Visit:
Alzheimer’s | వయసు పెరుగుతున్న కొద్దీ జ్ఞాపకశక్తి తగ్గడం, విషయాలను గుర్తుంచుకోవడంలో ఇబ్బంది పడడం సహజమేనని భావిస్తూ ఉంటారు. అయితే జ్ఞాపకశక్తి, ఆలోచనా సామర్థ్యం, రోజువారీ పనులను నిర్వహించే విధానంలో స్పష్టమైన మార్పులు కనిపిస్తే వాటిని వృద్ధాప్యంలో సహజంగా వచ్చే మార్పులుగా నిర్లక్ష్యం చేయకూడదని వైద్య నిపుణులు సూచిస్తున్నారు. దేశంలో వృద్ధుల్లో చిత్తవైకల్యం కేసులు పెరుగుతున్న నేపథ్యంలో ఈ మార్పులను తొలిదశలోనే గుర్తించి వైద్యుల సలహా తీసుకోవాల్సిన అవసరం ఉందని వారు చెబుతున్నారు. ప్రస్తుతం భారత్లో 60 ఏళ్లు పైబడిన వారిలో సుమారు 88 లక్షల మంది చిత్తవైకల్యంతో జీవిస్తున్నట్లు అంచనా. ఈ సంఖ్య 2036 నాటికి దాదాపు 1.69 కోట్లకు చేరుకునే అవకాశం ఉందని నిపుణులు పేర్కొన్నారు.
చిత్తవైకల్యం కేసుల్లో ఎక్కువ భాగం అల్జీమర్స్ వ్యాధికి సంబంధించినవే. ఇది మెదడులోని నాడీకణాలను క్రమంగా దెబ్బతీసే ప్రగతిశీల నాడీ సంబంధిత వ్యాధి. జ్ఞాపకశక్తి తగ్గడం మాత్రమే కాకుండా ఆలోచించడం, మాట్లాడడం, నిర్ణయాలు తీసుకోవడం, స్వతంత్రంగా రోజువారీ పనులు చేసుకోవడం వంటి సామర్థ్యాలపై కూడా దీని ప్రభావం పడుతుంది. అల్జీమర్స్ లక్షణాలు బయటకు కనిపించడానికి చాలా సంవత్సరాల ముందే మెదడులో మార్పులు ప్రారంభమయ్యే అవకాశం ఉందని వైద్య నిపుణులు చెబుతున్నారు. ముఖ్యంగా మెదడులో అమైలాయిడ్ అనే ప్రొటీన్ అసాధారణంగా పేరుకుపోవడం వంటి మార్పులు సాధారణ లక్షణాలు కనిపించడానికి సుమారు 20 ఏళ్ల ముందే ప్రారంభమయ్యే అవకాశం ఉందని పేర్కొన్నారు.
ప్రారంభ దశలోనే వ్యాధి లక్షణాలను గుర్తించడం ద్వారా బాధితులు, వారి కుటుంబ సభ్యులు పరిస్థితిని మెరుగ్గా అర్థం చేసుకోవడంతోపాటు భవిష్యత్తు సంరక్షణకు అవసరమైన ప్రణాళికలను రూపొందించుకోవచ్చు. చికిత్స, సంరక్షణ, అందుబాటులో ఉన్న సహాయక సేవల గురించి ముందుగానే తెలుసుకోవడం కూడా సాధ్యమవుతుంది. జ్ఞాపకశక్తిలో పదేపదే మార్పులు కనిపించడం, విషయాలను అర్థం చేసుకోవడంలో ఇబ్బంది, నిర్ణయాలు తీసుకోవడంలో సమస్యలు, సంభాషణలో మార్పులు లేదా రోజువారీ పనులను స్వతంత్రంగా చేసుకోవడంలో ఇబ్బంది వంటి మార్పులను గమనిస్తే వైద్యులను సంప్రదించడం అవసరమని నిపుణులు సూచిస్తున్నారు. ఇటువంటి లక్షణాలకు అనేక కారణాలు ఉండే అవకాశం ఉన్నందున వైద్యపరీక్షల ద్వారా అసలు కారణాన్ని గుర్తించడం ముఖ్యమని చెబుతున్నారు.
అల్జీమర్స్ వ్యాధి ఒక్క బాధితుడి జీవితాన్నే కాకుండా మొత్తం కుటుంబంపై ప్రభావం చూపే పరిస్థితి. అందువల్ల జ్ఞాపకశక్తి, ఆలోచనా సామర్థ్యం, రోజువారీ పనితీరులో వస్తున్న మార్పులపై కుటుంబ సభ్యులు కూడా శ్రద్ధ వహించాలి. వ్యాధి పెరుగుతున్న భారాన్ని ఎదుర్కోవాలంటే ప్రజల్లో అవగాహన పెంచడం, లక్షణాలను తొలిదశలోనే గుర్తించడం, సకాలంలో వైద్య నిపుణులను సంప్రదించడం అవసరమని నిపుణులు చెబుతున్నారు. కుటుంబ సభ్యుల అవసరాలు, అభిప్రాయాలు, భవిష్యత్తు సంరక్షణకు సంబంధించిన అంశాలపై ముందుగానే చర్చించుకోవడం ద్వారా పరిస్థితిని ఎదుర్కోవడానికి మెరుగైన ప్రణాళిక రూపొందించుకోవచ్చని నిపుణులు తెలియజేస్తున్నారు.
