Visit:
Egg Poha | ఉదయం అల్పాహారం రోజంతా శక్తివంతంగా ఉండేందుకు ఎంతో ముఖ్యమైనది. అయితే బిజీ జీవితంలో చాలా మంది త్వరగా తయారయ్యే, పోషకాలు తక్కువగా ఉన్న ఆహారాన్ని ఎంచుకుంటున్నారు. అలాంటి సమయంలో తక్కువ సమయంలో తయారయ్యే, రుచికరమైన, ప్రోటీన్ సమృద్ధిగా ఉండే ఎగ్ పోహా మంచి ఎంపికగా నిపుణులు సూచిస్తున్నారు. సాధారణ పోహాలో గుడ్లు కలపడం వల్ల ఇది మరింత పోషకవంతమైన బ్రేక్ఫాస్ట్గా మారుతుంది. సాధారణంగా పోహా దేశంలోని అనేక రాష్ట్రాల్లో ప్రసిద్ధి చెందిన అల్పాహారం. ముఖ్యంగా మహారాష్ట్రలో ఇది సంప్రదాయ వంటకం. తక్కువ కేలరీలు, అధిక ఫైబర్ ఉండటం వల్ల బరువు తగ్గాలనుకునే వారికి ఇది అనుకూలంగా ఉంటుంది. జీర్ణక్రియకు సులభంగా ఉండటంతో పాటు ఎక్కువసేపు ఆకలి వేయకుండా సహాయపడుతుంది.
ఇక గుడ్లు ప్రోటీన్కు మంచి వనరు. పోహాలో గుడ్లు కలపడం ద్వారా ఈ అల్పాహారం మరింత బ్యాలెన్స్డ్ మీల్గా మారుతుంది. అధిక ప్రోటీన్ కారణంగా ఎక్కువసేపు పొట్ట నిండిన భావన కలిగి, మధ్యలో జంక్ ఫుడ్ తినాలనే కోరిక తగ్గుతుంది. ఇది బరువు నియంత్రణకు కూడా ఉపయోగపడుతుంది. ఈ వంటకం తయారీ చాలా సులభం. ఆవాలు, కరివేపాకు, ఉల్లిపాయ, టమాటాతో తాలింపు తయారు చేసి, అందులో గుడ్లు వేసి బాగా కలపాలి. తర్వాత నానబెట్టిన పోహా కలిపి కొన్ని నిమిషాలు వండితే సరిపోతుంది. చివరగా కొత్తిమీర, నిమ్మరసం కలిపితే రుచికరమైన ఎగ్ పోహా సిద్ధమవుతుంది.
గుడ్లు – 2, పోహా – 1 కప్పు, ఉల్లిపాయ – 1 (సన్నగా తరిగినది), టమాటా – 1 (సన్నగా తరిగినది), పచ్చిమిర్చి – 2, నూనె లేదా నెయ్యి – 1 టేబుల్ స్పూన్, కరివేపాకు – 7 నుంచి 8, ఆవాలు – అర టీస్పూన్, పసుపు – అర టీస్పూన్, కారం – అర టీస్పూన్, ఉప్పు – తగినంత, కొత్తిమీర – 2 టేబుల్ స్పూన్లు, నిమ్మరసం – 2 టేబుల్ స్పూన్లు తీసుకోవాలి. ముందుగా పోహాని నానబెట్టాలి. పోహాను నీటిలో కడిగి 5 నిమిషాలు పక్కన పెట్టాలి. తరువాత తాలింపు తయారు చేసుకోవాలి. దీని కోసం పాన్లో నూనె లేదా నెయ్యి వేడి చేసి ఆవాలు, కరివేపాకు వేయాలి. తర్వాత ఉల్లిపాయ, పచ్చిమిర్చి వేసి 2 నిమిషాలు వేయించాలి. తాలింపు వేగిన తరువాత టమాటా వేసి మెత్తబడే వరకు వండాలి. తర్వాత పసుపు, కారం, ఉప్పు కలపాలి. తరువాత గుడ్లను నేరుగా పాన్లో పగలగొట్టి బాగా స్క్రాంబుల్ చేయాలి. గుడ్లు పూర్తిగా ఉడికే వరకు కలుపుతూ వండాలి. గుడ్డు వేగిన తరువాత నానబెట్టిన పోహా వేసి గుడ్ల మిశ్రమంతో బాగా కలపాలి. చివరగా కొత్తిమీర, నిమ్మరసం, వేయించిన పల్లీలు కలిపి తక్కువ మంటపై కొన్ని సెకన్లు ఉంచి దించాలి. ఇలా చేయడం వల్ల ఎగ్ పోహా తయారవుతుంది.
అయితే పోహాలో గుడ్లకు బదులుగా పనీర్ లేదా టోఫూ ఉపయోగించవచ్చు. క్యారెట్, బీన్స్, క్యాప్సికం వంటి కూరగాయలు కలిపితే మరింత పోషకవంతమవుతుంది. పల్లీలు ముందుగానే వేయించి చూర్ణం చేసి కలుపుకోవడం వల్ల మంచి రుచి వస్తుంది. తక్కువ సమయంలో తయారయ్యే ఎగ్ పోహా రుచికరమైనదే కాకుండా ఆరోగ్యకరమైన అల్పాహారంగా కూడా నిలుస్తుంది. ప్రోటీన్, ఫైబర్ సమృద్ధిగా ఉండటం వల్ల శరీరానికి శక్తినిచ్చి ఎక్కువసేపు తృప్తిగా ఉంచుతుంది. బిజీ ఉదయాల్లో త్వరగా తయారయ్యే ఈ వంటకం ఆరోగ్యంపై శ్రద్ధ పెట్టేవారికి మంచి ఎంపికగా చెప్పవచ్చు.
