సంచలనాత్మక కేసులను గంటల్లోపే ఛేదించాం

అన్ని విభాగాలు సమన్వయంతో పనిచేయడంతోనే ఈ ఏడాది సంచలనాత్మకమైన కేసులను గంటల వ్యవధిలోనే ఛేదించామని రాచకొండ పోలీస్‌ కమిషనర్‌ మహేశ్‌ భగవత్‌ అన్నారు.

• డ్రగ్స్‌ రహిత ప్రాంతంగా కమిషనరేట్‌ను తీర్చిదిద్దుతాం
• నిందితులకు శిక్షలు పడేలా చేయడంలో నం.1
• 131 శాతం తగ్గిన గుట్కా కేసులు, 29 శాతం తగ్గిన హత్యలు
• మాదక ద్రవ్యాలపై పటిష్టంగా ఎన్‌ఫోర్స్‌మెంట్‌
• సోషల్‌మీడియాలో 1995 అనుమానాస్పద లింక్‌లు తొలగింపు
• వచ్చే ఏడాది కొత్త పోలీస్‌స్టేషన్ల ఏర్పాటు
• రాచకొండ పోలీస్‌ కమిషనరేట్‌
• వార్షిక నివేదిక విడుదల చేసిన సీపీ మహేశ్‌ భగవత్‌

సిటీబ్యూరో, డిసెంబర్‌ 24 (నమస్తే తెలంగాణ) : అన్ని విభాగాలు సమన్వయంతో పనిచేయడంతోనే ఈ ఏడాది సంచలనాత్మకమైన కేసులను గంటల వ్యవధిలోనే ఛేదించామని రాచకొండ పోలీస్‌ కమిషనర్‌ మహేశ్‌ భగవత్‌ అన్నారు. తప్పు చేసిన నిందితులకు శిక్షలు పడేలా చేయడంలో రాష్ట్రంలోనే రాచకొండ ప్రథమ స్థానంలో ఉందని తెలిపారు. శనివారం ఆయన కమిషనర్‌ హోదాలో 7వ సారి రాచకొండ పోలీస్‌ కమిషనరేట్‌ వార్షిక నివేదికను నాగోల్‌లోని ఓ ప్రైవేట్‌ ఫంక్షన్‌ హాల్‌లో ఏర్పాటు చేసిన కార్యక్రమంలో విడుదల చేశారు. ఆయన పేర్కొన్న అంశాలు ఇలా ఉన్నాయి.

భరోసా కల్పిస్తున్న ‘డయల్‌ 100’

• గత ఏడాదితో పోలిస్తే హత్యలు, దృష్టి మళ్లించి దొంగతనాలు, లైంగి దాడులు, వరకట్న హత్యలు తగ్గాయి.
• సైబర్‌నేరాలు పెరుగుతున్నాయి. జాతీయ స్థాయిలో సైబర్‌ ఫిర్యాదుల కోసం సైబర్‌ పోర్టల్‌, 1930 టోల్‌ ఫ్రీ నంబర్‌తో సైబర్‌ ఫిర్యాదులు గణనీయంగా పెరిగాయి. ఈ ఏడాది 49 శాతం సైబర్‌నేరాలలో పెరుగుదల ఉంది.
• లైంగిక దాడుల కేసులు 372 నమోదు కాగా అందులో నిందితులంతా బాధితులకు ఏదో ఒక విధంగా తెలిసిన వారేనని దర్యాప్తులో తేలింది.
• ఫోక్సో కేసుల్లో రెండు నెలల్లో ఛార్జీషీట్‌ వేయాలి. అలా చేయడంలో ట్రై కమిషనరేట్లలో రాచకొండ ముందున్నది.
• ఫోక్సో కేసులలో 60 శాతం శిక్షలు పడుతున్నాయి. ఇంత పెద్ద ఎత్తున శిక్షలు పడటం రాచకొండ కమిషనరేట్‌లోనే జరుగుతున్నది.
• సోషల్‌మీడియాలో వచ్చే అనుమానాస్పద లింక్‌లను ఎప్పటికప్పుడు పరిశీలిస్తున్న ఐటీ సెల్‌ ఈ ఏడాది 1995 లింక్‌లను తొలగించింది.
• డయల్‌ 100కు ఫోన్‌ చేసే వారి సంఖ్య పెరుగుతున్నది. పోలీసులపై నమ్మకంతో సామాన్య ప్రజలు ఆపద వచ్చినప్పుడు ఫోన్‌ చేస్తున్నారు.
• డయల్‌ 100కు వచ్చిన కాల్స్‌కు సిబ్బంది వెంటనే స్పందించడంతో 29 మంది ప్రాణాలను సిబ్బంది కాపాడటం ప్రశంసనీయం.
• మాదక ద్రవ్యాలపై ఉక్కుపాదం మోపాం. ఈ ఏడాది 223 కేసులు నమోదు చేసి 635 మందిని అరెస్ట్‌ చేశాం. అందులో 94 మందిపై పీడీయాక్టు విధించాం.
• మానవ అక్రమ రవాణాలో 103 కేసులు నమోదు చేసి 144 మందిని అరెస్ట్‌ చేసి 46 మందిపై పీడీయాక్టు ప్రయోగించాం. ఈ ఏడాది 11,104 కేసులు పరిష్కారం కాగా 6503 కేసుల్లో శిక్షలు పడ్డాయి. శిక్షల శాతం 59శాతం ఉందని సీపీ మహేశ్‌భగవత్‌ తెలిపారు.

మహిళలకు భద్రత
మహిళల భద్రతపై ప్రత్యేక దృష్టిసారించామని సీపీ మహేశ్‌భగవత్‌ తెలిపారు. మహిళలపై వేధింపులతో పాటు బాల్య వివాహాలు, బాల కార్మికులకు విముక్తి చేస్తున్నట్లు వివరించారు. ఇతర రాష్ర్టాల పిల్లలకు ప్రత్యేకంగా పాఠశాలలు నిర్వహిస్తున్నామని, దీనికి స్వచ్ఛంద సంస్థల సహకారం తీసుకుంటున్నట్లు తెలిపారు. మహిళల వేధింపులపై షీ టీమ్స్‌ ప్రత్యేక దృష్టి సారిస్తున్నాయని చెప్పారు. షీ టీమ్స్‌కు పట్టుబడిన వారిలో చాలా మందికి వారి ప్రవర్తన, ఆలోచన తీరులో మార్పు తేవడానికి మానసిక నిపుణులతో కౌన్సెలింగ్‌ నిర్వహిస్తున్నట్లు పేర్కొన్నారు. ఈ ఏడాది 29 బాల్య వివాహలను ఆపింది. 4200 డెకాయి ఆపరేషన్లు, 7200 మెట్రో డెకాయి ఆపరేషన్లు, 1800 అవగాహన కార్యక్రమాలు షీ టీమ్స్‌ నిర్వహించిందన్నారు. మాదక ద్రవ్యాలను కూకటి వేళ్లతో అణిచివేసేందుకు కట్టుదిట్టమైన చర్యలు తీసుకుంటున్నామని, ఇందులో భాగంగానే భారీ స్థాయిలో ఎన్‌ఫోర్స్‌మెంట్‌ చేయడంతో అధిక సంఖ్యలో కేసులు నమోదయ్యాయని చెప్పారు. డ్రగ్స్‌ విక్రయించే వారితో పాటు డ్రగ్స్‌ వాడే వారిపై కూడా కేసులు నమోదు చేస్తున్నామన్నారు. డ్రగ్స్‌ వినియోగదారులలో మార్పు తెచ్చేందుకు ప్రత్యేకంగా వారికి కౌన్సెలింగ్‌ ఇస్తున్నామని తెలిపారు.

వచ్చే ఏడాది కొత్త పోలీస్‌స్టేషన్లు
రాచకొండ పోలీస్‌ కమిషనరేట్‌ పరిధిలో కొత్తగా పోలీస్‌స్టేషన్‌లు, డివిజన్లు, జోన్‌లు రానున్నాయని సీపీ మహేశ్‌భగవత్‌ తెలిపారు. 763 కొత్త పోస్టులను ప్రభుత్వ మంజూరు చేసిందని చెప్పారు. ఇందులో భాగంగా కొత్తగా మహేశ్వరం జోన్‌ ఏర్పాటవుతుందన్నారు. చర్లపల్లి, నాగోల్‌, హైదరాబాద్‌ గ్రీన్‌ ఫార్మ సిటీ పీఎస్‌, పోచారం ఐటీ కారిడార్‌, ఉప్పల్‌లో మహిళా పోలీస్‌స్టేషన్‌లు ఏర్పాటువుతున్నాయని తెలిపారు. అలాగే ఘట్‌కేసర్‌, జవహర్‌నగర్‌, మహేశ్వరం, ఇబ్రహీంపట్నం ట్రాఫిక్‌ ఠాణాలతో పాటు రెండు ట్రాఫిక్‌ జోన్లు, రెండు ఎస్‌ఓటీ జోన్లు ఏర్పాటవుతున్నాయని పేర్కొన్నారు. మేడిపల్లి పరిధిలో రాచకొండ కమిషనరేట్‌కు నూతన భవనం ఏర్పాటుకు ప్రభుత్వం నిధులు మంజూరు చేసిందని సీపీ వివరించారు. డ్రగ్స్‌ రహిత ప్రాంతంగా కమిషనరేట్‌ను తీర్చిదిద్దేందుకు ప్రయత్నిస్తున్నామన్నారు. దర్యాప్తులో మరింత వేగం, టెక్నాలజీని ఉపయోగించి నిందితులకు మరింత శిక్షల శాతం పెరిగేలా చర్యలు తీసుకుంటామని వివరించారు. నూతన సంవత్సర వేడుకలను డ్రగ్స్‌ లేకుండా నిర్వహించుకోవాలని, ఎక్కడైనా ఏదైనా డ్రగ్‌ వాడినట్లు, నిబంధనలు ఉల్లంఘించినట్లు తెలిస్తే వెంటనే స్థానిక పోలీసులకు, డయల్‌ 100కు సమాచారం ఇవ్వాలని సీపీ సూచించారు. ఈ సమావేశంలో డీసీపీలు సన్‌ప్రీత్‌సింగ్‌, శ్రీబాల, యాదగిరి, ఎం.వెంకటేశ్వర్లు, సలీమా, డి.శ్రీనివాస్‌, కె.మురళీధర్‌, అదనపు డీసీపీలు సి.నర్మద, ఎం.శ్రీనివాసులు, ఎ.లక్ష్మిలతో పాటు పబ్లిక్‌ ప్రాసిక్యూటర్లు, అదనపు పబ్లిక్‌ ప్రాసిక్యూటర్లు, రాచకొండ సైబర్‌ సెక్యూరిటీ కౌన్సిల్‌ ప్రతినిధులు వెంకటేశ్‌, గగన్‌దీప్‌ కోహ్లీ, రాచకొండ పోలీస్‌ కమిషనరేట్‌కు చెందిన ఇన్‌స్పెక్టర్‌పై స్థాయి అధికారులు పాల్గొన్నారు.