జీహెచ్‌ఎంసీ ఆస్తులు ప్రైవేట్‌ పరం

జీహెచ్‌ఎంసీ ఆస్తులను అధికారులు ఒక్కొక్కటిగా ప్రైవేట్‌ పరం చేస్తున్నారు.. మౌలిక వసతుల కల్పన, మెరుగైన నిర్వహణతో సంస్థకు ఆదాయాన్ని సమకూర్చుకునే వనరులను సైతం ప్రైవేట్‌ వ్యక్తులకు కట్టబెడుతున్నది. పేద, మధ్య తరగతి ప్రజలకు అందుబాటులో ఉండాల్సిన క్రీడలను సైతం ఖరీదుగా మార్చే నిర్ణయాన్ని తాజాగా తీసుకున్నారు.

• మొన్న ఆదర్శ మార్కెట్లు, నేడు స్పోర్ట్స్‌ కాంప్లెక్స్‌లు
• రెండేళ్ల కాలపరిమితితో 10 కాంప్లెక్స్‌లు,ప్లేగ్రౌండ్ల నిర్వహణకు టెండర్లు
• నేడు స్టాండింగ్‌ కమిటీ ముందుకు..
• సామాన్యులకు దూరం కానున్న క్రీడలు
• అధికారుల తీరుపై విమర్శల వెల్లువ

సిటీబ్యూరో, నవంబర్‌ 19 (నమస్తే తెలంగాణ) : జీహెచ్‌ఎంసీ ఆస్తులను అధికారులు ఒక్కొక్కటిగా ప్రైవేట్‌ పరం చేస్తున్నారు.. మౌలిక వసతుల కల్పన, మెరుగైన నిర్వహణతో సంస్థకు ఆదాయాన్ని సమకూర్చుకునే వనరులను సైతం ప్రైవేట్‌ వ్యక్తులకు కట్టబెడుతున్నది. పేద, మధ్య తరగతి ప్రజలకు అందుబాటులో ఉండాల్సిన క్రీడలను సైతం ఖరీదుగా మార్చే నిర్ణయాన్ని తాజాగా తీసుకున్నారు. ఇప్పటికే సీఎస్‌ఆర్‌ పద్ధతిలో మోడల్‌ మార్కెట్లు, కమ్యూనిటీ హాల్స్‌ను దూరం చేసిన అధికారులు తాజాగా స్పోర్ట్స్‌ కాంప్లెక్స్‌, ప్లే గ్రౌండ్లను ప్రైవేట్‌ వ్యక్తులను అప్పగించాలని నిర్ణయించి ఈ మేరకు ఆపరేషన్‌ అండ్‌ మెయింటనెన్స్‌ నిర్వహణకు టెండర్లకు సిద్ధం చేశారు.

ఈ ప్రతిపాదనను నేడు జరిగే స్టాండింగ్‌ కమిటీ ముందుకు ప్రతిపాదనలు సమర్పించారు. మేయర్‌ అధ్యక్షతన జరిగే ఈ సమావేశంలో సభ్యులు ప్రైవేట్‌ పరం చేసే విధానానికి ఆమోదించేందుకు సిద్ధమయ్యారు.. రెండేళ్ల కాలపరిమితితో పది స్పోర్ట్స్‌ కాంప్లెక్స్‌, ప్లే గ్రౌండ్‌లను ప్రైవేట్‌కు అప్పజెప్పేందుకు మార్గం సుగమమం చేసింది. ఈ నేపథ్యంలోనే నిర్ణీత ధరలతో ఏజెన్సీలు ఖరారు చేయనున్నారు. ఇదే జరిగితే పేద, మధ్య తరగతి వర్గాలకు క్రీడలు ఖరీదుగా మారనున్నాయి. క్రీడాభివృద్ధికి కృషి చేయాల్సిన అధికారులు ఆదాయం సమకూర్చుకోవడమే లక్ష్యంగా ఈ నిర్ణయం తీసుకుండడం పై అధికారుల పనితీరుపై తీవ్ర విమర్శలు వెలువెత్తుతున్నాయి.

ప్రైవేట్‌ పరం అవుతున్న స్పోర్ట్స్‌ కాంప్లెక్స్‌లు..

• షేక్‌పేట స్పోర్ట్స్‌ కాంప్లెక్స్‌ అండ్‌ ప్లే గ్రౌండ్‌ (వాలీబాల్‌, బాక్సింగ్‌, జిమ్‌, రోలర్‌ స్కేటింగ్‌, షటిల్‌ బాడ్మింటన్‌)
• అమీర్‌పేట స్పోర్ట్స్‌ కాంప్లెక్స్‌ (జిమ్‌, షటిల్‌ బాడ్మింటన్‌, టేబుల్‌ టెన్నిస్‌, చెస్‌, బాక్సింగ్‌, ఫెన్సింగ్‌, కరాటే, జిమ్నాస్టిక్స్‌)
• సనత్‌నగర్‌ స్పోర్ట్స్‌ కాంప్లెక్స్‌ అండ్‌ ప్లే గ్రౌండ్‌ (బాస్కెట్‌బాల్‌, చెస్‌, స్మిమ్మింగ్‌, జిమ్‌, జిమ్నా స్టిక్స్‌, షటిల్‌ బాడ్మింటన్‌)
• హిందీనగర్‌ స్పోర్ట్స్‌ కాంప్లెక్స్‌ (జిమ్‌, షటిల్‌ బాడ్మింటన్‌, టేబుల్‌ టెన్నిస్‌, బాక్సింగ్‌)
• రెడ్‌హిల్స్‌ స్పోర్ట్స్‌ కాంప్లెక్స్‌ (క్రికెట్‌, ఫుట్‌బాల్‌, జిమ్‌)
• విజయ్‌నగర్‌ కాలనీ స్పోర్ట్స్‌ కాంప్లెక్స్‌ ( స్మిమ్మింగ్‌, క్యారమ్‌, జిమ్‌, జిమ్నాస్టిక్స్‌, బాడ్మింటన్‌)
• విక్టోరియా ప్లే గ్రౌండ్‌ ఇండోర్‌ స్టేడియం, ఔట్‌డోర్‌ స్టేడియం (జిమ్‌, చెస్‌, సెపక్‌తక్రా, వాలీబాల్‌, జిమ్నాస్టిక్‌ టేబుల్‌ టెన్నిస్‌, బాస్కెట్‌బాల్‌)
• గోల్కొండ స్పోర్ట్స్‌ కాంప్లెక్స్‌ , స్విమ్మింగ్‌ ఫూల్‌ (స్విమ్మింగ్‌ ఫూల్‌, బాక్సింగ్‌, క్రికెట్‌, ఫుట్‌బాల్‌)
• తాళ్లగడ్డ కబడ్డీ స్టేడియం (జిమ్‌, తైక్వాండో, రెజ్లింగ్‌) జ్రాబితాలో చేరనున్నాయి.