) డేటింగ్ యాప్ ద్వారా పరిచయాలు పెంచుకుని, ఒంటరి మగాళ్లే లక్ష్యంగా దోపిడీకి పాల్పడుతున్న గ్యాంగ్ను మల్కాజిగిరి పోలీసులు పట్టుకున్నారు.
Dating App Fraud | గేలుగా నమ్మించి.. మోసాలకు పాల్పడుతున్న ముఠా గుట్టు రట్టయ్యింది. గ్రిండర్(Grindr) డేటింగ్ యాప్ ద్వారా పరిచయాలు పెంచుకుని, ఒంటరి మగాళ్లే లక్ష్యంగా దోపిడీకి పాల్పడుతున్న గ్యాంగ్ను మల్కాజిగిరి పోలీసులు పట్టుకున్నారు. మత్తు పదార్థాలు కలిపిన బీర్లు తాగించి, వారు స్పృహ కోల్పోగానే బంగారు ఆభరణాలతో పాటు అందినకాడికి దోచుకుకుంటున్నట్లు వరుస ఫిర్యాదులు అందడంతో రంగంలోకి దిగిన పోలీసులు.. ముఠాలో ఐదుగురిని అరెస్టు చేశారు. మరో నిందితుడు పరారీలో ఉన్నాడు. ఈ కేసు వివరాలను మల్కాజిగిరి పోలీస్ కమిషనర్ బి.సుమతి సోమవారం ఉన్నతాధికారులతో కలిసి మీడియా సమావేశంలో వెల్లడించారు.
రంగారెడ్డి జిల్లా మొయినాబాద్కు చెందిన మహ్మద్ ఆరిఫ్ (24) హైదరాబాద్లోని కృష్ణానగర్లో ఉంటూ తెలుగు సినిమా సాంకేతిక బృందంలో సహాయకుడిగా పనిచేస్తున్నాడు. గతంలో సినిమా రంగానికి చెందిన సహాయ నటులు, నటీమణులతో స్నేహం పేరుతో పరిచయాలు పెంచుకుని దోపిడీలకు పాల్పడినట్టు పోలీసులు తెలిపారు. ఓ ఘటనలో పట్టుబడిన తర్వాత అతడికి పరిచయమైన వ్యక్తి ద్వారా గ్రిండర్ యాప్ గురించి తెలుసుకున్నాడు. ఈ యాప్ ద్వారా కొత్త వ్యక్తులతో పరిచయాలు పెంచుకుని వారి విలువైన వస్తువులను దోచుకోవచ్చని భావించాడు. ఆ ఆలోచనతోనే మరికొందరిని కలుపుకొని ముఠాగా ఏర్పడ్డాడు.
ఈ క్రమంలో భద్రాద్రి కొత్తగూడెం జిల్లాకు చెందిన తేజావత్ సంతోష్ (25), కర్నూలుకు చెందిన రెడ్డిగారి దినేశ్కుమార్రెడ్డి (32), ఖమ్మం జిల్లా ఆరెకోడు తండాకు చెందిన విద్యార్థులు బానోతు విద్యాసాగర్ (21), బానోతు కార్తీక్ (18)తో పరిచయం ఏర్పడింది. బాలానగర్లో నివసించే దినేశ్ గతంలో పలు ఆసుపత్రుల్లో వైద్యుడిగా పనిచేశాడు. అతడికి ఒకే కిడ్నీ ఉండటంతో ఎక్కువగా కష్టపడలేక, సులభంగా డబ్బు సంపాదించాలనే ఉద్దేశంతో ఈ మోసాలకు సహకరించినట్టు పోలీసులు వెల్లడించారు. మరో నిందితుడు చందు కూడా వీరితో కలిసి నేరాలకు పాల్పడ్డాడు. ప్రస్తుతం అతడు పరారీలో ఉన్నాడు.

Dating App Fraud
వీడియో కాల్స్తో బాధితులపై నిఘా
ఆరిఫ్ తొలుత ఈ తరహా పరిచయాల ద్వారా బాధితులను గుర్తించి దోపిడీకి పాల్పడే విధానాన్ని అనుసరించగా, తర్వాత సంతోష్, దినేశ్ సహా మరికొందరితో కలిసి కార్యకలాపాలను విస్తరించాడు. సంతోష్ విద్యాసాగర్, కార్తీక్లతో మరో బృందాన్ని ఏర్పాటు చేసుకుని ఈ నేరాలను మరింత విస్తరించేందుకు ప్రయత్నించినట్టు పోలీసులు అనుమానిస్తున్నారు.
ముఠా సభ్యులు గ్రిండర్ యాప్లో ప్రొఫైళ్లు సృష్టించి, అందులోని వ్యక్తులకు సందేశాలు పంపేవారు. ఎదుటివారితో చనువుగా మాట్లాడుతూ స్నేహం పెంచుకునేవారు. ఆ తర్వాత వీడియో కాల్స్ చేసి వారితో మరింత సన్నిహితంగా మెలిగేవారు. ఈ సంభాషణల సమయంలో బాధితుల ఒంటిపై ఉన్న బంగారు గొలుసులు, ఉంగరాలు, ఇతర ఆభరణాలను గమనించేవారు. వారు మద్యం తాగే అలవాటు ఉందా? ఇంట్లో ఒంటరిగా ఉంటున్నారా? ఎక్కడ నివసిస్తున్నారు? అనే వివరాలను కూడా సేకరించేవారు.
బాధితుల పరిస్థితిని పూర్తిగా అంచనా వేసిన తర్వాత ఏకాంతంగా కలుద్దామని ప్రతిపాదించేవారు. ఇందుకు అంగీకరించినవారి ఇళ్లకు వెళ్లేందుకు సిద్ధమయ్యేవారు. ఈ విధంగా ముందుగానే బాధితుల గురించి సమాచారం సేకరించడం వల్ల ఎక్కడికి వెళ్లాలి? ఎవరిని లక్ష్యంగా చేసుకోవాలి? అనే విషయాలపై వారికి స్పష్టత ఉండేది.
బీర్లో మత్తు పదార్థాలు కలిపి.. స్పృహ కోల్పోగానే దోపిడీ
బాధితులను కలిసేందుకు వెళ్లేటప్పుడు నిందితులు తమ వెంట బీర్ బాటిళ్లు తీసుకెళ్లేవారు. ఇంట్లోకి వెళ్లిన తర్వాత వారితో కలిసి మద్యం సేవిస్తున్నట్టు నటించేవారు. ఈ క్రమంలో ఒకరు బాధితుడి దృష్టిని మరల్చుతుండగా, మరొకరు బీర్లో మత్తు కలిగించే పదార్థాన్ని కలిపేవారు. అనంతరం ఆ బీర్ను బాధితుడికి ఇచ్చేవారు. అది తాగిన తర్వాత బాధితుడు స్పృహ కోల్పోయేవాడు. ఇదే అదనుగా భావించిన నిందితులు బాధితుల ఒంటిపై ఉన్న బంగారు గొలుసులు, ఉంగరాలు, ఇతర ఆభరణాలను తీసుకునేవారు. ఇంట్లో దాచిన విలువైన వస్తువులు, నగదు కనిపిస్తే వాటినీ దోచుకుని అక్కడి నుంచి వెళ్లిపోయేవారు. బాధితులకు స్పృహ వచ్చిన తర్వాత తమ ఆభరణాలు, విలువైన వస్తువులు కనిపించకపోవడంతో మోసపోయినట్టు గుర్తించి పోలీసులను ఆశ్రయించేవారు.
20 మందికిపైగా బాధితులు.. 14 కేసుల నమోదు
పోలీసుల ప్రాథమిక విచారణ ప్రకారం నిందితులు సుమారు ఆరు నుంచి ఏడు నెలల వ్యవధిలో 20 మందికిపైగా వ్యక్తులను లక్ష్యంగా చేసుకున్నట్టు తెలుస్తున్నది. ఇప్పటివరకు 14 మంది బాధితులు ముందుకొచ్చి ఫిర్యాదులు చేయడంతో వివిధ ప్రాంతాల్లో కేసులు నమోదయ్యాయి. మల్కాజిగిరి కమిషనరేట్ పరిధిలో మూడు, సైబరాబాద్లో ఏడు, హైదరాబాద్లో మూడు, విశాఖపట్నంలో ఒక కేసు నమోదైనట్టు పోలీసులు వెల్లడించారు. ఈ కేసుల్లో నిందితులు దోచుకున్న బంగారు ఆభరణాల బరువు సుమారు 360 గ్రాములకు పైగా ఉన్నట్టు గుర్తించారు. వారి నుంచి గొలుసులు, ఉంగరాలు తదితర ఆభరణాలను పోలీసులు స్వాధీనం చేసుకున్నారు. దోచుకున్న సొత్తును తమ వ్యక్తిగత ఖర్చులు, విలాసవంతమైన జీవనశైలికి ఉపయోగించినట్టు విచారణలో వెల్లడైనట్లు తెలిపారు.
ప్రత్యేక బృందాలతో ఐదుగురి అరెస్టు
వరుసగా అందుతున్న ఫిర్యాదులతో మల్కాజిగిరి పోలీసులు ప్రత్యేక దర్యాప్తు బృందాలను ఏర్పాటు చేశారు. ఉప్పల్, కుషాయిగూడ పోలీసు బృందాలు నిందితుల కదలికలపై నిఘా పెట్టాయి. సాంకేతిక ఆధారాలతో దర్యాప్తు చేపట్టి ఉప్పల్ మెట్రో స్టేషన్ సమీపంలో ముగ్గురిని, ఏఎస్రావునగర్ ప్రాంతంలో మరో ఇద్దరిని అదుపులోకి తీసుకున్నాయి. విచారణ అనంతరం ఐదుగురిని అరెస్టు చేశారు. చందు అనే మరో నిందితుడు పరారీలో ఉండటంతో అతడి కోసం గాలిస్తున్నారు. నిందితుల వద్ద లభించిన మొబైల్ ఫోన్లు, గ్రిండర్ యాప్ ప్రొఫైళ్లు, చాటింగ్లు, వీడియో కాల్స్, కాల్ డేటా రికార్డులు, లొకేషన్ వివరాలను పోలీసులు పరిశీలిస్తున్నారు. ఇప్పటివరకు వెలుగులోకి వచ్చిన 14 కేసులతోపాటు మరికొందరు బాధితులు ఉన్నారా? ఈ ముఠా మరే ఇతర ప్రాంతాల్లోనైనా ఇదే తరహా నేరాలకు పాల్పడిందా? అనే కోణాల్లో దర్యాప్తు కొనసాగిస్తున్నారు. నిందితులపై బీఎన్ఎస్ సెక్షన్ 61 (నేరపూరిత కుట్ర), 111 (వ్యవస్థీకృత నేరం), 127 (అక్రమ నిర్బంధం), 123 (నేరానికి పాల్పడే ఉద్దేశంతో విషపదార్థాలు లేదా మత్తు కలిగించే పదార్థాలు ఇవ్వడం) కింద కేసులు నమోదు చేసినట్టు పోలీసులు తెలిపారు.
Read Today's Latest Hyderabad News in Telugu and Telugu News
RELATED ARTICLES
తాజా వార్తలు
Dating App Fraud | ఒంటరి మగాళ్లే టార్గెట్.. గే అని నమ్మించి.. ఇంటికెళ్లి చోరీలు.. హైదరాబాద్లో ముఠాగుట్టు రట్టు
Megaverse | మెగావర్స్లోకి మరో స్టార్ జంట.. చిరంజీవి షోలో సందడికి సిద్ధమైన సూర్య, జ్యోతిక..!
Mitchell Santner: భారత్తో టెస్ట్ సిరీస్కు కివీస్ బౌలర్ సాంట్నర్ దూరం
Mirnalini Ravi | మలేషియాలో ఘనంగా వరుణ్ తేజ్ హీరోయిన్ డెస్టినేషన్ వెడ్డింగ్.. వరుడెవరో తెలుసా?
Encephalitis | పిల్లల్లో మెదడువాపు.. ఈ లక్షణాలు కనిపిస్తే అస్సలు నిర్లక్ష్యం చేయొద్దు!
ట్రెండింగ్ వార్తలు
China flies electric plane | 19 సీట్ల ఎలక్ట్రిక్ విమానం.. విజయవంతంగా నడిపి పరీక్షించిన చైనా
Watch: వేగంగా వస్తున్న కారు నుంచి తప్పించుకునేందుకు మహిళ యత్నం.. ఆ తర్వాత ఏం జరిగిందంటే?
Odisha teacher 14 days in ditch | కొండచరియలు విరుగడంతో గుంతలో చిక్కుకున్న టీచర్.. 14 రోజుల తర్వాత గుర్తించిన కాపరి
Watch: బైకులతో సింహాన్ని అడ్డుకున్న అటవీ శాఖ సిబ్బంది.. తర్వాత ఏం జరిగిందంటే?
Snowfall | ద్రాస్ సెక్టార్లో మంచు అందాల కనువిందు.. Video

