Vinayaka Chavithi 2023 | హైదరాబాద్ : వినాయక చవితి పండుగను ఎప్పుడు జరుపుకోవాలని ఏర్పడిన సందిగ్ధతపై తెలంగాణ విద్వత్సభ క్లారిటీ ఇచ్చింది. గణేశ్ చతుర్థిని సెప్టెంబర్ 18న జరుపుకోవాలా? 19వ తేదీన నిర్వహించాలా అనేది కొద్దిరోజులుగా ప్రజల్లో ఓ సందిగ్ధత నెలకొంది. ఈ నేపథ్యంలో స్పందించిన తెలంగాణ విద్వత్సభ.. భాద్రపద శుక్ల చతుర్థి అయిన సోమవారం ( సెప్టెంబర్ 18వ తేదీన ) వినాయక చవితి పండుగను నిర్వహించుకోవాలని స్పష్టం చేసింది.
18వ తేదీన ఉదయం 9.58గంటలకు చవితి ఆరంభమై 19న ఉదయం 10.28గం.లకు ముగుస్తుందని, అందుకే వినాయక చవితి పండుగను సోమవారం రోజే జరుపుకోవాలని విద్వత్సభ అధ్యక్షులు యాయవరం చంద్రశేఖర శర్మ సిద్ధాంతి, కార్యదర్శి దివ్యజ్ఞాన సిద్ధాంతి సోమవారం ఒక ప్రకటనలో తెలిపారు. వినాయక చవితి నవరాత్రులను అదేరోజు ప్రారంభించాలని ప్రజలకు సూచించారు. ఇదే విషయాన్ని తెలంగాణ రాష్ట్ర ప్రభుత్వానికి తెలియజేసినట్లు చెప్పారు.