Hyderabad | పబ్లిసిటీ కోసం హీరోయిన్‌పై తప్పుడు కామెంట్స్‌.. నిందితుడిని అరెస్ట్‌ చేసిన పోలీసులు

బోగస్‌ సోషల్‌ మీడియా అకౌంట్‌ను ఏర్పాటు చేసుకుని సినీ ప్రముఖులను అసభ్యకరమైన రీతిలో కామెంట్స్‌ చేస్తున్న నిందితుడిని బంజారాహిల్స్‌ పోలీసులు అరెస్ట్‌ చేశారు.

బంజారాహిల్స్‌,మార్చి 3: బోగస్‌ సోషల్‌ మీడియా అకౌంట్‌ను ఏర్పాటు చేసుకుని సినీ ప్రముఖులను అసభ్యకరమైన రీతిలో కామెంట్స్‌ చేస్తున్న నిందితుడిని బంజారాహిల్స్‌ పోలీసులు అరెస్ట్‌ చేశారు. వివరాల్లోకి వెళ్తే.. వరంగల్‌ జిల్లాకు చెందిన రుషిత్‌(24) అనే యువకుడు సినిమాలు, టీవీ సీరియల్స్‌లో చిన్నాచితకా వేషాలు వేస్తుంటాడు. తన సోషల్‌ మీడియా వ్యూస్‌ పెంచుకుని తద్వారా పబ్లిసిటీ సంపాధించుకోవాలనే ఉద్దేశంతో రీల్‌ మాయ అనే పేరుతో బోగస్‌ సోషల్‌మీడియా వేదికను ఏర్పాటు చేసుకున్నాడు. సినీ హీరోయిన్ల అకౌంట్స్‌ను ఫాలో అవుతూ నోటికి వచ్చిన బూతు వ్యాఖ్యలను కామెంట్‌ రూపంలో చేస్తున్నాడు.

ఈ మేరకు ఇటీవల టాలీవుడ్‌కు చెందిన ఓ హీరోయిన్‌ను, దర్శకుడిని ఉద్దేశించి అసభ్యకరమైన కామెంట్స్‌ చేశాడు. ఈ మేరకు బాధితులు బంజారాహిల్స్‌ పోలీసులకు ఫిర్యాదు చేయగా కేసు నమోదు చేసుకున్న పోలీసులు దర్యాప్తు చేపట్టారు. సోషల్‌మీడియా అకౌంట్‌ ఆధారంగా నిందితుడు రుషిత్‌ను గుర్తించిన పోలీసులు అతడిని తమదైన శైలిలో విచారించగా పబ్లిసిటీ కోసం ఇలాంటి పనులు చేస్తున్నట్లు తేలింది. నిందితుడిని అరెస్ట్‌ చేసిన పోలీసులు అతడి సోషల్‌ మీడియా అకౌంట్స్‌ను బ్లాక్‌ చేయించారు.