Veerabhadruni Rahasyam | ఓటీటీలో సెన్సేషన్ సృష్టిస్తోన్న ‘వీరభద్రుని రహస్యం’.. సెప్టెంబర్ 9 నుంచి సీజన్ 1 పార్ట్ 2 షురూ!

Veerabhadruni Rahasyam | ప్రముఖ డిజిటల్ స్ట్రీమింగ్ వేదిక ZEE5 లో ప్రసారమవుతున్న సరికొత్త క్రైమ్, డివోషనల్ మిస్టరీ వెబ్ సిరీస్ ‘వీరభద్రుని రహస్యం’ ప్రేక్షకులను విశేషంగా ఆకట్టుకుంటూ అప్రతిహతంగా దూసుకుపోతోంది.

Veerabhadruni Rahasyam | ప్రముఖ డిజిటల్ స్ట్రీమింగ్ వేదిక ZEE5 లో ప్రసారమవుతున్న సరికొత్త క్రైమ్, డివోషనల్ మిస్టరీ వెబ్ సిరీస్ ‘వీరభద్రుని రహస్యం’ ప్రేక్షకులను విశేషంగా ఆకట్టుకుంటూ అప్రతిహతంగా దూసుకుపోతోంది. ప్రతీ వారం సరికొత్త మలుపులతో వస్తోన్న ఈ సిరీస్ ప్రేక్షకులను అతుక్కుపోయేలా చేస్తోంది. ఇప్పటివరకు విజయవంతంగా ప్రసారమైన మొదటి సీజన్ పార్ట్ 1 లో మొత్తం 30 ఎపిసోడ్స్ విడుదలై ఘన విజయాన్ని సాధించాయి. ఎలాంటి అంచనాలు లేకుండా విడుదలైన ఈ సిరీస్, కేవలం మౌత్ టాక్‌తోనే ఊహించని విజయాన్ని అందుకొని ఏకంగా 300 మిలియన్లకు పైగా వ్యూయింగ్ మినిట్స్‌ను అధిగమించి సరికొత్త రికార్డు సృష్టించింది. లాంగ్ ఫార్మాట్ కంటెంట్‌లో ఈ ఏడాది అత్యధిక మంది వీక్షించిన మోస్ట్ వాచ్డ్ షోగా ఇది నిలిచింది.

ఈ సిరీస్ సక్సెస్ వెనుక ఉన్న ప్రధాన బలాలలో ఒకటి 90వ దశకంలో దేశవ్యాప్తంగా సంచలనం సృష్టించిన క్లాసిక్ ‘మర్మదేశం’ తరహాలోని కథనం. దానిని నేటి తరానికి తగినట్లుగా సరికొత్త హంగులతో రీ-క్రియేట్ చేయడంతో అన్ని వర్గాల ప్రేక్షకులు దీనికి కనెక్ట్ అయ్యారు. ఈ వెబ్ సిరీస్ విశేషాలపై టాలీవుడ్ ప్రముఖులు సైతం ప్రశంసల వర్షం కురిపించారు. ప్రముఖ నటులు నాగబాబు, నిహారిక కొణిదెల ప్రత్యేకంగా వీడియోల ద్వారా ఈ సిరీస్‌ను అభినందించారు. నాగబాబు మాట్లాడుతూ ‘మర్మదేశం’ నాటి జ్ఞాపకాలను ఈ సిరీస్ గుర్తు చేస్తోందని, ప్రతి ఒక్కరూ చూడదగ్గ అద్భుతమైన మిస్టరీ థ్రిల్లర్ అని కొనియాడారు. అలాగే నిహారిక కొణిదెల కూడా ఈ ప్రాజెక్ట్‌ను ప్రశంసిస్తూ అందరూ తప్పకుండా వీక్షించాలని కోరారు.

మొదటి భాగం ఇస్తున్న అనూహ్య స్పందనతో ఉత్సాహంగా ఉన్న చిత్రబృందం, త్వరలోనే మరింత వినోదాన్ని పంచేందుకు సిద్ధమైంది. తాజాగా ZEE5 యాజమాన్యం అధికారికంగా ప్రకటించిన వివరాల ప్రకారం, ‘వీరభద్రుని రహస్యం’ సీజన్ 1 పార్ట్ 2 సెప్టెంబర్ 9 నుంచి స్ట్రీమింగ్ కానుంది. దీనికి సంబంధించిన సరికొత్త ట్రైలర్‌ను శుక్రవారం విడుదల చేయడానికి సన్నాహాలు చేస్తున్నారు. అంతేకాకుండా ప్రేక్షకులకు మరింత ఉత్సాహాన్నిచ్చేలా పార్ట్ 2 ప్రసార విధానంలో కీలక మార్పులు చేశారు. ఇకపై ప్రతీ బుధవారం నుంచి ఐదు చొప్పున కొత్త ఎపిసోడ్స్ ప్రేక్షకులను పలకరించనున్నాయి.

భీమగాని శ్రీవర్థన్ రెడ్డి అత్యంత ప్రతిష్టాత్మకంగా తెరకెక్కించిన ఈ సిరీస్‌లో నటుడు రఘు కుంచె, అనూరాధ, అనీ, అభినవ్, రఘు తదితరులు తమ నటనతో ప్రాణం పోశారు. కి మీడిగయా ఎంటర్‌టైన్‌మెంట్ బ్యానర్‌పై కల్కి రాజా ఈ ప్రాజెక్ట్‌ను ఎంతో రిచ్‌గా నిర్మించారు. మిస్టరీ, భక్తి, ఉత్కంఠభరితమైన మలుపులతో సాగే ఈ వెబ్ సిరీస్ పార్ట్ 2 కోసం ఫ్యాన్స్ ఎంతో ఆసక్తిగా ఎదురుచూస్తున్నారు. సెప్టెంబర్ 9 నుంచి ప్రారంభం కానున్న ఈ సరికొత్త ప్రయాణం బాక్సాఫీస్ తరహాలో ఓటీటీలో ఎలాంటి సంచలనాలు సృష్టిస్తుందో వేచి చూడాలి.