Curd for Health: చ‌లికాలమ‌ని పెరుగును దూరం పెడుతున్నారా.. అయితే ఇది తెలుసుకోవాల్సిందే..!

Curd for Health: సాధార‌ణంగా చాలామంది ఆహార‌పు అలవాట్ల‌లో పెరుగు ముఖ్యమైన‌దిగా మారిపోయింది. పెరుగును ఇష్ట‌ప‌డ‌ని వాళ్లు చాలా త‌క్కువ‌గా ఉంటారు. ఎక్కువ మందికి ఆహారం చివ‌ర‌లో కొంతైనా పెరుగ‌న్నం లేక‌పోతే భోజ‌నం చేసిన‌ట్టే ఉండ‌దు. ఇక

హైద‌రాబాద్‌: సాధార‌ణంగా చాలామంది ఆహార‌పు అలవాట్ల‌లో పెరుగు ముఖ్యమైన‌దిగా మారిపోయింది. పెరుగును ఇష్ట‌ప‌డ‌ని వాళ్లు చాలా త‌క్కువ‌గా ఉంటారు. ఎక్కువ మందికి ఆహారం చివ‌ర‌లో కొంతైనా పెరుగ‌న్నం లేక‌పోతే భోజ‌నం చేసిన‌ట్టే ఉండ‌దు. ఇక క‌మ్మ‌టి గడ్డ పెరుగు వేసుకుని తింటే ఆ మజానే వేరు. పెరుగుతో రుచికి రుచి, ఆరోగ్యానికి ఆరోగ్యం సొంత‌మ‌వుతాయి. మ‌రి ఇంత‌ ప్రాముఖ్య‌మున్న పెరుగును చ‌లికాలంలో చాలామంది దూరం పెడుతారు.

చలికాలంలో పెరుగు తింటే జలుబు, దగ్గు లాంటి శ్వాసకోశ సమస్యలు వస్తాయని ఆందోళ‌న చెందుతారు. అయితే, ఆరోగ్య నిపుణులు మాత్రం పెరుగుతో ఆరోగ్య స‌మ‌స్య‌లు వ‌స్తాయ‌నేది ఒట్టి అపోహేన‌ని చెబుతున్నారు. చ‌లికాలంలో అయినా పెరుగు తిన‌డంవ‌ల్ల ప్ర‌యోజ‌న‌మేత‌ప్ప ఎలాంటి న‌ష్టం లేద‌ని స్ప‌ష్టంచేస్తున్నారు. మ‌రి ఆ ఆరోగ్య‌ ప్ర‌యోజనాలేమిటో ఒక‌సారి తెలుసుకుందాం..

పెరుగుతో ఆరోగ్య‌ ప్ర‌యోజ‌నాలు..

• పెరుగు తిన‌డంవ‌ల్ల శరీరంలో రోగనిరోదకశక్తి పెరిగుతుంది. దాంతో మ‌న శ‌రీరం అనారోగ్య సమస్యలను చురుగ్గా ఎదుర్కొంటుంది.
• చాలామంది పెరుగువ‌ల్ల‌ జ‌లుబు, ద‌గ్గు లాంటి స‌మ‌స్య‌లు పెరుగుతాయ‌ని తిన‌డం మానేస్తారు. కానీ, అలాంటి స‌మ‌స్య‌లు త‌గ్గ‌డానికి పెరుగే సరైన ఔషధామని నిపుణులు చెబుతున్నారు.
• చలికాలంలో కొంత‌మందిని మ‌ల‌బ‌ద్ద‌కం స‌మ‌స్య వేధిస్తుంటుంది. పెరుగులో ఉన్న పోషకాలు ఆ మలబద్దకం స‌మ‌స్య నుంచి ఉప‌శ‌మ‌నం క‌లిగిస్తాయి.
• పెరుగులో కాల్షియం ఉంటుంది. దీనివ‌ల్ల శరీరంలోని కండరాలకు బ‌లం చేకూరుతుంది. అంతేగాక ఎముకలు పెళుసుబారకుండా దృఢంగా ఉంటాయి. దంత సమస్యలు కూడా దూరమవుతాయి.
• పెరుగును క్ర‌మం త‌ప్ప‌కుండా ఆహారంలో తీసుకోవ‌డంవ‌ల్ల రక్తంలో కొవ్వు స్థాయిలు క్రమంగా తగ్గుతాయి. దీనివల్ల హార్ట్ అటాక్ వంటి సమస్యలు వ‌చ్చే అవ‌కాశం త‌గ్గుతుంది. రక్తపోటును కూడా పెరుగు కంట్రోల్ చేస్తుంది.

అస్త‌మా బాధితులు త‌స్మాత్ జాగ్ర‌త్త‌..

• అయితే, అస్త‌మా స‌మ‌స్య‌ ఉన్నవారు మాత్రం పెరుగుతో కొంచెం జాగ్ర‌త్త‌గా ఉండాల‌ని నిపుణులు చెబుతున్నారు. వాళ్లు రాత్రిళ్లు పెరుగును అస‌లే ముట్టుకోవద్దని సూచిస్తున్నారు. రాత్రిళ్లు పెరుగు తింటే వారి సమస్య మరింత పెరుగుతుందని చెబుతున్నారు. కాబ‌ట్టి అస్త‌మా రోగులు పెరుగు విష‌యంలో చాలా జాగ్ర‌త్తగా ఉండాలంటున్నారు.