Hyderabad zoo park | హైద‌రాబాద్ జూపార్క్‌లో యువ‌కుని హ‌ల్‌చ‌ల్‌.. సింహం ఎన్‌క్లోజర్‌లోకి దూకేందుకు యత్నం

చార్మినార్ : మధ్యాహ్నం వరకు సందర్శకులతో సరదాగా సాగుతున్న జూ పార్క్​‍లో ఒక్కసారిగా అలజడి మొదలైంది. లయన్‌మోట్‌పై నిలబడి ఓ వ్యక్తి ఎన్‌క్లోజర్‌లోకి దూకేందుకు చేస్తున్న ప్రయత్నాలను గమనించిన సందర్శకులు ఒక్క సారిగా అప్రమత్తమై జూ సిబ్బందికి సమచారాన్ని అందించారు.

జూ పార్క్​‍, బహదూర్‌ఫుర పోలీసులు తెలిపిన వివరాల ప్రకారం కీసర ప్రాంతానికి చెందిన సాయికుమార్‌ (31) స్థానికంగా హోటళ్లలో పనులు చేస్తూ ఉపాధి పొందుతున్నాడు.మంగళవారం జూ పార్క్​‍ సందర్శన కోసం వచ్చిన సాయికుమార్‌ 3.30 గంటల సమయంలో ఆఫ్రికన్స్​‍ లయన్స్​‍ మోట్‌ వద్దకు చేరుకున్నాడు.

అనంతరం లయన్‌ మోట్‌ (రక్షణగోడ) పై నిలబడి సింహాల వద్ద రత్నాభరణాలు ఉంటాయని అరుస్తూ (లయన్స్​‍ పేర్లు రాధ, కృష్ణ ) ఎన్‌క్లోజర్‌లోకి దూకడానికి ప్రయత్నించాడు. అప్పటికే జూ అధికారులు సింహాలను సందర్శకులు తిలకించడానికి ఎన్‌క్లోజర్‌లోకి వదిలేయడంతో సందర్శకులు, జూ అధికారులు ఒకింత ఆందోళనకు గుర‌య్యారు.

అప్రమత్తమైన సందర్శకులు, జూ పార్క్​‍ సిబ్బంది సాయికుమార్‌ ప్రయత్నాలను నిలువరిస్తూ అతన్ని పట్టుకున్నారు. అనంతరం అతన్ని అదుపులోకి తీసుకుని బహదూర్‌పుర పోలీసులకు అప్పగించారు. సాయికుమార్ మాన‌సిక స్థితి బాగ లేన‌ట్టు గుర్తించామని బహదూర్‌పుర ఇన్‌స్పెక్టర్‌ దుర్గాప్రసాద్‌ తెలిపారు.