DRF | విపత్తు వేళ పెద్దన్నలా సేవ.. పౌరులకు మేం ఉన్నామంటూ భరోసా ఇస్తున్న డీఆర్‌ఎఫ్‌

విపత్తు ఎలాంటిదైనా సరే.. మేం ఉన్నాం.. అంటూ హైదరాబాద్‌ పౌరులకు భరోసా ఇస్తోంది జీహెచ్‌ఎంసీ విపత్తు స్పందన దళం (డీఆర్‌ఎఫ్‌). జీహెచ్‌ఎంసీలో భాగమైన ఈవీడీఎం (ఎన్‌ఫోర్స్‌మెంట్‌, విజిలెన్స్‌, డిజాస్టర్‌, మేనేజ్‌మెంట్‌) కింద 2018వ సంవత్సరంలో ఏర్పాటైంది.

• ప్రాణాలను లెక్క చేయకుండా స్పందిస్తూ..
• పౌరులకు మేం ఉన్నామంటూ భరోసా ఇస్తున్న డీఆర్‌ఎఫ్‌
• ప్రజల రక్షణగా ప్రపంచ స్థాయి ప్రమాణాలతో విపత్తు సేవలందించిన కేసీఆర్‌ సర్కారు
• 2018 నుంచి నేటికి చెక్కు చెదరకుండా పౌరులకు అందుతున్న విపత్కర సేవలు

DRF | సిటీబ్యూరో, జూన్‌ 24(నమస్తే తెలంగాణ): విపత్తు ఎలాంటిదైనా సరే.. మేం ఉన్నాం.. అంటూ హైదరాబాద్‌ పౌరులకు భరోసా ఇస్తోంది జీహెచ్‌ఎంసీ విపత్తు స్పందన దళం (డీఆర్‌ఎఫ్‌). జీహెచ్‌ఎంసీలో భాగమైన ఈవీడీఎం (ఎన్‌ఫోర్స్‌మెంట్‌, విజిలెన్స్‌, డిజాస్టర్‌, మేనేజ్‌మెంట్‌) కింద 2018వ సంవత్సరంలో ఏర్పాటైంది. పౌరులకు మెరుగైన సేవలందించేందుకు గాను బీఆర్‌ఎస్‌ ప్రభుత్వ హయాంలో సీఎం కేసీఆర్‌ మార్గదర్శకత్వంలో మున్సిపల్‌ శాఖ మంత్రి కేటీఆర్‌ ఈవీడీఎం విభాగాన్ని నగర ప్రజలకు పరిచయం చేశారు. విపత్తు సమయాల్లో అద్భుత ప్రదర్శనతో ముందుండి ఎన్‌ఫోర్స్‌మెంట్‌, విజిలెన్స్‌ అండ్‌ డిజాస్టర్‌ మేనేజ్‌మెంట్‌ (ఈవీడీఎం) విభాగం పౌరుల మన్ననలు పొందింది. డీఆర్‌ఎఫ్‌ ఎన్నో సందర్భాల్లో ప్రాణ, ఆస్తి నష్టం తీవ్రతను తగ్గించింది. ప్రధానంగా 2020 అక్టోబరు భారీ వరదల సమయంలోను విపత్తు నివారణ చర్యలు చేపట్టింది. డీఆర్‌ఎఫ్‌ సేవలను గత ప్రభుత్వం ఇతర నగరాల్లోని మున్సిపాలిటీల్లో, ప్రధాన పట్టణాల్లోనూ అమలు చేసింది. ఈ నేపథ్యంలోనే డీఆర్‌ఎఫ్‌ ఎప్పటికప్పుడు బలోపేతం అవుతూ ప్రపంచ స్థాయి ప్రమాణాలతో పనిచేస్తున్నది.

ఈ వర్షాకాలంలో ఎక్కడ, ఎలాంటి ప్రమాదం జరిగినా ముందుగా అక్కడికి చేరుకుని సహాయక చర్యలను వేగవంతం చేసేలా చర్యలు చేపడుతున్నారు. ఈ నేపథ్యంలోనే 20 బోట్స్‌ను సిద్దంగా పెట్టుకున్నారు. కుండపోత వర్షాలు కురిసిన లోతట్టు ప్రాంతాల వాసులకు సురక్షితంగా బయటకు తీసుకువచ్చేలా ఈ బోట్స్‌ను వినియోగించనున్నారు. 8 జేసీబీలు, బోట్స్‌ ఇంజిన్‌, స్కిడ్‌ స్టీర్‌ లోడర్‌ల యంత్రాలను వినియోగించనున్నారు. ప్రధానంగా ఐఎండీ, టీజీడీపీఎస్‌ , ఇతర ప్రైవేట్‌ వాతావరణ సంస్థల నుంచి వచ్చిన సమాచారాన్ని పౌరులకు ముందస్తుగా అలర్ట్‌గా చేయడం, అన్ని శాఖల సమన్వయం, ప్రమాద స్థలికి క్షణాల్లో చేరుకుని సహాయక చర్యలు చేపట్టి ప్రాణ, ఆస్తి నష్టం వాటిల్లకుండా చర్యలు తీసుకోవడం లాంటివి చేపడుతున్నారు. మొత్తంగా వర్షం పడక ముందే రోడ్లపై ఉండి, అటు వాహనదారులకు, ఇటు ప్రజలకు అండగా నిలబడుతూ డీఆర్‌ఎఫ్‌ పౌరుల మన్ననలు పొందుతున్నది. గత ప్రభుత్వ చొరవతోనే ఈవీడీఎం సేవలు నేటికి సమర్థవంతంగా అందుతున్నాయని ప్రజలు సంతోషం వ్యక్తం చేస్తున్నారు.

డీఆర్‌ఎఫ్‌ స్వరూపం

• 30 సర్కిళ్లలో 30 డీఆర్‌ఎఫ్‌ బృందాలు
• 22 ట్రక్స్‌లు, 8 ఎల్‌ఎంవీఎస్‌ వాహనాలు (సేఫ్టీ పరికరాలు, రెస్క్యూ టూల్స్‌, డీ-వాటరింగ్‌ పంప్స్‌, మోటార్లు, ఫైర్‌ ఫిట్టింగ్‌ పరికరాలు వాహనాల్లో ఉంటాయి)
• మూడు కమిషనరేట్ల పరిధిలో అత్యవసర బృందాలు
• హైదరాబాద్‌లో ఏడు, సైబరాబాద్‌లో నాలుగు, రాచకొండలో నాలుగు బృందాలు ఏర్పాటు చేశారు. 10 గ్రీన్‌ వేస్ట్‌ బృందాలు అందుబాటులో ఉంటాయి. చెట్లు, కొమ్మలు విరిగిపడినప్పుడు వెంటనే సంబంధిత ప్రాంతానికి చేరుకుని వాటిని తొలగించడం, వ్యర్థాలను తరలించండం, ట్రాఫిక్‌ క్లియర్‌ చేయడం ఈ బృందాల పని
• ఉన్నతాధికారుల నిరంతర పర్యవేక్షణలో నాలుగుజీ ఎల్‌టీఈ ఆధారిత వాకీ టాకీ వైర్‌లెస్‌
• ట్యాంక్‌బండ్‌ బుద్ధభవన్‌లో డీఆర్‌ఎఫ్‌ కార్యాలయంలో 24X7 నిరంతర పర్యవేక్షణ, సిటీజన్స్‌కు ఫోన్‌ నం. 040-2955 5500, 90001 13667లలో 24 గంట ల పాటు అందుబాటులో ఉంటారు.
• హెచ్‌పీ డీ వాటరింగ్‌ పంపులు 22,6.5 హెచ్‌పీ పంపులు 11, 8 హెచ్‌పీ పంపులు 3, 10హెచ్‌పీ 1, 20 హెచ్‌పీ 1, 7.5 కేవీ ఏ జనరేటర్‌, 5 కేవీఏ సైలెంట్‌ జనరేటర్‌.

సమస్యలను సమర్థవంతంగా..

– ఎన్‌.ప్రకాష్‌రెడ్డి, డైరెక్టర్‌, ఈవీడీఎం

ఈ వర్షాకాల సమస్యలను సమర్థవంతంగా ఎదుర్కొనేందుకు సిద్ధంగా ఉన్నాం. గత అనుభవాలను పరిగణనలోకి తీసుకుని ఈ ఏడాది ప్రజలకు ఎలాంటి ముంపు సమస్య లేకుండా చేయడమే లక్ష్యంగా ముఖ్యమైన ప్రాంతాల్లో డిజాస్టర్‌ రెస్పాన్స్‌ ఫోర్స్‌ (డీఆర్‌ఎఫ్‌) బృందాలు రంగంలోకి దింపాం. ముంపు సమస్యలు నివారించేందుకు, బాధితులకు రక్షించేందుకు సుశిక్షితులైన సిబ్బందితో ఈవీడీఎం సిద్ధంగా ఉంది. వచ్చే అక్టోబరు నెలాఖరు వరకు ఒక్కో సర్కిల్‌కు ఓ డీఆర్‌ఎఫ్‌ బృందాన్ని నియమించాం. గ్రేటర్‌ వ్యాప్తంగా పడవలు, రక్షణ సామగ్రితో అన్ని వేళలా డీఆర్‌ఎఫ్‌ బృందాలు అందుబాటులో ఉండేలా చర్యలు తీసుకున్నాం. ప్రత్యేకంగా కంట్రోల్‌ రూం నిరంతరం ప్రజలకు సేవలందిస్తాం. జనరేటర్‌, అగ్ని ప్రమాదాలను ఎదుర్కొనే పరికరాలు, ఇతరత్రా రక్షణ వస్తువులు డీఆర్‌ఎఫ్‌ బృందాలు కేటాయించిన ప్రాంతాల్లో ఉంటూ రక్షణ చర్యలు చేపడతారు.