పొదలో పులి పొంచి ఉంది. మేత కోసం వచ్చిన ఆవు మీద పంజా విసరడానికి సిద్ధమైంది. “ఇంటి వద్ద దొడ్లో నా చిన్ని ల్యాగ ఉంది. నా పాల కోసం అది ఎదురు చూస్తుంది. కొంచం సమయమివ్వు. ఇంటికెళ్లి దానికి పాలిచ్చి, ఆకలి తీర్చి మళ్లీ వస్తా” దీనంగా వేడుకుంది ముసలి ఆవు. భోజరాజీయం నాటి బోళా వ్యవహారం కదా! సత్యం చెప్తున్నా, మళ్లీ తప్పక తిరిగి వస్తానని ఆవు మాట ఇచ్చింది. పులి కూడా సరేనంది! ఆవు ఇంటికి వెళ్లి ల్యాగకు పాలివ్వడం, బుద్ధులు చెప్పడం, ఆడిన మాట తప్పకుండా ఆహారమయ్యేందుకు పులి ముందుకు రావడం, దాని వెంట ల్యాగ కూడా రావడం, నన్ను తిను అంటే నన్ను తిను అని ఆవు దూడలు పులిని వేడుకోవడం, వాటి అనురాగాన్ని చూసి మనసు కరిగి, దేన్నీ తినకుండానే పులి వెళ్లిపోవడం ఇదంతా మనం చిన్నప్పుడు చదువుకున్న కథ. 15వ శతాబ్దంలో అనంతామాత్యుడు రాసిన భోజరాజీయమనే మహాకావ్యంలోనిది ఈ కథ. జంతువుల నుంచి మనిషి నేర్చుకోవాల్సిన నీతి దీని సారాంశం!
మరి ఇది 21వ శతాబ్దమాయె. కాలం మారిపోలె? అడవుల్ని చెరబట్టి మనిషే వింత జంతువుగా మారిండు కదా! బీజేపీ అతి అగ్ర నేత ఒకరు మొన్న తెలంగాణ వచ్చారు. మనిషిని మనిషిగా ఉంచకుండా, దేవుడినో, జంతువునో చేసే ఆ పార్టీ రాష్ట్ర నేత ఆ సభలో యథా ప్రకారం అర్థంకానంత ఆవేశంతో మాట్లాడారు. “ఢిల్లీ నుంచి పులి ఫోన్ చేసింది. పులి వేట ప్రారంభించింది. వెంటాడటానికే పులి వచ్చింది. ఆ పులి చేవెళ్ల గడ్డపై అడుగుపెట్టింది” అంటూ ప్రసంగించారు. నాకు అర్థం కాలేదు. పులికి తెలంగాణలో పనేమిటి? వేట ఎందుకు? ఇక్కడే ఎందుకు వేటాడాలి? హరితహారంతో పచ్చబడ్డ అడవుల్లో వేటాడతారా? లేక సంక్షేమ జనారణ్యంలోనా? అయినా పులి ఎప్పుడూ పులిని వేటాడదు. తెలంగాణ పులి జోలికి పోయే సాహసం దానికి అంతకంటే లేదు. పులి వేటాడేది జింకల్ని, ఆవుల్ని, సాధు జంతువుల్ని! అంటే తెలంగాణ సామాన్య జనాన్ని వేటాడుతారా? జంతువుల నుంచి నేర్చుకునే దశ నుంచి జంతువుల క్రూరత్వంతో పోల్చుకునే స్థితికి చేరుకున్నం.
ఇలా ఆలోచిస్తుండగానే వాట్సాప్ నోటిఫికేషన్ ఒకటి మెరిసింది. తీసి చూద్దును కదా ఒక ఆసక్తికర వీడియో! పౌరీ ఉత్తరాఖండ్లోని రిఖ్నికాల్ ప్రాంతంలో జరిగిన ఈ ఘటన వీడియోను భారత అటవీ అధికారి సుసాంతానంద ట్విటర్లో పోస్ట్ చేశారు. సువిశాలంగా ఉన్న పచ్చిక బయళ్లలో ఆవుల మంద మేస్తున్నది. పొంచిఉన్న పులి ఒకటి హఠాత్తుగా వాటిపై దాడి చేసింది. భోజరాజీయంలో ఉన్నట్టుగా మాటలు, ముచ్చట్లేమీ లేవు. ఆవులు పరుగందుకున్నాయి. పులి వెంటాడింది. కొన్ని నిముషాల ప్రయత్నం తర్వాత పులి ఒక దూడ చెంతకు చేరగలిగింది. ఇక దానిపై పంజా విసరడమే తరువాయి… ఎక్కణ్నుంచో ఒక ఆవు మహా వేగంగా, మహోగ్రంగా దూసుకువచ్చింది. బహుశా ఆ దూడ తల్లేమో! అది చేసిన భీకర అంబారావానికి పులి చెవులు బద్దలయ్యాయి. వెనక్కి తిరిగి చూస్తే, ప్రళయకాల రుద్రునిలా రౌద్రావతారంలో గోమాత! పులికి పై ప్రాణాలు పైనే పోయాయి. బతికుంటే బలుసాకు తినొచ్చని, బతుకు జీవుడా అనుకుంటూ, దూడను కనీసం తాకనైనా తాకకుండానే, ఆవువైపు కన్నెత్తి కూడా చూడకుండా, తోక ముడిచి తోపుల్లోకి పరారైపోయింది! ( bit.ly/3oMVg5U ) వీడియో లింక్లో చూడండి)
భోజరాజీయంలో చెప్పినట్టు మాటకు చేతకు పొంతన ఉండాలి. మాటకు కట్టుబడే తత్వం ఉండాలి. నీతిమంతుల జోలికి పోకూడదనే నిజాయతీ ఉండాలి. ఈ లక్షణాలన్నీ లేనప్పుడు ఏదైనా, ఎవరైనా పులి ఎట్లా అవుతారు? పులి కానిదాన్ని పులి అని చెప్తే ఏమవుతుంది? ఏదో ఒక రోజు, పులిచారలు వేసుకున్న నక్క, కుడితిలో పడి, అసలు రంగు బయటపడుతుంది.
ఇదంతా ఎందుకంటే… పులి అని పొగిడినంత మాత్రాన ఎవరైనా పులి అయిపోతారా? పులి చారలు వేసుకున్న నక్క పులి కాలేక పోయిందని పంచతంత్రం కథ చెప్పలేదా? ప్రపంచ తంత్రంలో కూడా అంతే! పులిలాంటి శరీరంతో, పులిలాగ కన్పించినంత మాత్రాన ఏదీ, ఎవరూ పులి కాలేరు. మరెట్ల? మనసు పులిలా ఉండాలి. పులికి ఉండే గుండె ధైర్యం ఉండాలి. పులిలాంటి సాహసం ఉండాలి. పులిలాంటి వేగం ఉండాలి. పులిలా సునిశిత దృష్టి ఉండాలి. పులిలా లక్ష్య ఛేదన సామర్థ్యం ఉండాలి. పులిలా లంఘించగలగాలి. తన ఆకలి తీరిన తర్వాత అవశేషాన్ని ఇతరుల ఆహారంగా వదిలివేసే ఔదార్యం ఉండాలి. ఆకలి లేనప్పుడు, వేట అవసరం లేదనే తాత్విక చింతన ఉండాలి. తన పరిధికి తాను కట్టుబడే కట్టుబాటు ఉండాలి తప్ప అడవంతా ఏలాలనే అత్యాశ ఉండకూడదు. పరాక్రమంతో పోరాడాలి తప్ప దొంగదెబ్బ తీయకూడదనే జ్ఞానం ఉండాలి. భోజరాజీయంలో చెప్పినట్టు మాటకు చేతకు పొంతన ఉండాలి. మాటకు కట్టుబడే తత్వం ఉండాలి. నీతిమంతుల జోలికి పోకూడదనే నిజాయతీ ఉండాలి. ఈ లక్షణాలన్నీ లేనప్పుడు ఏదైనా, ఎవరైనా పులి ఎట్లా అవుతారు? పులి కానిదాన్ని పులి అని చెప్తే ఏమవుతుంది? ఏదో ఒక రోజు, పులిచారలు వేసుకున్న నక్క, కుడితిలో పడి, అసలు రంగు బయటపెట్టుకున్నట్టు అవుతుంది. ఇప్పుడదే కదా జరుగుతున్నది!
వేట మధ్య యుగాల సంస్కృతి. ఈ యుగంలో ఉండాల్సింది పోటీ. అదీ మంచిలో, మంచి చేయడంలో! ఒకప్పుడు దేశంలో రాజకీయ నాయకులు శాంతి కపోతాలను విడిచేవారు. వాటితో ఫొటోలు దిగేవారు. ఇప్పుడు విదేశాల నుంచి పులుల్ని తెచ్చి విడుస్తున్నారు. వాటితో ఫొటోలు దిగుతున్నారు. పాడు కాలం!
అయినా పరాయి ప్రాంతం నుంచో, పరాయి దేశం నుంచో బలవంతంగా వచ్చే, తెచ్చే పెంపుడు పులులు ఎక్కువ కాలం బతకవు. బతకలేవు. మధ్యప్రదేశ్ అడవిలో వదిలిన పులులు అందుకే కదా ఒకదాని తర్వాత ఒకటి చనిపోతున్నాయి. పరాయి పులుల స్వభావానికి, మన జీవావరణానికి సరిపోదు. ఇది చిరుత పులులకే కాదు; రాజకీయ మాటల పులులకూ వర్తిస్తుంది. అయినా సరే ఏదో ఒకదాన్ని తీసుకొచ్చి, అదిగో పులి.. అరి వీర భయంకరం అంటే నమ్మడానికి తెలంగాణ ఏమీ అన్పఢ్ కాదు. పులుల కథలన్నీ తెలుసు తెలంగాణకు. వాగు నీళ్లను నువ్వే పాడు చేసావంటూ మేకపిల్లను గద్దించే పులి కథ తెలుసు. 70 ఏండ్ల పేపర్ టైగర్ల పాలనలో తెలంగాణ ప్రజలు, బంగారు కడియాలు చూపించి మడుగులోకి దించే ముసలి ముతక పులులెన్నింటినో కూడా చూసారు. అందువల్ల మరోసారి ఊబిలోకి దిగే ప్రసక్తే లేదు. ‘నాన్నా పులి’కి మోసపోయే సమస్యేలేదు. తెలంగాణ ప్రజలు ఇప్పుడు ఐకమత్యంతో ఉన్న ఆవులు. దొడ్లోకి దొంగ పులి దిగితే, కుమ్ముడే. కొమ్ములు కడుపుల దిగుడే!
ఇంతకీ ఉత్తరాఖండ్ వీడియో ఉదంతంలో అసలు పులి ఎవరు? పులిని తరిమికొట్టిన ఆవే అసలు పులి! పారిపోయిన పులి పులేకాదు! కాసులు, కేసుల పొదల్లో దాక్కున్న పులి ఎప్పటికీ పులికాదు! నీతి ఏమిటంటే, పులిలా కనిపించేది నిజంగా పులి కాదు. సాధు జీవులుగా కనిపించినంత మాత్రాన పులులు కాకుండా పోవు. సమయం, సందర్భం వస్తే ఆవే పులి అవుతుంది. అందుకే నాందేడ్ సభలో ముఖ్యమంత్రి కేసీఆర్, రైతులు పులుల్లా మారాలన్నారు. ఆవు పులిలా ఎగిరి దుంకి, దూడపై దాడికి దిగిన పులిని తరిమికొట్టినప్పుడు, రైతు పులిలా మారి, నకిలీ ‘నక్క పులుల్ని’ తరమడం అసాధ్యమా? పసుపు కుంకుమ దిద్ది, పృష్ఠ నమస్కారం చేసినట్టు చేసి, గో పంచకం తీసుకున్నట్టు నటించి, ఆవు చెవిలో పువ్వు పెట్టి, కళ్లల్లో కారం కొడుదామనుకుంటున్నారేమో! ఇకపై ఒక్కొక్క రైతూ ఒక్కో పులి. వారికి మరొక పెద్దపులి కాపలాగా ఉంది. బెబ్బులి! జర పదిలం!!
– సిరి
పశువులపై దాడి చేయాలని భావించిన పులికి ఎదురుదెబ్బ. దూడను లక్ష్యంగా చేసుకున్న పులిని భయపెట్టిన ఆవు. pic.twitter.com/ZmiDxsMGKK
— Namasthe Telangana (@ntdailyonline) April 27, 2023