Visit:
శంషాబాద్ రూరల్, ఏప్రిల్ 14 : శంషాబాద్ ఎయిర్పోర్టులో సీఐఎస్ఎఫ్ దుస్తులు ధరించి, ఫొటోలు తీస్తున్న ఓ వ్యక్తిని ఎయిర్పోర్టులో సీఐఎస్ఎఫ్ అధికారులు మంగళవారం ఆరెస్టు చేశారు. శంషాబాద్ ఏసీపీ శ్రీకాంత్గౌడ్ తెలిపిన వివరాల ప్రకారం.. ఆంధ్రప్రదేశ్ శ్రీకాకుళంకు చెందిన బాలకృష్ణ అనే వ్యక్తి గతంలో ఓ యవతిని ప్రేమించాడు. కానీకొన్ని కారణాలతో ఇద్దరు వివాహం చేసుకోలేకపోయారు. దీంతో పాటు బాలకృష్ణకు మరో వివాహం జరిగి విడాకులు తీసుకున్నారు.
బాలకృష్ణ గతంలో ప్రేమించిన యువతికి సైతం విడాకులు కావడంతో మళ్లీ ఇద్దరూ పరిచయమై పెళ్లిదాక వచ్చారు. కానీ యువతి తల్లిదండ్రులు ప్రభుత్వం ఉద్యోగం ఉంటేనే తన కూతురిని ఇచ్చి పెళ్లి చేస్తామని చెప్పడంతో బాలకృష్ణ ఆంధ్రప్రదేశ్ నుంచి శంషాబాద్ ఎయిర్పోర్టుకు వచ్చాడు. ఎయిర్పోర్టులో సీఐఎస్ఎఫ్ సెక్యూరిటీ యూనిఫాం వేసుకొని ఫొటోలు దిగుతూ పెళ్లి చేసుకునే యువతికి పంపించి తనకు సెంట్రల్ డిపార్ట్మెంట్ ఉద్యోగం వచ్చిందని నమ్మించే ప్రయత్నం చేశాడు. కానీ శంషాబాద్ ఎయిర్పోర్టులో అతడిని అధికారులు అరెస్టు చేయడంతో అసలు విషయం బయటకు వచ్చింది. బాలకృష్ణ ఫేస్బుక్, ఇంస్టాగ్రామ్లో అమ్మాయిలకు ఇలాగే వల వేస్తాడని గుర్తించిన్నట్లు తెలిపారు. బాలకృష్ణపై కేసు నమోదు చేసి రిమాండ్కు తరలించిన్నట్లు వివరించారు.
