Visit:
హిందువులు ఎన్నో ఏండ్లుగా ఎదురుచూస్తున్న మహోత్తర ఘట్టం సాక్షాత్కారం కాబోతున్నది. జనవరి 22వ తేదీన రామాలయంలో రామ్‌లల్లా ప్రాణ ప్రతిష్ఠ కార్యక్రమం జరగనుంది. ఈ క్రమంలో బాబ్రీ మసీదు నిర్మాణం నుంచి రామాలయ నిర్మాణం పూర్తయ్యే వరకు జరిగిన కీలక ఘట్టాల గురించి ఒకసారి తెలుసుకుందాం..
1528 బాబ్రీ మసీదును మొఘల్‌ చక్రవర్తి కమాండర్ మీర్‌ బాకీ నిర్మించారు.
1885.. అయోధ్య రామ జన్మభూమి వ్యవహారం తొలిసారిగా కోర్టుకు చేరింది. బాబ్రీ మసీదు పక్కనే రామ మందిరాన్ని నిర్మించేందుకు అనుమతి ఇవ్వాలని ఫైజాబాద్‌ కోర్టులో మహంత్‌ రఘువర్‌దాస్‌ అప్పీల్‌ దాఖలు చేశారు.
1949.. వివాదాస్పద నిర్మాణంలోని మధ్య గోపురం కింద రామ్‌ లల్లా విగ్రహం కనిపించింది. దీంతో స్థానికులు అక్కడ పూజలు చేయడం మొదలుపెట్టారు.
1950.. రామ్‌లల్లా విగ్రహం బయటపడిన ప్రాంతంలో విగ్రహాలు ఉంచి.. పూజలు చేసేందుకు అనుమతించాలని పరమహంస రామచంద్ర దాస్‌ ఫైజాబాద్‌ కోర్టులో కేసు వేశారు.
1959.. వివాదాస్పద స్థలాన్ని స్వాధీనం చేసుకుసేందుకు నిర్మోహి అఖారా కోర్టు మెట్లు ఎక్కింది.
1981.. ఆ ప్రాంతం తమకు అప్పగించాలని యూపీలోని సున్నీ వక్ఫ్‌ బోర్డు కేసు వేసింది.
1986.. హిందువులు పూజలు చేసేందుకు ఈ స్థలాన్ని తెరవాలని ఫిబ్రవరి 1వ తేదీన స్థానిక కోర్టు ఆదేశాలు జారీ చేసింది.
1989.. స్థానిక కోర్టు ఆదేశాలను కొనసాగించాలని అలహాబాద్‌ హైకోర్టు ఆగస్టు 14న తీర్పు ఇచ్చింది.
1992.. బాబ్రీ మసీద్‌ను డిసెంబర్‌ 6వ తేదీన కూల్చేశారు. ఈ ఘటనతో రామ మందిరం కోసం ఉద్యమం ఉధృతంగా మారింది.
2002.. వివాదాస్పద స్థలం యాజమాన్య హక్కుల అంశం అలహాబాద్‌ హైకోర్టుకు చేరింది. దీనిపై ఇదే సంవత్సరం ధర్మాసనం విచారణ ప్రారంభించింది.
2010.. వివాదాస్పద స్థలాన్ని సున్నీ వక్ఫ్‌ బోర్డు, నిర్మోహి అఖారా, రామ్‌ లల్లాకు మూడు సమాన భాగాలుగా విభజించాలని సెప్టెంబర్‌ 30వ తేదీన హైకోర్టు తీర్పు చెప్పింది.
2011.. వివాదాస్పద స్థలాన్ని మూడు సమాన భాగాలుగా పంచాలని అలహాబాద్‌ హైకోర్టు ఇచ్చిన తీర్పును మే 9వ తేదీన సుప్రీంకోర్టు నిలిపివేసింది.
2018.. వివాదాస్పద స్థలానికి సంబంధించిన సివిల్‌ అప్పీళ్లపై ఫిబ్రవరి 8వ తేదీన సుప్రీంకోర్టు విచారణ ప్రారంభించింది.
2019.. ఈ ఏడాదిలో రామ జన్మభూమి వివాదం ఒక కొలిక్కి వచ్చింది. సుప్రీంకోర్టు ప్రధాన న్యాయమూర్తి రంజన్‌ గొగోయ్‌ నేతృత్వంలో ఐదుగురు సభ్యుల రాజ్యాంగ ధర్మాసనం ఏర్పాటయ్యి.. రోజువారీ విచారణను ప్రారంభించింది. ఆగస్టు 6 నుంచి 16వ తేదీ వరకు విచారణ జరిపిన సర్వోన్నత న్యాయస్థానం.. నవంబర్‌ 9న రామ జన్మభూమికి అనుకూలంగా తీర్పునిచ్చింది.
2.77 ఎకరాల వివాదాస్పద భూమిని రామాలయ నిర్మాణానికే కేటాయించాలని తెలిపింది. . మసీదు కోసం ప్రత్యేకంగా ఐదు ఎకరాల స్థలాన్ని వక్ఫ్‌ బోర్డుకు అందించాలని ఆదేశించింది. ఈ తీర్పు తర్వాతనే అయోధ్యలో రామాలయ నిర్మాణం ప్రారంభమైంది.
2024.. జనవరి 22వ తేదీన రామాలయంలో రాముడి విగ్రహ ప్రాణ ప్రతిష్ఠ జరగనుంది.