Visit:
Environment | గుండె ఆరోగ్యానికి కొలెస్ట్రాల్‌, రక్తపోటు, రక్తంలో చక్కెర, ధూమపానం, అధిక బరువు వంటి అంశాలను ప్రధాన ప్రమాద కారకాలుగా పరిగణిస్తారు. అయితే మన చుట్టూ ఉన్న పర్యావరణం కూడా గుండె, రక్తనాళాల ఆరోగ్యంపై ప్రభావం చూపుతుందని నిపుణులు చెబుతున్నారు. మనం పీల్చే గాలి, పాత పైపుల ద్వారా వచ్చే నీరు, చుట్టుపక్కల ఉండే అధిక శబ్దం, తీవ్రమైన వేడి వంటి అంశాలు కూడా దీర్ఘకాలంలో గుండె ఆరోగ్యాన్ని ప్రభావితం చేస్తాయి. ఉదాహరణకు కొలెస్ట్రాల్‌, రక్తపోటు నియంత్రణలో ఉన్నప్పటికీ, ఏళ్ల తరబడి రద్దీగా ఉండే రహదారి పక్కన లేదా పారిశ్రామిక కాలుష్యం ఎక్కువగా ఉన్న ప్రాంతంలో నివసించే వ్యక్తికి పర్యావరణం కారణంగా అదనపు గుండె సంబంధిత ప్రమాదం ఉండే అవకాశం ఉంటుంది. అందువల్ల గుండె జబ్బుల నివారణలో వ్యక్తిగత ఆరోగ్య పరీక్షలతోపాటు పర్యావరణ ప్రభావాలను కూడా పరిగణనలోకి తీసుకోవాల్సిన అవసరం ఉంది.
వాయు కాలుష్యం శ్వాసకోశ సమస్యలకు మాత్రమే కారణమవుతుందని చాలామంది భావిస్తారు. కానీ దాని ప్రభావం గుండె, రక్తనాళాలపైనా ఉంటుంది. గాలిలోని సూక్ష్మ ధూళి కణాలు ఊపిరితిత్తుల్లోకి లోతుగా చేరి వాపును పెంచడంతో పాటు రక్తనాళాల పనితీరులో మార్పులు, రక్తం గడ్డకట్టే అవకాశాన్ని పెంచుతాయి. దీర్ఘకాలం కాలుష్యానికి గురికావడం గుండెపోటు, పక్షవాతం వంటి గుండె సంబంధిత సమస్యలతో ముడిపడి ఉందని అధ్యయనాలు సూచిస్తున్నాయి. 2019లో యూరోపియన్‌ హార్ట్‌ జర్నల్‌లో ప్రచురితమైన అధ్యయనం ప్రకారం, ప్రపంచవ్యాప్తంగా ప్రతి ఏడాది వాయు కాలుష్యంతో సంబంధం ఉన్న సుమారు 88 లక్షల అదనపు మరణాలు సంభవిస్తున్నట్లు అంచనా వేశారు. వీటిలో గుండె, రక్తనాళాల వ్యాధుల వాటా గణనీయంగా ఉన్నట్లు పరిశోధకులు తెలిపారు. వ్యక్తిగతంగా ధూమపానం మానేయడం లేదా రక్తపోటును మందులతో నియంత్రించడం సాధ్యమే అయినా, నివాసం లేదా పనిచేసే ప్రాంతంలోని గాలి నాణ్యతను ఒక్క వ్యక్తి మార్చలేడు. అందుకే వాహనాల ఉద్గారాలు, పారిశ్రామిక కాలుష్యం, పట్టణ ప్రణాళిక, గాలి నాణ్యత ప్రమాణాలపై సమిష్టి చర్యలు అవసరం.
పర్యావరణంలో ఉండే సీసం, అధిక శబ్దం, తీవ్రమైన వేడి కూడా గుండె ఆరోగ్యానికి సంబంధించిన ప్రమాదాలను పెంచే అంశాలుగా మారుతున్నాయి. పాత ఇళ్లు, కలుషితమైన నేల, పాత నీటి పైపుల ద్వారా సీసానికి గురయ్యే అవకాశం ఉంటుంది. ది లాన్సెట్‌ పబ్లిక్‌ హెల్త్‌లో ప్రచురితమైన ఒక అధ్యయనంలో 14,289 మంది అమెరికా పెద్దలను 19 సంవత్సరాలకు పైగా పరిశీలించగా, తక్కువ స్థాయి సీసం ప్రభావం కూడా గుండె సంబంధిత మరణాలతో సంబంధం ఉన్నట్లు పరిశోధకులు అంచనా వేశారు. మరోవైపు రహదారులు, విమానాశ్రయాలు, రైల్వే మార్గాల నుంచి వచ్చే నిరంతర శబ్దం నిద్రకు ఆటంకం కలిగించి శరీరంలో ఒత్తిడి ప్రతిస్పందనను పదేపదే ప్రేరేపిస్తాయి. దీంతో రక్తపోటు, రక్తనాళాల పనితీరులో మార్పులు వచ్చే అవకాశం ఉంది. తీవ్రమైన వేడి సమయంలో శరీర ఉష్ణోగ్రతను నియంత్రించేందుకు గుండె ఎక్కువగా పనిచేయాల్సి వస్తుంది. వృద్ధులు, ఇప్పటికే గుండె జబ్బులు ఉన్నవారు ఇలాంటి పరిస్థితుల్లో మరింత జాగ్రత్తగా ఉండాలి. అడవుల్లో మంటల నుంచి వచ్చే పొగలోని సూక్ష్మ కణాలు కూడా దూర ప్రాంతాలకు చేరి గుండె, శ్వాసకోశ సమస్యలు ఉన్నవారిపై అదనపు ప్రభావం చూపిస్తాయి.
గుండె జబ్బుల నివారణలో పర్యావరణ అంశాలను కూడా భాగం చేయాల్సిన అవసరం ఉందని నిపుణులు సూచిస్తున్నారు. వైద్యులు సాధారణంగా ధూమపానం, ఆహారం, వ్యాయామం, కుటుంబ చరిత్ర, మందుల వినియోగం వంటి అంశాలను పరిశీలిస్తారు. ఇకపై రద్దీగా ఉండే రహదారులు లేదా పారిశ్రామిక ప్రాంతాలకు సమీపంలో నివసిస్తున్నా, ఇంటి వయసు, పరిస్థితి ఎలా ఉంది, నీటి నాణ్యత ఎలా ఉంది, పని ప్రదేశంలో లోహాలు లేదా రసాయనాల ప్రభావం ఉందా, ట్రాఫిక్‌ లేదా విమానాల శబ్దానికి తరచూ గురవుతున్నారా వంటి విషయాలను కూడా తెలుసుకోవడం ఉపయోగకరంగా ఉంటుంది. అయితే పర్యావరణ ప్రమాదాలను కేవలం మందులతో నియంత్రించడం సాధ్యం కాదు. పరిశుభ్రమైన రవాణా వ్యవస్థలు, సీసం పైపుల మార్పు, పారిశ్రామిక ఉద్గారాల నియంత్రణ, ట్రాఫిక్‌, అధిక శబ్దాన్ని తగ్గించే చర్యలు ప్రజల ఆరోగ్యాన్ని మెరుగుపరచడంలో సహాయపడతాయి. కొలెస్ట్రాల్‌, రక్తపోటు వంటి కొలతలు గుండె ప్రమాదాన్ని అంచనా వేయడంలో ఎప్పటికీ ముఖ్యమే. అయితే ఒక రక్తపరీక్ష లేదా వైద్యుడి వద్ద తీసిన ఒక్క రక్తపోటు కొలతతోనే మొత్తం గుండె ఆరోగ్యాన్ని అంచనా వేయలేం. ఏళ్ల తరబడి కాలుష్య గాలి, సీసం, అధిక శబ్దం, తీవ్రమైన వేడి వంటి పర్యావరణ ప్రభావాలకు గురికావడం కూడా గుండె జబ్బుల ప్రమాదాన్ని ప్రభావితం చేస్తుంద‌ని నిపుణులు చెబుతున్నారు.
