Glaucoma Day | కంటిలో ఉత్పాతం.. సైలెంట్‌ క్లిల్లర్‌ గ్లకోమా..

శరీరంలో అతి ముఖ్యమైన సున్నితమైన భాగం కన్ను. మనకు దారి చూపే కంటిపై గ్లకోమా అనే వ్యాధి చడీచప్పుడు లేకుండా ‘కంటి దొంగ’లా చూపును దోచేస్తుంది. దీన్నే మనవాళ్లు నీటి కాసుల సమస్య అని కూడా అంటుంటారు. ఎలాంటి బాధలు లేకుండా, పైకేమీ అనుమానం రానీయకుండా మన చూపును క్రమంగా తగ్గిస్తుంది. నీటికాసుల వ్యాధిపై అవగాహన కలిగించేందుకు ఏటా మార్చి 12 వ తేదీన ప్రపంచ గ్లకోమా దినం నిర్వహిస్తున్నారు.

గ్లకోమా ప్రారంభమైనపుడు పాక్షికంగా దృష్టిలోపం కలుగుతుంది. దానిని నిర్లక్ష్యం చేసి, సరైన చికిత్స తీసుకోకపోతే కొన్నాళ్లకు పూర్తిగా కంటిచూపు పోతుంది. పిల్లల నుంచి పెద్దల వరకు ఏ వయసు వారికైనా గ్లకోమా రావచ్చు. కొందరు పిల్లల్లో ఇది పుట్టుకతోనే ఉంటుంది. అనువంశికంగా కూడా వస్తుంది. హ్రస్వదృష్టి ఉండేవారిలో గ్లకోమా రావచ్చు. ముఖానికి స్టెరాయిడ్‌ పూత మందులు రాసుకునే వారిలో కూడా గ్లకోమా వచ్చే అవకాశాలు ఉన్నాయి.

లక్షణాలు కనిపించవు..

ప్రారంభంలో గ్లకోమాకు ఎటువంటి భయపెట్టే లక్షణాలూ కనిపించవు. ఈ వ్యాధికి తొలి లక్షణం పక్కచూపు మందగించడం. అయితే దీన్ని గుర్తించేసరికే వ్యాధి తీవ్రమైపోతుంది. కంటి నరాల్లో ఒత్తిడి తీవ్ర స్థాయిలో ఉన్నప్పుడు హఠాత్తుగా కన్నునొప్పి రావడం, తలనొప్పి రావడం, చూపు మసకబారడం, కాంతి చుట్టూ వలయాలుగా కనిపించడం వంటి లక్షణాలు కనిపిస్తాయి. కంట్లో అసౌకర్యం కలగకపోవడం వంటి కారణాల వల్ల గ్లకోమాను చివరి దశ వరకూ గుర్తించలేరు. కొంచెం అప్రమత్తతతో కళ్లను ఎప్పటికప్పుడు పరీక్షించుకుంటూ గ్లకోమాను తొలి దశలోనే కనిపెట్టే ప్రయత్నం చేయాలి.

• వెలుగుతున్న బల్బ్‌ను చూసినప్పుడు వాటి చుట్టూ రంగులు కనిపించటం
• తల బరువుగా ఉండటం
• చీకటిపడే సమయంలో కంట్లోని యాంగిల్‌ మూసుకుపోయి కంట్లో ఒత్తిడి పెరుగుతుండటం
• కంట్లో ఒత్తిడి పెరిగిపోయినప్పుడు కన్ను ఎరుపెక్కి, రెప్పలు వాచిపోయి విపరీతమైన నొప్పి రావడం
• కంటి చూపు విస్తారం క్రమేపీ తగ్గుతుంది. కొంతకాలానికి పూర్తిగా కుదించుకుపోయి దృష్టి పోతుంది.
• ఒక కన్ను మూసి రెండో కన్ను తెరచి చూసినప్పుడు మార్పు స్పష్టంగా తెలుస్తుంది.
  ఇలా కళ్లను పరీక్షించుకోవడం ద్వారా గ్లకోమాను ప్రారంభ దశలోనే గుర్తించవచ్చు. గ్లకోమా వ్యాధి వచ్చే అవకాశాలు వయసుతోపాటు పెరుగుతాయి. కాబట్టి 40 ఏళ్లు దాటిన ప్రతి ఒక్కరూ కంటి వైద్యుల్ని సంప్రదించి గ్లకోమా చెకప్‌ చేయించుకుంటూ ఉండాలి.

ఈ జాగ్రత్తలు తీసుకోవాలి..

• గ్లకోమాను నియంత్రించే అవకాశాలు లేకపోయినా కొన్ని జాగ్రత్తలు తప్పనిసరిగా తీసుకోవాలి.
• వంశపారంపర్యంగా గ్లకోమా వచ్చే అవకాశం ఉన్నందున క్రమం తప్పక కంటి పరీక్షలు చేయించుకోవాలి.
• స్టెరాయిడ్స్‌ వాడకం పూర్తిగా తగ్గించాలి.
• ప్రతీ చిన్న రుగ్మతకు స్టెరాయిడ్‌ చుక్కల మందులు వాడకూడదు.
• రక్తపోటు, హైపర్‌ టెన్షన్‌లను అదుపులో ఉండేలా చూసుకోవాలి.
• మధుమేహులు చక్కెర స్థాయిల్ని అదుపులో ఉంచుకోవాలి.
• కళ్లకు దెబ్బలు తగలకుండా కాపాడుకోవాలి.
• టపాసులు కాల్చేటప్పుడు నిప్పురవ్వలు కంట్లో పడకుండా చూసుకోవాలి.
• కంట్లో ఒత్తిడి తగ్గేందుకు యోగా, వ్యాయామాలు చేయాలి.