Brain Activeness | మీ మెద‌డు ఎల్ల‌ప్పుడూ యాక్టివ్‌గా ఉండాల‌న్నా.. చురుగ్గా ప‌నిచేయాలన్నా.. వీటిని పాటించండి..!

కంప్యూట‌ర్‌కు హార్డ్ డిస్క్ ఎలాగో మ‌న శ‌రీరానికి మెద‌డు అలాగ ప‌నిచేస్తుంద‌ని వైద్య నిపుణులు చెబుతుంటారు. అయితే వాస్త‌వానికి కంప్యూట‌ర్ హార్డ్ డిస్క్ క‌న్నా మెద‌డు ఇంకా ఎక్కువ ప‌నుల‌నే నిర్వ‌హిస్తుంది.

Brain Activeness | కంప్యూట‌ర్‌కు హార్డ్ డిస్క్ ఎలాగో మ‌న శ‌రీరానికి మెద‌డు అలాగ ప‌నిచేస్తుంద‌ని వైద్య నిపుణులు చెబుతుంటారు. అయితే వాస్త‌వానికి కంప్యూట‌ర్ హార్డ్ డిస్క్ క‌న్నా మెద‌డు ఇంకా ఎక్కువ ప‌నుల‌నే నిర్వ‌హిస్తుంది. కేవ‌లం మెమొరీ స్టోరేజ్ కోసం మాత్ర‌మే కాదు, భావోద్వేగాల‌ను నియంత్రించ‌డానికి, ఆలోచ‌నా శ‌క్తికి, చ‌ర్య‌లు, ప్ర‌తిచ‌ర్య‌ల‌కు ఇలా అనేక ర‌కాల క్రియ‌ల‌ను నిర్వ‌హించేందుకు మెద‌డు నిరంత‌రం ప‌ని చేస్తూనే ఉంటుంది. అయితే మెద‌డు యాక్టివ్‌గా ఉండే విధానాన్ని బ‌ట్టి వ్య‌క్తి తెలివితేట‌లు, ప్ర‌తిభాపాట‌వాలు మారుతాయి. కొంద‌రి మెద‌డు మ‌రీ అతి యాక్టివ్ గా ప‌నిచేస్తుంది. అలాంటి వారి మేథ‌స్సు అధికంగా ఉంటుంది. వారు అన్నింట్లోనూ రాణిస్తారు. ఇక మెద‌డు యాక్టివ్‌గా ఉండాల‌న్నా, తెలివితేట‌లు పెర‌గాల‌న్నా మ‌నం రోజూ కొన్ని ర‌కాల ప‌నుల‌ను చేయాల్సి ఉంటుంది. అలాగే ప‌లు ఆహారాల‌ను కూడా తీసుకోవాలి. దీని వ‌ల్ల మెద‌డును చురుగ్గా ప‌నిచేసేలా చేయ‌వ‌చ్చు.

ప‌జిల్స్‌, హాబీలు..

మెద‌డు చురుగ్గా ప‌నిచేయాలంటే రోజూ గ‌ణిత సంబంధ స‌మ‌స్య‌ల‌ను ప‌రిష్క‌రిస్తుండాలి. అలాగే ప‌జిల్స్ పూర్తి చేయాలి. మెద‌డుకు మేత పెట్టే ప్ర‌శ్న‌ల‌కు స‌మాధానాల‌ను రాబ‌ట్టాలి. ఈ విధంగా చేయ‌డం వ‌ల్ల మెద‌డు ప‌నితీరు మెరుగు ప‌డి యాక్టివ్ గా మారుతుంది. ఉత్తేజంగా ప‌నిచేస్తారు. అలాగే ఎవ‌రికి ఉన్న హాబీల‌ను రోజూ వారు పూర్తి చేయాలి. అంటే ఉదాహ‌ర‌ణ‌కు పెయింటింగ్‌, సంగీతం విన‌డం, పుస్త‌కాల‌ను చ‌ద‌వ‌డం, ప్ర‌కృతిలో గ‌డ‌ప‌డం వంటివ‌న్న‌మాట‌. ఈ హాబీల‌ను రోజూ పాటిస్తుంటే మెద‌డుకు ప్ర‌శాంత‌త ల‌భిస్తుంది. దీంతో మెద‌డు చురుగ్గా ప‌నిచేస్తుంది. ఇక మెద‌డు ఆరోగ్యంగా ఉండాలంటే రోజూ వీలైనంత సేపు వ్యాయామం చేయాల్సి ఉంటుంది. వ్యాయామం వ‌ల్ల శ‌రీరంలో ర‌క్త స‌ర‌ఫ‌రా మెరుగు ప‌డుతుంది. మెద‌డుకు ర‌క్తం స‌రిగ్గా స‌ర‌ఫ‌రా అవుతుంది. దీంతో మెద‌డు యాక్టివ్‌గా మారుతుంది. చురుగ్గా ప‌నిచేస్తారు.

క్యాల‌రీలు, వ్యాధులు..

ఇక నిత్యం మ‌న శ‌రీరానికి కావ‌ల్సిన ఆహారం మోతాదు క‌న్నా కాస్త త‌క్కువ మోతాదులో ఆహారాన్ని తినాలి. అంటే రోజూ ఒక వ్య‌క్తి సుమారుగా 2వేల క్యాల‌రీల శ‌క్తినిచ్చే ఆహారాన్ని తింటుంటే కాస్త త‌క్కువ‌గా.. అంటే.. సుమారుగా 1800 లేదా 1900 క్యాల‌రీల శ‌క్తినిచ్చే ఆహారాన్ని తినాల‌న్న‌మాట‌. దీని వ‌ల్ల కూడా మెద‌డు యాక్టివ్‌గా ఉంటుంద‌ని సైంటిస్టులు చేప‌ట్టిన అధ్య‌య‌నాల్లో తేలింది. దీని వ‌ల్ల మెద‌డు వ‌య‌స్సు త‌గ్గుతుంద‌ట‌. అంటే మెద‌డు కూడా య‌వ్వ‌నంగా ఉంటుంద‌ని చెబుతున్నారు. ఇక ప్ర‌స్తుతం చాలా మంది హైబీపీ, డ‌యాబెటిస్ వంటి వ్యాధుల‌తో బాధ‌ప‌డుతున్నారు. కానీ ఈ వ్యాధుల‌ను నియంత్ర‌ణ‌లో ఉంచుకుంటే లేదా రాకుండా చూసుకుంటే అలాంటి వారి మెద‌డు కూడా యాక్టివ్‌గా ఉంటుంద‌ని ప‌రిశోధ‌కులు చెబుతున్నారు.

ఆహారాలు..

మ‌ద్యం సేవించ‌డం, పొగ తాగ‌డం మాన‌డం వ‌ల్ల కూడా మెద‌డు యాక్టివ్‌నెస్ పెరుగుతుంది. మెద‌డు చురుగ్గా ప‌నిచేస్తుంది. మెద‌డు చురుగ్గా ఉండాలంటే మ‌న‌స్సును ఎల్ల‌ప్పుడూ ప్ర‌శాంతంగా ఉండేలా చూసుకోవాలి. కోపం ప‌నికిరాదు. దీని వ‌ల్ల మెద‌డు ఆరోగ్యంగా ఉండ‌డ‌మే కాదు, జ్ఞాప‌క‌శ‌క్తి, ఏకాగ్ర‌త పెరుగుతాయి. ఇక నిత్యం త‌గిన‌న్ని గంట‌ల‌పాటు నిద్రించ‌డం, త‌ల‌కు ఎలాంటి దెబ్బ‌లు లేదా గాయాలు త‌గ‌ల‌కుండా చూసుకోవ‌డం వంటి ప‌నుల వ‌ల్ల కూడా మెద‌డు చురుగ్గా ప‌నిచేస్తుంది. ఇక మెద‌డు ఆరోగ్యానికి ప‌లు ఆహారాలు కూడా దోహ‌దం చేస్తాయి. ఒమెగా 3 ఫ్యాటీ యాసిడ్లు ఉండే ఆహారాల‌ను తింటున్నా కూడా మెద‌డు ఆరోగ్యంగా ఉంటుంది. ముఖ్యంగా బాదంప‌ప్పు, జీడిపప్పు, వాల్ న‌ట్స్‌, పిస్తా, అవిసె గింజ‌లు, చియా విత్త‌నాలు, గుమ్మ‌డి విత్త‌నాలు, పొద్దు తిరుగుడు విత్త‌నాల‌తోపాటు గుడ్లు, చేప‌లు, ఆలివ్ ఆయిల్‌, మ‌ట‌న్ లివ‌ర్‌, అవ‌కాడో వంటి ఆహారాల‌ను తీసుకోవ‌డం ద్వారా మెద‌డు చురుగ్గా మారుతుంది. ఈ విధంగా మెద‌డు యాక్టివ్‌గా ఉండేందుకు గాను ఆయా ప‌నుల‌తోపాటు ఆయా ఆహారాలు కూడా ఎంత‌గానో దోహ‌దం చేస్తాయి.