యూరప్లో కదంతొక్కిన జెన్జీ
యూరప్ దేశాల్లో జెన్ జీ యువత మరోసారి ఆగ్రహంతో భగ్గుమంది. శుక్రవారం 25కి పైగా ఐరోపా దేశాల్లో యువత కదం తొక్కింది.
- 25కి పైగా దేశాల్లో సమన్వయ ఆందోళనలు
- పెరుగుతున్న జీవన వ్యయం, నిరుద్యోగంపై ఆగ్రహం
- ప్రభుత్వ వ్యతిరేక నినాదాలతో వీధుల్లోకి లక్షలాది యువత
లండన్, నవంబర్ 20 : యూరప్ దేశాల్లో జెన్ జీ యువత మరోసారి ఆగ్రహంతో భగ్గుమంది. శుక్రవారం 25కి పైగా ఐరోపా దేశాల్లో యువత కదం తొక్కింది. ’మీ రాజకీయాలు పక్కన పెట్టి మా సమస్యలు పరిష్కరించండి‘ అంటూ నినదించింది. బ్రిటన్, ఫ్రాన్స్, జర్మనీ, స్పెయిన్, ఇటలీ తదితర దేశాల్లో విద్యార్థులు తరగతులను బహిష్కరించి ర్యాలీలు, ప్రదర్శనలు నిర్వహించారు. సమస్యలు వేర్వేరుగా ఉన్నా నిరసనల విషయంలో ఏకతాటిపై నిలుస్తామంటూ నిరసన బాట పట్టారు. పెరుగుతున్న జీవన వ్యయం, గృహ అద్దెలు, నిరుద్యోగం, విద్యా రంగానికి నిధుల కొరత, ప్రభుత్వాల యుద్ధ వ్యయాలను తీవ్రంగా వ్యతిరేకిస్తూ నినదించారు.
యువత భవిష్యత్తు కోసం ప్రభుత్వాలు తగిన పెట్టుబడులు పెట్టడం లేదని వారు మండిపడ్డారు. విద్యా సంస్థలకు నిధులు తగ్గించడం, పెరుగుతున్న ట్యూషన్ ఫీజులు, ఉద్యోగావకాశాల లేమి, అందుబాటులో లేని ఇళ్ల అద్దెలు తమను ఇబ్బందులకు గురిచేస్తున్నాయని వారు పేర్కొన్నారు. సామాజిక సంక్షేమం, విద్యకు ఖర్చు చేయాల్సిన నిధులను ప్రభుత్వాలు రక్షణ, సైనికీకరణ, యుద్ధాలకు మళ్లిస్తున్నాయని విమర్శించారు.
యుద్ధం కాదు.. మా భవిష్యత్ ముఖ్యం
తమకు యుద్ధాల కన్నా తమ భవిష్యత్ ముఖ్యమని యువత తెగేసి చెబుతున్నది. ‘మా భవిష్యత్తు కోసం పోరాడతాం.. వారి యుద్ధాల కోసం కాదు’ అనే నినాదంతో యువత ఈ ఆందోళనలు నిర్వహిస్తున్నది. కృత్రిమ మేధ నియంత్రణ లేకుండా విస్తరించడం, దాని ప్రభావంతో ఉద్యోగాలపై ఏర్పడుతున్న అనిశ్చితి, వాతావరణ మార్పుల సంక్షోభం కూడా యువత ఆందోళనలకు కారణాలుగా ఉన్నాయి. జర్మనీలోని కొలోన్లో ఈఏడాది పలు యువజన సంఘాలు కలిసి అంతర్జాతీయ యువజన సమ్మెకు రూపకల్పన చేశాయి.
బ్రిటన్లో లండన్, మాంచెస్టర్ సహా 50కి పైగా పట్టణాలు, నగరాల్లో నిరసనలకు ఏర్పాట్లు చేశారు. 350కి పైగా పాఠశాలలు, కళాశాలలు, విశ్వవిద్యాలయాల విద్యార్థులు తరగతులను బహిష్కరించనున్నట్లు ఉద్యమ నిర్వాహకులు తెలిపారు. ఇటలీలో రోమ్, జెనోవా, బొలోగ్నా, మిలాన్ నగరాల్లో విద్యార్థులు ర్యాలీలు నిర్వహించారు. జర్మనీలోని కొలోన్లో సుమారు 10 వేల మంది నిరసనల్లో పాల్గొనే అవకాశం ఉందని స్థానిక మీడియా వెల్లడించింది.
దేశానికో సమస్య.. అంతటా ఒకే నిరసన గళం

విద్యార్థుల ఆందోళనకు ఐరోపాలోని వివిధ దేశాల్లో ఒక్కో దేశానికి ఒక్కో కారణం ఉన్నప్పటికీ పెరుగుతున్న ఆర్థిక, సామాజిక అభద్రతాభావం వాటన్నింటినీ కలుపుతున్నది. స్పెయిన్లో ఇళ్ల అద్దెలు, గృహాల ధరలు అందుబాటులో లేకపోవడం ప్రధాన సమస్యగా మారింది. ఫ్రాన్స్లో ప్రభుత్వ పాఠశాలల్లో సౌకర్యాల కొరత, ఉపాధ్యాయుల ఖాళీలపై విద్యార్థులు ఆందోళన చేస్తున్నారు. అల్బేనియాలోనూ విద్యా రంగానికి సంబంధించిన సమస్యలతో నిరసనలు కొనసాగుతున్నాయి. సెర్బియాలో అవినీతి, ప్రభుత్వ నిర్లక్ష్యానికి వ్యతిరేకంగా రెండేళ్లుగా విద్యార్థులు ఆందోళనలు చేస్తున్నారు. జర్మనీలో విద్య, సామాజిక భద్రత, ఆరోగ్య సేవలకు నిధులు పెంచాలని యువత నిరసనలు చేపట్టింది. ఇటలీలోనూ విద్య, జీవన వ్యయం, సైనిక వ్యయాలపై అసంతృప్తి వ్యక్తమవుతోంది.
ఒకపక్క నిరుద్యోగం.. మరోపక్క పెరుగుతున్న ఖర్చులతో సతమతం
ఉన్నత విద్య పూర్తిచేసినా తగిన ఉద్యోగాలు లభించడం లేదని యువత ఆవేదన వ్యక్తం చేస్తోంది. బ్రిటన్లో 16 నుంచి 24 ఏండ్ల మధ్య వయసున్న దాదాపు 10 లక్షల మంది యువత విద్య, ఉపాధి లేదా శిక్షణలో లేరని అధికారిక గణాంకాలు సూచిస్తున్నాయి. అదే సమయంలో ఉద్యోగ ఖాళీలు తగ్గుతుండటం, జీవన వ్యయం పెరగడం పరిస్థితిని మరింత క్లిష్టం చేస్తున్నాయి.
యువత నిరసనలకు సోషల్ మీడియా కూడా ప్రధాన వేదికగా మారింది. టిక్టాక్, ఇన్స్ట్రాగామ్, టెలిగ్రామ్ ద్వారా ఆందోళనలకు సంబంధించిన సమాచారాన్ని పంచుకుంటూ, వివిధ దేశాల్లోని ఉద్యమాలతో సంఘీభావం ప్రకటిస్తున్నారు. అన్ని దేశాల్లోని నిరసనలకు ఒకే నాయకత్వం లేదా సంస్థ లేదని, స్థానిక సమస్యల ఆధారంగా ఉద్యమాలు సాగుతున్నాయని విశ్లేషకులు పేర్కొంటున్నారు. ఒక దేశంలో మొదలైన నిరసనలు మరో దేశ యువతకు స్ఫూర్తినిస్తున్నాయని చెబుతున్నారు.
ప్రభుత్వాలపై పెరుగుతున్న ఒత్తిడి
ఈ ఆందోళనలు యూరప్ ప్రభుత్వాలపై ఒత్తిడి పెంచుతున్నాయి. విద్య, ఉపాధి, గృహ వసతి, సంక్షేమ రంగాలకు మరిన్ని నిధులు కేటాయించాలని యువత డిమాండ్ చేస్తోంది. అయితే ఆర్థిక వృద్ధి మందగించడం, ప్రభుత్వాల బడ్జెట్పై ఒత్తిడి పెరగడంతో ఈ డిమాండ్లను నెరవేర్చడం అంత సులభం కాదని ఆర్థిక నిపుణులు అభిప్రాయపడుతున్నారు. గత కొన్ని నెలలుగా ఫ్రాన్స్, జర్మనీ, ఇటలీ, స్పెయిన్ తదితర దేశాల్లో చోటుచేసుకున్న యువజన ఉద్యమాలు ఇప్పుడు అంతర్జాతీయ సమన్వయంతో ముందుకు సాగుతున్నాయి. కొన్ని ప్రాంతాల్లో నిరసనలు హింసాత్మకంగా మారినప్పటికీ, ప్రస్తుత అంతర్జాతీయ యువజన సమ్మెను శాంతియుతంగా నిర్వహించేందుకు ఏర్పాట్లు చేస్తున్నట్లు బ్రిటన్లోని నిర్వాహకులు తెలిపారు.
Read Today's Latest International News in Telugu and Telugu News
RELATED ARTICLES
తాజా వార్తలు
ట్రెండింగ్ వార్తలు
Vande Bharat Train | బంధువులను సాగనంపేందుకు వందే భారత్ రైలు ఎక్కిన 12 మంది.. తర్వాత ఏం జరిగిందంటే?
Watch: హాస్పిటల్ యజమానిని బెదిరించి రూ.10 లక్షలు వసూలు.. కాంగ్రెస్ నేత అరెస్ట్, పార్టీ నుంచి బహిష్కరణ
Watch: ‘బ్యాగ్లో గంజాయి పెడతా.. డ్రగ్స్ కేసులో ఇరికిస్తా’.. జంటను బెదిరించిన పోలీస్ అధికారి
Migratory birds | చిలికా సరస్సుకు ప్రత్యేక అతిథులు.. ఏకంగా 80 జాతుల వలసపక్షుల సందడి.. Video
China flies electric plane | 19 సీట్ల ఎలక్ట్రిక్ విమానం.. విజయవంతంగా నడిపి పరీక్షించిన చైనా

