కొత్త దరఖాస్తులకు మోక్షం లేనట్లే

దశాబ్దాల భూ యజమానులకు ఉన్న హక్కులను 22ఏ పేరిట కాలరాసిన కాంగ్రెస్‌ ప్రభుత్వం... వాటిని పరిష్కరిస్తామని చెప్పి చేతులు దులుపుకొన్నది.

• 2017-18 నాటి ‘22ఏ’ అర్జీల పరిశీలన
• యూఎల్‌సీ, జీవో నం. 58, 59 దరఖాస్తులపై దృష్టి
• ఇప్పటికీ నిషేధిత జాబితాలోనే వేలాది ఆస్తులు

సిటీబ్యూరో, నవంబర్‌ 9(నమస్తే తెలంగాణ) : దశాబ్దాల భూ యజమానులకు ఉన్న హక్కులను 22ఏ పేరిట కాలరాసిన కాంగ్రెస్‌ ప్రభుత్వం… వాటిని పరిష్కరిస్తామని చెప్పి చేతులు దులుపుకొన్నది. 22ఏ నుంచి అందరికీ ఉపశమనం కలిగిస్తామని చెప్పి మార్గదర్శకాలు ఇవ్వకుండా వేధింపులకు గురిచేస్తోంది.

కేవలం మెమోలకే పరిమితం చేసిన ప్రభుత్వం… యూఎల్‌సీ, జీవో నెం. 118, జీవో నం. 59లోని పాత దరఖాస్తులను మాత్రమే పరిశీలిస్తామని చెబుతున్నారు. కానీ కొత్త దరఖాస్తుల విషయంలో ఎలాంటి నిర్ణయం తీసుకోకుండా, లక్షలాది ఆస్తులను నిషేధిత జాబితాలో చేర్చి వేధింపులకు గురిచేస్తోంది. ముఖ్యమంత్రి, రెవెన్యూ శాఖ మంత్రులు ఇద్దరూ ఈ అంశంపై చేసిన ప్రకటనలు ఉట్టి మాటలేనన్నట్లుగా మారిపోగా, రిజిస్ట్రేషన్లకు అవకాశమే లేకుండా చేసి, సర్కార్‌ చోద్యం చూస్తోంది.

భూ యజమానుల పాలిట రాచపుండులా మారిన 22 అంశంపై సమస్యల పరిష్కారానికి అసెంబ్లీ వేదికగా ప్రకటన చేసిన ప్రభుత్వం, ఆచరణను మరిచిపోయింది. ఇప్పటివరకు 10 కీలక అంశాలను గుర్తించామని, 22ఏ సమస్యల పరిషారానికి హామీ ఇస్తూ దశల వారీగా ఆదేశాలు జారీ చేస్తోంది. కానీ క్షేత్రస్థాయిలో మాత్రం పరిస్థితుల్లో ఎలాంటి మార్పు రాలేదు.

సరార్‌ మార్గదర్శకాలను (గైడ్‌ లైన్స్‌) మరిచిపోవడంతో సామాన్య ప్రజలు, బాధితులు అధికారుల చుట్టూ తిరుగుతూ తీవ్ర ఇబ్బందులను ఎదుర్కొంటున్నారు. లేఅవుట్‌ అనుమతులు, అర్బన్‌ ల్యాండ్‌ సీలింగ్‌, అసైన్డ్‌ భూములు, సర్‌ప్లస్‌ భూములు, జీవో 59, జీవో 118 కింద ఉన్న భూములు, సింగరేణి స్థలాలు, ప్రైవేటు పట్టా భూములు పొరపాటున 22ఏలో చేరడం వంటి పలు అంశాలు ఉన్నాయి. వీటిలో కీలక అంశాలకు సంబంధించిన విధివిధానాలను జారీ చేయకుండానే, మెమోలతోనే నెట్టుకొస్తున్నది.

కొత్త వాటిని ముట్టేది లేదు…

ఇప్పటివరకు రెవెన్యూ శాఖ విడుదల చేసిన మార్గదర్శకాలు అన్నీ కూడా గతంలో పలు దశల్లో పెండింగ్‌లో ఉన్న దరఖాస్తులకు మాత్రమే వర్తిస్తాయి. అంటే 2017-2018లోపు దరఖాస్తు చేసుకున్న అప్లికేషన్లను మాత్రమే పరిశీలిస్తామని చెబుతున్నారు. తాజాగా 22ఏ జాబితాలో చేర్చిన ఆస్తుల పరిష్కారానికి అధికారులకు స్పష్టమైన ఆదేశాలు రాకపోవడంతో…పెండింగ్‌ దరఖాస్తులతో పాటు తమ ఆస్తులను విడిపిస్తుందనీ జనాలు ఆశగా ఎదురుచూస్తున్నారు. కానీ ఇప్పటివరకు జారీ చేసిన మెమోలు, మంత్రులు ఆదేశాలు, ముఖ్యమంత్రి ప్రకటనలు కూడా పాత దరఖాస్తులకే వర్తిస్తాయి.

గతంలో ఫీజులు చెల్లించి, రెగ్యులరైజేషన్‌ కోసం దరఖాస్తు చేసుకున్న ఫైళ్లను మాత్రమే పరిశీలించాలని ప్రభుత్వం చెప్పినట్లుగా అధికారులు పేర్కొన్నారు. మరీ కొత్తగా 22ఏలో చేర్చిన అంశాలకు ఎప్పుడు పరిష్కరిస్తామనే విషయంలో సర్కారు స్పష్టమైన ఆదేశాలు ఇస్తే గానీ సాధ్యం కాదనీ అధికారులు తేల్చి చెబుతున్నారు. అప్పటివరకు ఇందులో ఆయా జాబితాల్లో ఇటీవల కొత్తగా చేరిన ఆస్తులను పరిష్కరించడానికి ఇప్పటివరకు సర్కార్‌ ఎలాంటి మార్గదర్శకాలు, ఆదేశాలు చేయకపోవడంతోనే ఈ సమస్య వచ్చిందనీ అధికారులు చెబుతున్నారు.

మార్గదర్శకాలే కీలకం…

దశాబ్దాల క్రితం కొనుగోలు చేసిన భూములు, లేఅవుట్లలో ప్లాట్లను రిజిస్ట్రేషన్‌ చేసుకునేందుకు వెళ్తే 22ఏ పేరిట అధికారులు తిరసరిస్తున్నారు. తమ సొంత ఆస్తులను అత్యవసరాలకు అమ్ముకోలేకపోతున్నామని జనాలు ఆవేదన చెందుతున్నారు. 22ఏ నిబంధనల వల్ల లావాదేవీలు నిలిచిపోయి వేలాది కుటుంబాలు ఆందోళన చెందుతున్నాయి.

ప్రభుత్వం ప్రకటించిన 10 అంశాలపై తక్షణమే సమగ్ర విధివిధానాలను రూపొందించి, జీవోలను విడుదల చేయాలని బాధిత ప్రజలు డిమాండ్‌ చేస్తున్నారు. 22ఏలో తాజాగా చేర్చిన ఆస్తులను కూడా పరిష్కరించాలని, ప్రతి ఫైలు సీసీఎల్‌ఏ, కలెక్టర్‌ స్థాయికి రాకుండా, నిబంధనలను పారదర్శకంగా కింది స్థాయి అధికారులకే అప్పగిస్తే తప్ప 22ఏ బాధితులకు విముక్తి లభించదనే అభిప్రాయాన్ని నిపుణులు వ్యక్తం చేస్తున్నారు. మరి ప్రభుత్వం ఇప్పటికైనా స్పందించి మిగిలిన అంశాలపై జారీ చేసే మార్గదర్శకాలే కీలకంగా మారాయి.