Visit:
పాట పాడుకుంటూ పనిచేస్తున్నారు పొలాల్లో
అలసట అసలు తెలుస్తలేదు!
పొద్దు గుంకున్నది తెల్వటంలే!
పని ఒడుస్తలేదని అనిపిస్తలేదు
ఇంకా పని చేయాలనిపిస్తున్నది మనసుకు!
పాట పాడుతుంటే ఎక్కడి పక్షులో
వచ్చి కోరస్‌ కూతలు!
సూర్యుడికీ అస్తమించాలని లేదు
పాట పాడుతూ పని చేసేవారిని
ఇంకా చూడాలనే ఉంది
సూర్యుడూ మరి శ్రామికుడే కదా అందుకే!
పనిచేస్తుంటే పాట అదే సహజంగా హృదయాల్లోంచి
పుట్టి రాగ రంజితంగా ఎన్నో వర్ణాలు వర్ణాలు
గట్ల వెంట అందరి నోట పాట కచేరి!
పని లేనిదే పాట పుట్టదు
పని శ్రామికంగా గానం అవుతున్నది
పాట పాడుతున్న వారి
పాదాలకు గండ పెండేరాలు లేవు
చేతులకు స్వర్ణ కంకణాలు లేవు
పట్టు శాలువాలు లేవు
పాదాలు బురద బురద
చేతుల్లో నాట్లు వేసే ఆకుపచ్చని వరి మొలకలు
స్వేద గంధంతో ఒంటి పైనున్న బట్టలు
పాట ఏ రచయిత రాసింది కాదు
పనిలోంచి ధ్వనించి ప్రపంచమైన పాట!!
-కందాళై రాఘవాచార్య ,87905 93638
