Hyderabad zoo | జూ డైరెక్టర్‌కు ఘన విడ్కోలు

చార్మినార్‌ : జూ పార్క్​‍ అభివృద్ధిలో సిదానంద్‌ కుక్రేటి సేవ‌లు అనన్య సామాన్యమైనవని జూ పార్క్​‍ క్యూరేటర్‌ రాజశేఖర్‌ తెలిపారు. జూ పార్క్​‍ డైరెక్టర్‌గా సుదీర్ఘకాలం కొనసాగిన డాక్టర్‌ సిదానంద్‌ కుక్రేటి శుక్రవారం పదవి విరమణ చేశారు.

ఈ సందర్భంగా జూ పార్క్​‍లోని బయోస్కోఫ్‌ హాల్‌లో నిర్వహించిన సన్మాన కార్యక్రమంలో ఆయన మాట్లాడుతూ సిదానంద్‌ కుక్రేటి జూ పార్క్​‍ అభివృద్దికి ఎంతో సేవ చేశారని తెలిపారు. రాయల్‌ బెంగాల్ పులుల‌ సంతతి అభివృద్దితోపాటు దేశంలోని జూ పార్క్​‍లోకెల్ల అత్యంత ప్రత్యేకతను చాటుకుంటున్న తెల్లపులల సంరక్షణ కోసం సిదానంద్ కుక్రేటి ప్రత్యేక శ్రద్ధ తీసుకుంటున్నారని తెలిపారు.

గత రెండు సంవత్సరాలుగా కొవిడ్‌ కారణంగా అన్ని వ్యవస్థలు ఎదుర్కొన్న సమస్యల్లాగే జూ పార్క్​‍ సైతం పలు సమస్యల ను ధీటుగా ఎదుర్కొంటూ నిలబడేందుకు కృషిచేసిన ప్రయత్నాల్లో సిదానంద్‌ కృషి ఎంతగానో ఉందన్నారు. భవిష్యత్తులో నూ తగిన సలహాలను అందిస్తూ జూ పార్క్​‍ అభ్యున్నతికి పాటుపడాలని ఈ సందర్భంగా ఆయన ఆకాంక్షించారు.

ఈ కార్యక్రమంలో మహబూబ్‌నగర్‌ సర్కిల్‌ కన్జర్వేటర్‌ క్షితిజా, వైల్డ్​‍లైఫ్‌ ఓఎస్డి ఏ. శంకరన్‌, జూ పార్క్​‍ డిప్యూటీ డైరెక్టర్‌ (వెటర్నరీ) ఎం.ఏ హకీం,అసిస్టెంట్‌ క్యూరేటర్‌లు సునీత, స్వరూపరాణి, డిప్యూటీ రేంజ్‌ అధికారి నాగరాజు, మంజుల, అన్నామణి, సందీఫ్‌, లక్ష్మీనారాయణ, హనీఫుల్లా తదితరులు పాల్గొన్నారు.