Nigerian actor : డ్రగ్స్‌ విక్రయిస్తూ పట్టుబడిన నైజీరియా నటుడు

Nigerian actor : పలు సినిమాల్లో నటించి పేరు తెచ్చుకున్న ఓ నటుడు.. మాదక ద్రవ్యాలు విక్రయిస్తూ పోలీసులకు పట్టుబడ్డాడు. ముంబై, చెన్నై, హైదరాబాద్, ఇతర నగరాలతో..

September 30, 2021 / 02:03 PM IST

Nigerian actor : డ్రగ్స్‌ విక్రయిస్తూ పట్టుబడిన నైజీరియా నటుడు

బెంగళూరు: (Nigerian actor) పలు సినిమాల్లో నటించి పేరు తెచ్చుకున్న ఓ నటుడు.. మాదక ద్రవ్యాలు విక్రయిస్తూ పోలీసులకు పట్టుబడ్డాడు. ముంబై, చెన్నై, హైదరాబాద్, ఇతర నగరాలతో పాటుగా శాండిల్‌వుడ్ చిత్ర పరిశ్రమతో అతనికున్న సంబంధాలను పోలీసులు ఆరా తీస్తున్నారు.

తమిళ బ్లాక్‌బస్టర్‌ సినిమాలు ‘సింగం’, ‘విశ్వరూపం’తోపాటు పలు సినిమాల్లో నటించి పేరు తెచ్చుకున్న నైజీరియాకు చెందిన నటుడు చెక్వుమే మాల్విన్‌ బెంగుళూరులో అరెస్టయ్యాడు. డ్రగ్స్‌ విక్రయిస్తూ అడ్డంగా బుక్కయ్యాడని పోలీసు వర్గాలు గురువారం తెలిపాయి. మెడికల్ వీసాపై బెంగళూరు కేఆర్ పురం సమీపంలోని భట్టరహళ్లిలో ఉంటున్న చెక్వుమే మాల్విన్ (45) ను కర్ణాటక పోలీసులు గురువారం అదుపులోకి తీసుకున్నారు. కస్టమర్లకు డ్రగ్స్ విక్రయించడానికి ప్రయత్నిస్తుండగా మూడు రోజుల క్రితం అతడిని అరెస్టు చేశారు. నిందితుడి నుంచి రూ.7.5 లక్షల విలువైన 15 గ్రాముల ఎండీఎంఏ, 250 మిలీ హషీష్ ఆయిల్‌ను పోలీసులు స్వాధీనం చేసుకున్నారు.

పోలీసులు తెలిపిన ప్రకారం, నిందితుడు హిందీ, కన్నడ, తమిళం, తెలుగు, మలయాళం భాషలతో పాటు 20 భారతీయ సినిమాల్లో నటించాడు. కన్నడ సినిమా ‘అన్నాబాండ్’ ‘పరమాత్మ’ లలో ప్రధాన పాత్రలో కనిపించాడు. నిందితుడు న్యూయార్క్ ఫిల్మ్ అకాడమీ నైజీరియా, ముంబైలో ఫిల్మ్ యాక్టింగ్ కోర్సు చేశాడు. మూడు నైజీరియన్ సినిమాల్లో కూడా నటించాడని పోలీసులు తెలిపారు. త్వరగా డబ్బు సంపాదించడం కోసం డ్రగ్స్ విక్రయించడం పనిగా పెట్టుకున్నాడని పోలీసులు చెప్పారు. నార్కోటిక్స్ డ్రగ్స్ అండ్ సైకోట్రోపిక్ సబ్‌స్టాన్స్ యాక్ట్, 1985 కింద పోలీసులు అతడిని అరెస్టు చేశారు.