Kondapur | దొంగతనాలకు పాల్పడుతున్న పాత నేరస్తుల అరెస్ట్​

బాలుడిని కత్తితో బెదిరించి సెల్​ఫోన్​ దొంగలించిన పాత నేరస్థులను చందానగర్​ పోలీసులు అరెస్ట్​ చేశారు.

కొండాపూర్, జూలై 27 : బాలుడిని కత్తితో బెదిరించి సెల్​ఫోన్​ దొంగలించిన పాత నేరస్థులను చందానగర్​ పోలీసులు అరెస్ట్​ చేశారు. వారి నుంచి ఒక సెల్​ఫోన్​, ఐదు బైకులు స్వాధీనం చేసుకున్నారు. చందానగర్​ పోలీస్​ స్టేషన్​ లో సోమవారం ఏర్పాటు చేసిన విలేకరుల సమావేశంలో ఆర్సీపురం ఏసీపీ శ్రీనివాస్​ కేసు వివరాలను వెల్లడించారు. ఈ నెల 22వ తేదిన రాత్రి 11.30 గంటలకు చందానగర్​ రైల్వే స్టేషన్​ సమీపంలో గుడిసెలో నివాసం ఉండే జాన్​ సయ్యద్​ అనే బాలుడు ఒంటరిగా ఉండడంతో ఇద్దరు వ్యక్తులు వచ్చి మంచినీళ్లు ఇవ్వాలని కోరడంతో జాన్​ నీళ్లు ఇచ్చాడు.

అక్కడి నుంచి వెళ్లిన ఆ ఇద్దరు వ్యక్తులు మద్యం మత్తులో తిరిగి​ గుడిసె వద్దకు వచ్చి కత్తితో జాన్​సయ్యద్​ను బెదిరించి సెల్​ఫోన్​ను లాక్కేళ్లారు. దీంతో జాన్​చందానగర్​ పోలీసులకు ఫిర్యాదు చేయగా పోలీసులు కేసు నమోదు చేసి దర్యాప్తు చేపట్టారు. సీసీ కెమెరాల ఆధారంగా సోమవారం ఉదయం పాపిరెడ్డి కాలనీలో నివాసం ఉంటున్న ఒక నిందితుడు భాను ప్రసాద్​(25)ను అదుపులోకి తీసుకున్నారు. అతను ఇచ్చిన సమాచారంతో మంగళ్​హట్​ శివాలాల్​నగర్​కు చెందిన మరో నిందితుడు విష్ణువర్ధన్​(21)ను అదుపులోకి తీసుకున్నారు.

వీరిద్దరూ పాత నేరస్తులుగా గుర్తించి, వారి నుంచి ఒక సెల్​ఫోన్​, ఐదు బైకులు స్వాధీనం చేసుకున్నారు. అనంతరం అరెస్ట్​ చేసి రిమాండ్​కు తలిరంచారు. మేస్ర్తీ పనిచేసే విష్ణువర్దన్​, పెయింటర్​గా పనిచేసే భాను ప్రసాద్ లిద్దరూ కలిసి నగరంలోని పలు చోట్ల దొంగతనాలకు పాల్పడ్డారు. వీరిపై సైబరాబాద్​, హైదరాబాద్, యాదాద్రి భువనగిరి జిల్లాల్లో 11 దొంగతనాల కేసులు ఉన్నాయి. ఇప్పటికే పలు కేసుల్లో జైలుకు వెళ్లివచ్చినట్లు తెలిపారు. ఈ సమావేశంలో చందానగర్​ ఇన్​స్పెక్టర్​ శ్రీధర్​ కుమార్​, ఎస్​ఐ శ్రీనివాస తేజ, సిబ్బంది పాల్గొన్నారు.