Visit:
Migraine | ఆధునిక జీవనశైలిలో మైగ్రేన్ సమస్యతో బాధపడుతున్న వారి సంఖ్య పెరుగుతోంది. మైగ్రేన్ తలనొప్పి వచ్చినప్పుడు కాఫీ తాగితే ఉపశమనం లభిస్తుందని కొందరు చెబుతుంటే, మరికొందరు మాత్రం కాఫీనే మైగ్రేన్కు కారణమవుతుందని భావిస్తారు. దీంతో కాఫీ నిజంగా మైగ్రేన్కు మేలు చేస్తుందా? లేక హాని చేస్తుందా? అనే సందేహం చాలామందిలో ఉంటుంది. నిపుణుల అభిప్రాయం ప్రకారం దీనికి ఒకే సమాధానం ఉండదు. వ్యక్తి నుంచి వ్యక్తికి కాఫీ ప్రభావం మారుతుంది. కాఫీలో ఉండే కెఫీన్ మెదడులోని అడెనోసిన్ రిసెప్టర్లను నిరోధించి రక్తనాళాలు కుచించుకునేలా చేస్తుంది. మైగ్రేన్ సమయంలో మెదడులోని రక్తనాళాలు విస్తరించడం వల్ల నొప్పి పెరుగుతుంది. అలాంటి సమయంలో కెఫీన్ రక్తనాళాలను మళ్లీ కుచించడంలో సహాయపడటంతో కొందరిలో తలనొప్పి తగ్గే అవకాశం ఉంటుంది. అందుకే కొన్ని తలనొప్పి నివారణ మందుల్లో కూడా కెఫీన్ను ఉపయోగిస్తారు.
అయితే ప్రతి మైగ్రేన్ బాధితుడికి కాఫీ ఒకే విధంగా పనిచేయదు. కొందరిలో కాఫీ తాగిన వెంటనే మైగ్రేన్ దాడి ప్రారంభమయ్యే అవకాశం ఉంటుంది. అలాంటి వారు కాఫీని దూరంగా ఉంచడం మంచిదని నిపుణులు సూచిస్తున్నారు. మరోవైపు ప్రతిరోజూ ఎక్కువగా కాఫీ తాగే వారు ఒక్కసారిగా కాఫీ తగ్గిస్తే లేదా పూర్తిగా మానేస్తే కూడా తలనొప్పి వచ్చే అవకాశం ఉంటుంది. దీనిని కెఫీన్ ఉపసంహరణ తలనొప్పి (Caffeine Withdrawal Headache) అంటారు. అంటే కాఫీ తాగడం వల్ల కాదు, ఒక్కసారిగా తాగడం ఆపేయడం వల్ల కూడా తలనొప్పి వస్తుంది. నిపుణుల సూచనల ప్రకారం, కాఫీ తాగిన తర్వాత మైగ్రేన్ వస్తే దానిని నివారించడం ఉత్తమం. అయితే కాఫీ తాగని రోజుల్లో మాత్రమే తలనొప్పి వస్తే అది కెఫీన్ ఉపసంహరణ ప్రభావం అవుతుంది. ఇలాంటి పరిస్థితుల్లో ఒక్కసారిగా కాఫీ మానేయకుండా క్రమంగా తగ్గించడం మంచిది.
రోజూ కాఫీ తాగే వారు పరిమిత మోతాదులోనే తీసుకోవాలి. రోజుకు ఒకటి లేదా రెండు కప్పుల కాఫీని సమయానికి తాగడం సాధారణంగా సురక్షితంగా భావిస్తారు. అయితే రోజుకు మూడు నుంచి నాలుగు కప్పులకు మించి కాఫీ తాగే అలవాటు ఉంటే, తర్వాత దానిని తగ్గించినప్పుడు ఉపసంహరణ తలనొప్పులు వచ్చే ప్రమాదం పెరుగుతుంది. మైగ్రేన్ విషయంలో కాఫీ కొందరికి ఉపశమనం ఇస్తుంది, మరికొందరికి సమస్యను పెంచుతుంది. కాబట్టి కాఫీ ప్రభావాన్ని గమనిస్తూ, మితంగా తీసుకోవడం, ఒక్కసారిగా మానేయకుండా అలవాట్లలో మార్పులు చేయడం ద్వారా మైగ్రేన్ను మెరుగ్గా నియంత్రించుకోవచ్చని నిపుణులు సూచిస్తున్నారు.
