Visit:
Heart Health | గుండె ఆరోగ్యం కాపాడుకోవడం మొత్తం శరీర ఆరోగ్యానికి, దీర్ఘాయుష్షుకు అత్యంత కీలకం. గుండె శరీరమంతా రక్తాన్ని పంపుతూ అవయవాలకు ఆక్సిజన్, పోషకాలను అందిస్తుంది. గుండె సక్రమంగా పనిచేస్తే శక్తి స్థాయిలు, మానసిక స్పష్టత, భావోద్వేగ స్థిరత్వం కూడా మెరుగ్గా ఉంటాయి. అయితే ప్రపంచవ్యాప్తంగా గుండె సంబంధిత వ్యాధులు ప్రధాన ఆరోగ్య సమస్యగా మారాయి. ప్రపంచ ఆరోగ్య సంస్థ (WHO) ప్రకారం కార్డియోవాస్క్యులర్ వ్యాధులే మరణాలకు ప్రధాన కారణం. అయితే జీవనశైలి, పర్యావరణ కారణాలను నియంత్రించడం ద్వారా వీటిని చాలా వరకు నివారించవచ్చని వైద్యులు చెబుతున్నారు. గుండె ఆరోగ్యాన్ని ముందుగానే అంచనా వేసేందుకు రెగ్యులర్ స్క్రీనింగ్స్ కీలక పాత్ర పోషిస్తాయి. ఈ పరీక్షల ద్వారా ప్రమాద సూచకాలను తొందరగా గుర్తించి, తీవ్రమైన నష్టం కలగకముందే చర్యలు తీసుకోవచ్చు. సమయానికి జాగ్రత్తలు తీసుకుంటే హార్ట్ అటాక్, స్ట్రోక్ వంటి సమస్యలను నివారించడం సాధ్యమవుతుంది.
ముఖ్యమైన సూచికలను నిరంతరం పరిశీలించడం ద్వారా వ్యక్తిగత ఆరోగ్యానికి అనుగుణంగా చర్యలు తీసుకోవచ్చు. గుండె సంబంధిత వ్యాధులు చాలా వరకు ప్రారంభ దశలో ఎలాంటి లక్షణాలు లేకుండానే అభివృద్ధి చెందుతాయి. అందుకే నిపుణులు 20 ఏళ్ల వయస్సు నుంచే ప్రాథమిక పరీక్షలు ప్రారంభించాలని సూచిస్తున్నారు. గుండె ఆరోగ్యాన్ని కాపాడుకోవడానికి చేయించుకోవాల్సిన పరీక్షల గురించి వైద్యులు ఏం చెబుతున్నారో ఇప్పుడు తెలుసుకుందాం. గుండె ఆరోగ్యాన్ని కాపాడుకోవడానికి చేయించుకోవాల్సిన పరీక్షల్లో రక్తపోటు పరీక్ష ఒకటి. ఈ పరీక్ష రక్తం ధమనుల గోడలపై చూపే ఒత్తిడిని కొలుస్తుంది. అధిక రక్తపోటు రక్తనాళాలను దెబ్బతీసి గుండె వ్యాధులు, స్ట్రోక్ ప్రమాదాన్ని పెంచుతుంది. క్రమం తప్పకుండా చెక్ చేయడం ద్వారా సమస్యలను ముందుగానే గుర్తించవచ్చు.
సాధారణంగా ప్రతి వైద్య పరీక్ష సమయంలో లేదా కనీసం సంవత్సరానికి ఒకసారి ఈ పరీక్ష చేయించుకోవాలి. విలువలు సాధారణంగా (120/80 mm Hg కంటే తక్కువ) ఉంటే సరిపోతుంది. అలాగే లిపిడ్ ప్రొఫైల్ (కొలెస్ట్రాల్) కూడా చేయించుకోవాలి. ఈ పరీక్షలో LDL (చెడు కొలెస్ట్రాల్), HDL (మంచి కొలెస్ట్రాల్), ట్రైగ్లిసరైడ్స్ స్థాయిలను అంచనా వేస్తారు. LDL లేదా ట్రైగ్లిసరైడ్స్ పెరిగితే రక్తనాళాల్లో ప్లాక్ పేరుకుపోయి గుండె వ్యాధులకు దారి తీస్తుంది. సంవత్సరానికి ఒకసారి ఈ పరీక్ష చేయించుకోవడం ద్వారా కొలెస్ట్రాల్ ను నియంత్రణలో ఉంచుకోవచ్చు. అదే విధంగా HbA1c (రక్తంలో 3 నెలల సగటు చక్కెర స్థాయిలు) పరీక్ష కూడా చేయించుకోవడం అవసరం. 2-3 నెలల సగటు బ్లడ్ షుగర్ స్థాయిని ఈ పరీక్ష తెలియజేస్తుంది. ఇన్సులిన్ రెసిస్టెన్స్ లేదా ప్రీడయాబెటిస్ ఉన్నదో లేదో గుర్తించడానికి ఇది ఉపయోగపడుతుంది. ఇవి గుండె వ్యాధులకు ముఖ్య ప్రమాద కారకాలు. సంవత్సరానికి ఒకసారి పరీక్ష చేయించడం ద్వారా ముందస్తు జాగ్రత్తలు తీసుకోవచ్చు.
ఇక ApoB లేదా Lp(a) పరీక్ష కూడా చేయించుకోవాల్సిందిగా వైద్యులు సూచిస్తున్నారు. ఈ పరీక్షలు రక్తంలో ఉన్న ప్రత్యేక లిపోప్రోటీన్లను కొలుస్తాయి. ApoB రక్తంలో హానికర కణాల సంఖ్యను తెలియజేస్తే, Lp(a) ప్లాక్ ఏర్పడే ప్రమాదాన్ని సూచిస్తుంది. 20 లేదా 30 ఏళ్ల వయస్సులోనే ఈ పరీక్షలు చేయించుకుంటే ముందుగానే జీవనశైలి మార్పులు చేసుకోవడానికి ఉపయోగపడుతుంది. వీటితో పాటుగా బాడీ మాస్ ఇండెక్స్ (BMI), నడుము కొలతను కూడా పరీక్షించుకోవాలి. బరువు, కొవ్వు స్థాయిలు గుండె ఆరోగ్యంపై ప్రభావం చూపుతాయి. BMI, నడుము కొలతలను క్రమం తప్పకుండా పరిశీలించడం ద్వారా ఒబేసిటీకి సంబంధించిన ప్రమాదాలను అంచనా వేయవచ్చు. ఈ విధంగా సంవత్సరానికి ఒకసారైనా ఈ పరీక్షలు చేయించుకోవడం ద్వారా గుండె ఆరోగ్యాన్ని కాపాడుకోవచ్చు. సాధారణంగా ఆరోగ్యంగా ఉన్నవారికి ఈ పరీక్షలు సంవత్సరానికి ఒకసారి చేయించుకోవడం సరిపోతుంది. అయితే ఇప్పటికే గుండె సంబంధిత సమస్యలు ఉన్నవారు లేదా ప్రత్యేక లక్షణాలు ఉన్నవారికి ఎకో, ECG, స్ట్రెస్ టెస్ట్, CAC స్కాన్ వంటి అదనపు పరీక్షలు అవసరమవ్వచ్చు. ఈ ముఖ్యమైన పరీక్షలను నిరంతరం చేయించుకోవడం ద్వారా గుండె ఆరోగ్యంపై అవగాహన పెంపొందించుకుని, తగిన నిర్ణయాలు తీసుకోవచ్చు. ముందస్తు జాగ్రత్తలతో గుండె వ్యాధులను నియంత్రించడం సాధ్యమవుతుందని వైద్యులు తెలియజేస్తున్నారు.
