Psoriasis | సోరియాసిస్ అంటే ఏమిటి.. ఎలా వ‌స్తుంది.. ల‌క్ష‌ణాలు ఎలా ఉంటాయి..?

చర్మంపై తరచూ దురద రావడం, పొడిబారడం, ఎర్రని మచ్చలు ఏర్పడడం, మందపాటి పొలుసుల్లా చర్మం ఊడిపోవడం వంటి లక్షణాలను చాలామంది సాధారణ చర్మ సమస్యలుగా భావిస్తుంటారు. కొందరు వీటిని ఎగ్జిమా లేదా చుండ్రుగా పొరబడుతూ సొంత వైద్యం చేసుకుంటారు. అయితే ఇవి సోరియాసిస్‌ అనే దీర్ఘకాలిక వాపు సంబంధిత చర్మ వ్యాధి లక్షణాలు కూడా అవుతాయ‌ని నిపుణులు హెచ్చరిస్తున్నారు.

Psoriasis | చర్మంపై తరచూ దురద రావడం, పొడిబారడం, ఎర్రని మచ్చలు ఏర్పడడం, మందపాటి పొలుసుల్లా చర్మం ఊడిపోవడం వంటి లక్షణాలను చాలామంది సాధారణ చర్మ సమస్యలుగా భావిస్తుంటారు. కొందరు వీటిని ఎగ్జిమా లేదా చుండ్రుగా పొరబడుతూ సొంత వైద్యం చేసుకుంటారు. అయితే ఇవి సోరియాసిస్‌ అనే దీర్ఘకాలిక వాపు సంబంధిత చర్మ వ్యాధి లక్షణాలు కూడా అవుతాయ‌ని నిపుణులు హెచ్చరిస్తున్నారు. ఇది రోగనిరోధక వ్యవస్థలో వచ్చే మార్పుల వల్ల ఏర్పడే వ్యాధి. చర్మ కణాలు వేగంగా వృద్ధి చెందడం వల్ల చర్మంపై ఎర్రని మచ్చలు, మందపాటి పొలుసులు ఏర్పడతాయి. మోచేతులు, మోకాళ్లు, అరచేతులు, అరికాళ్లు, తల చర్మం, గోళ్లపై ఈ సమస్య కనిపించే అవ‌కాశం ఉంటుంది. కొందరిలో కీళ్ల వాపు, నొప్పి వంటి సమస్యలు కూడా త‌లెత్తుతాయి. దీనికి పూర్తిస్థాయి శాశ్వత నివారణ లేనప్పటికీ సరైన చికిత్సతో లక్షణాలను నియంత్రించుకోవచ్చు.

ల‌క్ష‌ణాలు ఎలా ఉంటాయి..

సోరియాసిస్‌కు వంశపారంపర్య కారణాలు కూడా ఉండే వీలు ఉంటుంది. కుటుంబంలో దగ్గరి బంధువులకు ఈ సమస్య ఉంటే ఇతరులకు వచ్చే అవకాశాలు పెరుగుతాయి. అయితే ప్రతి ఒక్కరికీ తప్పనిసరిగా వస్తుందని కాదు. ఎగ్జిమా కూడా దురద, పొడిబారడం, చర్మంపై వాపు వంటి లక్షణాలను కలిగిస్తుంది. కానీ ఈ రెండు వ్యాధుల వెనుక కారణాలు, లక్షణాలు వేర్వేరుగా ఉంటాయి. ముఖ్యంగా తలపై సోరియాసిస్‌ వచ్చినప్పుడు చాలామంది దానిని సాధారణ చుండ్రుగా భావించి యాంటీ డాండ్రఫ్‌ షాంపూలు వాడుతుంటారు. అయినప్పటికీ సమస్య తగ్గకపోతే చర్మ వైద్యులను సంప్రదించాలి. గోళ్లు మందంగా మారడం, రంగు మారడం, కీళ్ల నొప్పులు, వాపు వంటి లక్షణాలు కనిపించినా నిర్లక్ష్యం చేయకూడదు. సోరియాసిస్‌తో బాధపడేవారిలో కొందరికి మధుమేహం, అధిక రక్తపోటు, కొలెస్ట్రాల్‌ సమస్యలు వచ్చే ప్రమాదం కూడా ఎక్కువగా ఉంటుందని నిపుణులు చెబుతున్నారు.

కార‌ణాలు ఏమిటి..

మానసిక ఒత్తిడి, ధూమపానం, మద్యపానం వంటివి సోరియాసిస్‌ లక్షణాలను మరింత తీవ్రం చేస్తాయి. అలాగే కొన్ని ఇన్ఫెక్షన్లు, చర్మానికి గాయాలు కావడం, చల్లని వాతావరణం, కొన్ని మందులు కూడా సమస్యను పెంచే అవకాశం ఉంటుంది. చర్మంపై మచ్చలు, దురద కారణంగా ఆత్మవిశ్వాసం తగ్గడం, నిద్రలేమి, మానసిక ఒత్తిడి వంటి సమస్యలు ఎదురవుతాయి. మరోవైపు ఒత్తిడి పెరగడం వల్ల వ్యాధి లక్షణాలు మళ్లీ తీవ్రమవుతాయి. ఈ సమస్యను నియంత్రించుకోవడానికి క్రమం తప్పకుండా వ్యాయామం చేయడం, సమతుల ఆహారం తీసుకోవడం, ధూమపానానికి దూరంగా ఉండడం, మద్యపానాన్ని పరిమితం చేయడం అవసరం. చర్మం పొడిబారకుండా తరచూ మాయిశ్చరైజర్లు ఉపయోగించాలని నిపుణులు సూచిస్తున్నారు. సువాసనలు లేని మందపాటి క్రీములు, లేపనాలు చర్మంలోని తేమను కాపాడడానికి సహాయపడతాయి. స్నానం చేసిన తర్వాత మాయిశ్చరైజర్‌ రాయడం, మృదువైన శుభ్రపరిచే ఉత్పత్తులను ఉపయోగించడం మంచిది. వేడినీటితో స్నానం చేయడం, చర్మాన్ని గట్టిగా రుద్దడం, కఠినమైన సబ్బులు వాడడం మానుకోవాలి.

ఎలాంటి జాగ్ర‌త్త‌ల‌ను పాటించాలి..

సోరియాసిస్‌ లక్షణాలు ఉన్నవారు సొంతంగా ఇంటి చిట్కాలు ప్రయత్నించడం లేదా వైద్యుల సలహా లేకుండా మందులు, ముఖ్యంగా స్టెరాయిడ్‌ క్రీములు ఉపయోగించడం మంచిది కాదు. చర్మానికి చికాకు కలిగించే ఫేషియల్స్‌, కెమికల్‌ పీల్స్‌, బ్లీచింగ్‌, గట్టిగా స్క్రబ్‌ చేయడం వంటి సౌందర్య చికిత్సలకు దూరంగా ఉండాలి. గోళ్లను శుభ్రం చేసుకునేటప్పుడు వాటి చుట్టూ ఉన్న చర్మాన్ని గట్టిగా కత్తిరించడం లేదా వెనక్కి నెట్టడం కూడా నివారించాలి. మచ్చలు పదేపదే రావడం, తలపై పొలుసులు తగ్గకపోవడం, గోళ్లలో మార్పులు కనిపించడం, కీళ్ల నొప్పులు లేదా వాపు రావడం వంటి లక్షణాలు ఉంటే వెంటనే చర్మ వైద్యులను సంప్రదించాలి. సమస్య తీవ్రత, ప్రభావితమైన శరీర భాగాలను బట్టి మందులు, చర్మంపై రాసే ఔషధాలు, కాంతి చికిత్స లేదా శరీరమంతా పనిచేసే మందులను వైద్యులు సూచిస్తారు. సోరియాసిస్‌కు దీర్ఘకాలిక చికిత్స, నిరంతర పర్యవేక్షణ అవసరం. ముఖ్యంగా ఈ వ్యాధి ఒకరి నుంచి మరొకరికి వ్యాపించదనే విషయాన్ని గుర్తుంచుకోవాలి. సరైన సమయంలో గుర్తించి తగిన చికిత్స తీసుకుంటే సాధారణ జీవితాన్ని కొనసాగించవచ్చ‌ని నిపుణులు చెబుతున్నారు.