Visit:
డయేరియా, డీసెంట్రీ, గ్యాస్ట్రోంటరైటస్ వంటి వ్యాధుల్ని అరికట్టే గుణం జామకాయలు, పండ్లలో ఉంది. మలబద్దక సమస్య ఉన్న వారికి ఇది మంచి మందుగా పనిచేస్తుంది. ఈ కాయల్లోని పీచు కారణంగా కొలెస్ట్రాల్, బీపీ తగ్గుతాయి.
ఎరుపు, తెలుపు రంగు గుజ్జుతో ఉండే జామను ఇష్టపడని వారు ఉండరు. వగరు, పులుపుతో కూడిన తియ్యని రుచి కలిగిన జామ ఈ సీజన్‌లో ఎక్కువగా దొరుకుతాయి. పెరటి చెట్టుగా భావించే జామలో అనేక పోషకాలున్నాయి.
జామ పండ్లలో పీచు, విటమిన్- ఎ, విటమిన్ సి, ఫోలిక్ ఆమ్లాల శాతం చాలా ఎక్కువ. పొటాషియం, కాపర్, మాంగనీస్ వంటి ఖనిజాలు పుష్కలంగా లభిస్తాయి. కమలాపండులో దొరికే సి విటమిన్‌తో పోలిస్తే ఓ జామ పండులో దొరికే సి విటమిన్ శాతం నాలుగు రెట్లు ఎక్కువ.
బరువు తగ్గడానికి జామ దోహదపడుతుంది. ఇందులోని కార్బోహైడ్రేట్లు జీర్ణం కావడానికి సమయం పడుతుంది. దాంతో పొట్ట త్వరగా నిండిపోతుంది. ఆకలి వేయడానికి సమయం పడుతుంది. రోజూ ఓ దోర జామ పండు తింటే డయాబెటిస్, ప్రొస్టేట్ క్యాన్సర్ వంటి వ్యాధులు రాకుండా నివారించుకోవచ్చు.
బాగా జలుబు, దగ్గు ఉన్నప్పుడు జామ ఆకుల డికాక్షన్ తాగితే త్వరగా తగ్గుతుంది. జామకాయలు, ఆకుల్లో ఉండే యాస్ట్రింజెంట్లు చర్మానికి మంచి టానిక్‌లా పనిచేస్తాయి. వీటిని తినడం వల్ల చర్మం మెరుపును సంతరించుకుంటుంది.
పచ్చి జామకాయల జ్యూస్‌ను ఒంటికి పట్టిస్తే చర్మం శుభ్రపడి కాంతివంతమవుతుంది. పైగా వీటిల్లో పుష్కలంగా ఉండే యాంటీఆక్సిడెంట్ల వల్ల వృద్ధాప్య లక్షణాలు నెమ్మదిస్తాయి. వీటిలో ఉండే పీచు కారణంగా కొలెస్ట్రాల్, బీపీ తగ్గుతాయి.