గర్భధారణ సమయంలో మధుమేహం వస్తే..

ఆహారం-ఆరోగ్యం
మధుమేహం.. కొంత మందికి గర్భధారణ సమయంలోనూ వస్తుంది. దీనివల్ల తల్లీబిడ్డలకు ఇబ్బందే. ఈ పరిస్థితి భారతీయ మహిళల్లోనే ఎక్కువని అంతర్జాతీయ అధ్యయనాల్లో తేలింది. కొన్ని జాగ్రత్తలతో ఆ సమస్యను నియంత్రించవచ్చు.

• గర్భధారణ సమయంలో తల్లికి మధుమేహం వస్తే, ఆరునెలల నుంచి ఏడాది వరకు తరచూ బిడ్డకూ మధుమేహ పరీక్షలు చేయించాలి. తర్వాత ఏడాదికోసారి చేయించినా ఫర్వాలేదు.
• తల్లిపాలు పట్టడం ద్వారా బిడ్డకు టైప్‌-2 డయాబెటిస్‌ రాకుండా కొంతమేర నివారించవచ్చు.
• మధుమేహ మహిళలు మరోసారి, గర్భం దాల్చాలని అనుకున్నప్పుడు వైద్యులను సంప్రదించాలి.
• గర్భధారణ సమయంలో సాధారణంగా లావు అవుతారు. కాన్పు జరిగిన ఆరు నెలల నుంచి ఏడాదిలోపే మునుపటి బరువుకు చేరుకోవడం మంచిది.
• ఆరోగ్యకరమైన ఆహారపు అలవాట్లను అలవర్చు కోవాలి. పండ్లు, కూర గాయలు, చేపలు, డ్రై బీన్స్‌, పొట్టుతీయని ధాన్యం, కొవ్వు తక్కువగా ఉన్న పాలు తీసుకోవాలి. నీళ్లు ఎక్కువగా తాగాలి.
• ఎక్కువసార్లు తక్కువ మోతాదులో ఆహారం తీసుకోవాలి.
• వారానికి ఐదురోజులు, రోజూ కనీసం అరగంటసేపు వ్యాయామం చేయాలి. దానివల్ల క్యాలరీలు కరిగి, బరువు తగ్గుతారు.
• పిల్లలకు కూడా బాల్యం నుంచే మంచి ఆహారపు అలవాట్లను పరిచయం చేయాలి. రోజూ ఓ గంటసేపు శారీరక శ్రమ కలిగే ఆటలు ఆడించాలి.
• కుటుంబ సభ్యులంతా ఆరోగ్యకర జీవన శైలికి మారిపోవాలి. ఇంటిల్లి పాదీ పోషకాలతో కూడిన ఆహారం తీసుకునేలా; వయసు-ఎత్తు నిష్పత్తికి సరిపడా బరువు కలిగి ఉండేలా జాగ్రత్త పడాలి.

టీవీ, కంప్యూటర్‌, స్మార్ట్‌ ఫోన్‌ మొదలైన వాటి ‘స్క్రీన్‌ టైమ్‌’ను రోజుకు ఒక గంటకు కుదిస్తే పిల్లల ఆరోగ్యం బాగుంటుంది.

మయూరి ఆవుల
న్యూట్రిషనిస్ట్‌
Mayuri@trudiet.in