Visit:
Oral Cancer | నోటి క్యాన్సర్ అంటే చాలామంది ముందుగా ధూమపానం గురించే ఆలోచిస్తారు. అయితే సిగరెట్లు లేదా బీడీలు తాగే వారికే ఈ వ్యాధి వస్తుందనుకోవడం పెద్ద అపోహ అని ఆరోగ్య నిపుణులు చెబుతున్నారు. ధూమపానం చేయని వారిలో కూడా అనేక కారణాల వల్ల నోటి క్యాన్సర్ వచ్చే అవకాశం ఉంటుంది. ప్రారంభ లక్షణాలను గుర్తించి వెంటనే వైద్య పరీక్షలు చేయించుకోవడం ద్వారా చికిత్స విజయవంతం అయ్యే అవకాశాలు గణనీయంగా పెరుగుతాయి. పొగాకు వాడకం నోటి క్యాన్సర్కు ప్రధాన కారణాల్లో ఒకటే అయినప్పటికీ, అది ఒక్కటే కారణం కాదు. పొగాకు నమలడం, గుట్కా వంటి పొగరహిత పొగాకు ఉత్పత్తుల వినియోగం, అధిక మద్యపానం, నోటి పరిశుభ్రత సరిగా పాటించకపోవడం, పోషకాహార లోపం, అనారోగ్యకర జీవనశైలి, కొన్ని వైరల్ ఇన్ఫెక్షన్లు, పర్యావరణ ప్రభావాలు కూడా నోటి క్యాన్సర్ ప్రమాదాన్ని పెంచుతాయి.
చాలామంది సిగరెట్లు తాగకపోతే తాము సురక్షితమేనని భావిస్తుంటారు. దీంతో నోటిలో కనిపించే ప్రారంభ లక్షణాలను నిర్లక్ష్యం చేస్తారు. ఈ అపోహ కారణంగా వ్యాధి నిర్ధారణ ఆలస్యమై చికిత్స కూడా ఆలస్యమయ్యే ప్రమాదం ఉంటుంది. అందుకే ధూమపానం చేయని వారూ నోటి ఆరోగ్యంపై అప్రమత్తంగా ఉండాలని నిపుణులు సూచిస్తున్నారు. పొగాకు ఏ రూపంలో తీసుకున్నా అది హానికరమే. గుట్కా, ఖైనీ, జర్దా వంటి పొగరహిత పొగాకు ఉత్పత్తులు సిగరెట్ల కంటే తక్కువ హానికరమని కొందరు భావిస్తారు. కానీ ఇవి నోటి కణజాలాన్ని నేరుగా క్యాన్సర్కు దారితీసే రసాయనాలకు గురిచేస్తాయి. కాబట్టి పొగాకు ఉత్పత్తులన్నింటినీ పూర్తిగా దూరం పెట్టడం నోటి క్యాన్సర్ నివారణలో కీలకమైన చర్య. నోటిలో వచ్చే పుండ్లు సాధారణంగా కొద్ది రోజుల్లో తగ్గిపోతాయి. అయితే రెండు నుంచి మూడు వారాలకుపైగా తగ్గకుండా ఉండే పుండు, తరచూ మళ్లీ మళ్లీ రావడం, నొప్పి, రక్తస్రావం లేదా రూపంలో మార్పులు కనిపించడం వంటి లక్షణాలను నిర్లక్ష్యం చేయకూడదు. ఒత్తిడి, కారం తినడం లేదా చిన్న గాయం వల్లే వచ్చిందని భావించి నిర్లక్ష్యం చేయడం ప్రమాదకరం.
నోటిలో తెల్లని లేదా ఎర్రని మచ్చలు, మందంగా కనిపించే భాగాలు లేదా నోటి లోపలి పొర రంగులో అసాధారణ మార్పులు కనిపిస్తే వెంటనే వైద్యులను సంప్రదించాలి. ఇవి ప్రారంభ దశలోనే కణజాలంలో జరుగుతున్న మార్పులకు సంకేతాలుగా ఉండే అవకాశం ఉంటుంది. క్రమం తప్పకుండా దంత పరీక్షలు చేయించుకోవడం ద్వారా ఇలాంటి మార్పులను ముందుగానే గుర్తించవచ్చు. ఎటువంటి స్పష్టమైన కారణం లేకుండా గొంతు బొంగురుపోవడం, ఆహారం మింగడంలో ఇబ్బంది, నోట్లో మొద్దుబారిన భావన, దవడను కదిలించడంలో ఇబ్బంది లేదా దీర్ఘకాలంగా గొంతు అసౌకర్యం వంటి లక్షణాలు కొనసాగితే వాటిని కూడా నిర్లక్ష్యం చేయరాదు. ఇవి ఇతర కారణాల వల్ల కూడా వస్తాయి. అయినప్పటికీ ఎక్కువకాలం కొనసాగితే వైద్య పరీక్షలు అవసరం. ఇటీవలి కాలంలో హ్యూమన్ పాపిలోమా వైరస్ (HPV) కూడా నోటి, గొంతు క్యాన్సర్లకు కారణమయ్యే అంశంగా మారుతోంది. ఈ వైరస్ సాధారణంగా గర్భాశయ ముఖద్వార క్యాన్సర్తో సంబంధం కలిగి ఉన్నప్పటికీ, కొన్ని అధిక ప్రమాదకర రకాల వైరస్లు నోటి క్యాన్సర్ ప్రమాదాన్ని కూడా పెంచుతాయి. హెచ్పీవీపై అవగాహన పెంపొందించడం, అవసరమైన టీకాలు తీసుకోవడం, సురక్షిత ఆరోగ్య అలవాట్లు పాటించడం వల్ల ఈ ప్రమాదాన్ని తగ్గించవచ్చు.
నోటి క్యాన్సర్ నివారణలో పొగాకు మానేయడం ఒక్కటే సరిపోదు. రోజూ నోటి పరిశుభ్రత పాటించడం, మద్యపానాన్ని పరిమితం చేయడం, సమతుల ఆహారం తీసుకోవడం, క్రమం తప్పకుండా వ్యాయామం చేయడం, దంతాలకు సంబంధించిన దీర్ఘకాల సమస్యలను నిర్లక్ష్యం చేయకుండా చికిత్స చేయించుకోవడం కూడా ఎంతో ముఖ్యం. నోటి క్యాన్సర్లో పెద్ద సవాలు ఆలస్యంగా నిర్ధారణ కావడమే. చాలామంది లక్షణాలు నెలల తరబడి ఉన్నా వాటిని పట్టించుకోరు. సమస్య తీవ్రమైన తర్వాతే ఆసుపత్రికి వెళ్లడం వల్ల చికిత్స క్లిష్టంగా మారే అవకాశం ఉంటుంది. అందువల్ల నోటిలో ఏదైనా అసాధారణ మార్పు రెండు వారాలకు మించి కొనసాగితే వెంటనే వైద్యులను సంప్రదించడం అత్యంత అవసరం. ప్రారంభ దశలో గుర్తిస్తే చికిత్స ఫలితాలు మెరుగ్గా ఉండటంతోపాటు పూర్తిగా కోలుకునే అవకాశాలు కూడా పెరుగుతాయని నిపుణులు చెబుతున్నారు.
