e-Paper

Advertisement

E-Paper

Apps

Book Your Copy

Visit Telangana Today

Tuesday, January 18, 2022
Home జయశంకర్ విద్య వైద్యం భేష్

విద్య వైద్యం భేష్

కేసీఆర్‌ కిట్‌, సర్కారు దవాఖానల్లో ప్రసవాలపై ప్రశంసలు
ప్రజలు బాగుంటేనే దేశం అభివృద్ధి చెందుతుంది.. ములుగు పర్యాటకంగా అగ్రగామిగా నిలుస్తుంది
రెండు జిల్లాల అభివృద్ధికి కృషిచేయాలి.. నాటి ఇంజినీరింగ్‌ నైపుణ్యానికి ప్రతీక రామప్ప
నీతి ఆయోగ్‌ వైస్‌ చైర్మన్‌ డాక్టర్‌ రాజీవ్‌కుమార్‌.. సేంద్రియ సాగుకు అన్ని విధాలా సహకరిస్తా
నీతి ఆయోగ్‌ ముఖ్య కార్యదర్శి కె.రాజేశ్వర్‌రావు

ములుగు, డిసెంబర్‌ 8 (నమస్తే తెలంగాణ) :ములుగు, జయశంకర్‌ భూపాలపల్లి జిల్లాలో పేదలకు అందుతున్న విద్య, వైద్యం బాగున్నాయంటూ నీతి ఆయోగ్‌ వైస్‌ చైర్మన్‌ రాజీవ్‌కుమార్‌ ప్రశంసించారు. బృంద సభ్యులతో కలిసి బుధవారం ఆయన రెండు జిల్లాల్లో పర్యటించారు. మొదట ములుగులో ఐటీడీఏ ఆధ్వర్యంలో రూ.46లక్షలతో నిర్మించిన న్యూట్రీషన్‌ రిహాబిలిటేషన్‌ సెంటర్‌ను ప్రారంభించి, అంగన్‌వాడీ కేంద్రంలో పిల్లలకు అందిస్తున్న విద్య, పౌష్ఠికాహారాన్ని పరిశీలించారు. ఆ తర్వాత కలెక్టరేట్‌లో రెండు జిల్లాల అధికారులతో విద్య, వైద్యం, వ్యవసాయరంగాలపై సమీక్షించి పాలనాపరంగా అధికారుల పనితీరు బాగుందని అభినందించారు. కేసీఆర్‌ కిట్‌ పథకంతో గర్భిణులు, బాలింతలకు సేవలు మెరుగుపడి, 94శాతం ప్రసవాలు సర్కారు దవాఖానల్లోనే జరగడంపై వైద్యులకు కితాబునిచ్చారు. రాష్ట్ర సరిహద్దు ప్రాంతాలైన ఈ రెండు జిల్లాలు ఎంతో వెనుకబడ్డాయని వాటిని అన్ని విధాలా అభివృద్ధి చేస్తామని చెప్పారు. యునెస్కో గుర్తింపు పొందిన రామప్ప సహా అనేక ప్రత్యేకతలున్న ములుగు జిల్లా పర్యాటకంగా అగ్రగామిగా నిలుస్తుందన్నారు. సేంద్రియ సాగుకు అవసరమైన సహకారం అందిస్తామని ఈమేరకు రెండు జిల్లాలను తాను దత్తత తీసుకొని అభివృద్ధి చేస్తానని నీతి ఆయోగ్‌ కార్యదర్శి కె.రాజేశ్వర్‌రావు ప్రకటించారు.

  • ప్రజలు బాగుంటేనే దేశాభివృద్ధి సాధ్యమవుతుందని, ప్రభుత్వ అధికారులు ప్రజల్లో నమ్మకం పెంచి సమాజానికి, ప్రభుత్వానికి దూరం తగ్గించేలా కృషిచేయాలని నీతి ఆయోగ్‌ వైస్‌ చైర్మన్‌ డాక్టర్‌ రాజీవ్‌కుమార్‌ అన్నారు. బుధవారం ఆయన నీతి ఆయోగ్‌ ముఖ్య కార్యదర్శి కె.రాజేశ్వర్‌రావు, సీనియర్‌ సలహాదారులు నీరజ్‌సిన్హా, సీనియర్‌ కన్సల్టెంట్‌ రాకేశ్‌రంజన్‌, వైస్‌చైర్మన్‌ అడిషనల్‌ ప్రైవేట్‌ సెక్రటరీ శివంతోటియాలతో కలిసి ములుగుకు రాగా ములుగు, జయశంకర్‌ భూపాలపల్లి జిల్లాల కలెక్టర్లు ఎస్‌. కృష్ణ ఆదిత్య, భవేశ్‌మిశ్రాలు స్వాగతం పలికారు. తొలుత ఐటీడీఏ ఆధ్వర్యంలో రూ.46లక్షలతో నిర్మించిన న్యూట్రీషన్‌ రిహాబిలిటేషన్‌ సెంటర్‌ను ప్రారంభించి, అంగన్‌వాడీ సెంటర్‌లో పిల్లలకు పౌష్టికాహారం, విద్య అందుతున్న తీరును పరిశీలించారు. ఆ తర్వాత కలెక్టరేట్‌ కార్యాలయానికి చేరుకోగా పోలీసులు ఆయనకు గౌరవ వందనం సమర్పించారు. అనంతరం కలెక్టర్‌ కృష్ణ ఆదిత్య అధ్యక్షతన ములుగు కలెక్టరేట్‌లో రెండు జిల్లాల అధికారులతో సమీక్ష నిర్వహించారు. ఈ సందర్భంగా విద్య, వైద్యం, వ్యవసాయ రంగాల ద్వారా ప్రజలకు అందుతున్న సేవలను పవర్‌ పాయింట్‌ ప్రజెంటేషన్‌ ద్వారా కలెక్టర్‌ వివరించారు. 94 శాతం ప్రసవాలు ప్రభుత్వ దవాఖానల్లో జరుగుతున్న విషయాన్ని తెలుసుకున్న నీతి ఆయోగ్‌ బృందం అధికారులను ప్రశంసించింది. కేసీఆర్‌ కిట్‌తో గర్భిణులు, బాలింతలకు సర్కారు దవాఖానల్లో మెరుగుపడిన వైద్యంపై బృందం సభ్యులు ఆరా తీసి పథకం బాగుందంటూ కితాబు ఇచ్చారు.

సేంద్రియ సాగుకు సహకారం అందిస్తాం

  • నీతి ఆయోగ్‌ ముఖ్య కార్యదర్శి కె.రాజేశ్వర్‌రావు
    నీతి ఆయోగ్‌ ద్వారా వచ్చే 20 ఏళ్లలో వ్యవసాయరంగాన్ని అభివృద్ధి చేస్తామని, ఇందులో భాగంగా సేంద్రియ సాగుకు సహకరించేందుకు ములుగు, జయశంకర్‌ భూపాలపల్లి జిల్లాలను తాను దత్తత తీసుకుంటానని నీతి ఆయోగ్‌ ముఖ్య కార్యదర్శి కె.రాజేశ్వర్‌రావు ప్రకటించారు. జిల్లా అభివృద్ధిలో స్వచ్ఛంద సంస్థలను భాగస్వాములను చేయాలని, ఉన్న నిధులను సద్వినియోగం చేసుకోవాలన్నారు. అంగన్‌వాడీ సెంటర్లలో పిల్లలకు నాణ్యమైన పౌష్టికాహారం అందించడంలో అధికారులు విశేష కృషి చేస్తున్నారని కొనియాడారు. విద్య, ఆరోగ్యపరంగా పిల్లలు ఉత్సాహంగా ఉన్నారని చెప్పారు. జిల్లాల అభివృద్ధి కోసం ప్రతిపాదనలు నీతి ఆయోగ్‌కు పంపితే తమ వంతు కృషిచేస్తామని ఆయన హామీ ఇచ్చారు. అనంతరం నీతి ఆయోగ్‌ బృందానికి కలెక్టర్‌ ఆధ్వర్యంలో మేడారం సమ్మక్క-సారలమ్మల ప్రధాన పూజారులు, ఆలయ ఈవోలు ప్రసాదాలు, జ్ఞాపికలు అందించి కండువాలతో సత్కరించారు. కార్యక్రమంలో రెండు జిల్లాల అదనపు కలెక్టర్లు ఇలా త్రిపాఠి, దివాకర, భద్రాచలం ఐటీడీఏ పీవో గౌతమ్‌పొట్రూ, డీఎంహెచ్‌వోలు అల్లెం అప్పయ్య, శ్రీరామ్‌, డీఏవోలు కేఏ. గౌస్‌హైదర్‌, భాస్కర్‌, డీఈవో పాణిని పాల్గొన్నారు. ములుగు ఏఎస్పీ సుధీర్‌ రామ్‌నాథ్‌ కేకన్‌ ఆధ్వర్యంలో సీఐ గుంటి శ్రీధర్‌, ఎస్సై ఓంకార్‌యాదవ్‌, పీఎస్సై రాజారామ్‌ సిబ్బందితో బందోబస్తు నిర్వహించారు.
- Advertisement -

సమగ్రాభివృద్ధికి కృషి చేయాలి
రాష్ట్ర సరిహద్దు ప్రాంతాలైన ములుగు, భూపాలపల్లి జిల్లాలు అభివృద్ధిలో వెనుకబడి ఉన్నాయని, ఈ జిల్లాలను ప్రగతి బాట పట్టించేందుకే తాము పర్యటనకు వచ్చినట్లు నీతి ఆయోగ్‌ వైస్‌ చైర్మన్‌ డాక్టర్‌ రాజీవ్‌కుమార్‌ తెలిపారు. రెండు జిల్లాల్లో అధికారుల పాలన, ప్రజలకు అభివృద్ధి పథకాలు అందిస్తున్న తీరు ప్రశంసనీయమని కొనియాడారు. పర్యాటకపరంగా ములుగు జిల్లా ప్రత్యేక వసతులను కలిగి ఉందని, భవిష్యత్‌లో అభివృద్ధిలో అగ్రగామిగా నిలువనున్నదన్నారు. ఆంధ్రా, గుజరాత్‌, హిమాచల్‌ప్రదేశ్‌లో చేపట్టిన రసాయన రహిత వ్యవసాయాన్ని అధ్యయనం చేసి రెండు జిల్లాలోని రైతులను సైతం సేంద్రియ సాగువైపు మళ్లించాలని చెప్పా రు. అంగన్‌వాడీ కేంద్రాల్లో పోషణతో పాటు మెరుగైన శిక్షణ అందించాలన్నారు. చిరుధాన్యాల సాగును ప్రోత్సహించి ప్రజారోగ్యంపై దృష్టి పెట్టాలన్నారు. సాధారణ ప్రసవాల సంఖ్యను పెంచుతూ తల్లిపాల ప్రాముఖ్యతను బాలింతలకు వివరించాలని సూచించారు. విజ్ఞానాన్ని సరైన రీతిలో వినియోగించుకునేందుకు యువతకు అవగాహన కల్పించాలని కోరారు.

Advertisement

Most Viewed

-Advertisement-

తాజావార్తలు

Advertisement

ట్రెండింగ్‌

Advertisement