Coffee Chia Yogurt Bowl | బ్రేక్‌ఫాస్ట్ లేదా స్నాక్స్‌లా ప‌నిచేసే అద్భుత‌మైన పోష‌కాహారం ఇది.. ఎలా త‌యారు చేయాలంటే..

ఉదయాన్నే తీసుకునే అల్పాహారం రోజంతా శరీరానికి అవసరమైన శక్తిని అందించడంలో కీలక పాత్ర పోషిస్తుంది. ప్రోటీన్, ఫైబర్, ఆరోగ్యకరమైన కొవ్వులు సమృద్ధిగా ఉండే బ్రేక్‌ఫాస్ట్ తీసుకోవడం వల్ల ఎక్కువసేపు ఆకలి వేయకుండా ఉండటంతోపాటు కండరాల ఆరోగ్యానికి కూడా మేలు చేస్తుంది.

Coffee Chia Yogurt Bowl | ఉదయాన్నే తీసుకునే అల్పాహారం రోజంతా శరీరానికి అవసరమైన శక్తిని అందించడంలో కీలక పాత్ర పోషిస్తుంది. ప్రోటీన్, ఫైబర్, ఆరోగ్యకరమైన కొవ్వులు సమృద్ధిగా ఉండే బ్రేక్‌ఫాస్ట్ తీసుకోవడం వల్ల ఎక్కువసేపు ఆకలి వేయకుండా ఉండటంతోపాటు కండరాల ఆరోగ్యానికి కూడా మేలు చేస్తుంది. అయితే బిజీ జీవితంలో చాలామంది అల్పాహారాన్ని వదిలేయడం లేదా పోషకాలు తక్కువగా ఉండే ఆహారాన్ని ఎంచుకుంటుంటారు. అలాంటి వారికి ముందురోజే సిద్ధం చేసుకునే కాఫీ చియా యోగర్ట్ బౌల్ మంచి ఎంపికగా ఉంటుంది. ఈ రెసిపీలో చియా గింజలు, గ్రీక్ యోగర్ట్, కాఫీ, ఖర్జూరాలు వంటి పోషకాలు అధికంగా ఉండే పదార్థాల‌ను ఉపయోగిస్తారు. ఇవి ప్రోటీన్, ఫైబర్‌తోపాటు శరీరానికి అవసరమైన శక్తిని అందించి ఎక్కువసేపు కడుపు నిండిన భావన కలిగిస్తాయి. అల్పాహారంగా మాత్రమే కాకుండా ఆరోగ్యకరమైన డెజర్ట్‌గా కూడా దీన్ని తీసుకోవచ్చు.

ఏమేం కావాలి..

ఈ రెసిపీ తయారు చేయడానికి కాఫీ చియా పుడ్డింగ్ కోసం 2 టేబుల్ స్పూన్ల (20 గ్రాములు) చియా గింజలు, 1 టీస్పూన్ ఇన్‌స్టంట్ బ్లాక్ కాఫీ లేదా కప్పుచినో పౌడర్, 2 నిండుగా టేబుల్ స్పూన్ల (90 గ్రాములు) హై ప్రోటీన్ గ్రీక్ యోగర్ట్ అవసరం. క్యారమలైజ్డ్ ఖర్జూరాల కోసం 1 టేబుల్ స్పూన్ (10 గ్రాములు) తేనె, 1 టీస్పూన్ వెన్న, గింజలు తీసిన 2 ఖర్జూరాలు తీసుకోవాలి. అలాగే యోగర్ట్ బౌల్ కోసం 4 నిండుగా టేబుల్ స్పూన్ల (180 గ్రాములు) హై ప్రోటీన్ గ్రీక్ యోగర్ట్, ముందుగా సిద్ధం చేసిన 1 టేబుల్ స్పూన్ కాఫీ చియా పుడ్డింగ్, క్యారమలైజ్డ్ ఖర్జూరాలు, 10 గ్రాముల డార్క్ చాక్లెట్ తురుము సిద్ధంగా ఉంచుకోవాలి. ముందుగా ఒక చిన్న గిన్నెలో చియా గింజలు, ఇన్‌స్టంట్ కాఫీ పొడి, రెండు టేబుల్ స్పూన్ల గ్రీక్ యోగర్ట్ వేసి బాగా కలపాలి. కాఫీ పూర్తిగా కలిసేలా చేసి, మూతపెట్టి కనీసం రెండు గంటలు లేదా రాత్రంతా ఫ్రిజ్‌లో ఉంచాలి. దీంతో చియా గింజలు విస్త‌రించి పుడ్డింగ్‌లా తయారవుతాయి.

ఎలా చేయాలి..

తర్వాత ఒక నాన్‌స్టిక్ పాన్‌లో తేనె, వెన్న వేసి వేడి చేయాలి. అందులో గింజలు తీసిన ఖర్జూరాలను వేసి సుమారు ఐదు నిమిషాలు రెండు వైపులా తిప్పుతూ వేయించాలి. అవి మెత్తగా మారి తేనె పాకం పూతలా పట్టే వరకు ఉడికించాలి. ఇప్పుడు ఒక సర్వింగ్ బౌల్‌లో మిగిలిన గ్రీక్ యోగర్ట్ వేసి, దానిపై ఒక టేబుల్ స్పూన్ కాఫీ చియా పుడ్డింగ్‌ను వేసి స్వల్పంగా కలపాలి. అనంతరం వేడిగా ఉన్న క్యారమలైజ్డ్ ఖర్జూరాలను యోగర్ట్‌పై అమర్చి, పై నుంచి డార్క్ చాక్లెట్ తురుము చల్లాలి. ఖర్జూరాల వేడి వల్ల చాక్లెట్ కొద్దిగా కరిగి మరింత రుచిని అందిస్తుంది. ఈ కాఫీ చియా యోగర్ట్ బౌల్‌ను ఉదయం అల్పాహారంగా, సాయంత్రం ఆరోగ్యకరమైన స్నాక్‌గా లేదా తీపి తినాలనిపించినప్పుడు పోషకవిలువలతో కూడిన డెజర్ట్‌గా ఆస్వాదించవచ్చు.