ఆ ఘటన బాధించింది.. అకాడమీ సభ్యత్వానికి రాజీనామా చేస్తున్నా: విల్‌ స్మిత్‌

Will Smith | ఆస్కార్‌ అవార్డుల ప్రధానోత్సవంలో వివాదానికి కారణమైన ప్రముఖ నటుడు విల్‌ స్మిత్‌ అకాడమీ సభ్యత్వానికి రాజీనామా చేశాడు. గత ఆదివారం జరిగిన ఆస్కార్‌ వేడుకల్లో వ్యాఖ్యత క్రిస్‌ రాక్‌పై విల్‌ స్మిత్‌ చేయిచేసుకున్నాడు.

లాస్‌ ఏంజెల్స్‌: ఆస్కార్‌ అవార్డుల ప్రధానోత్సవంలో వివాదానికి కారణమైన ప్రముఖ నటుడు విల్‌ స్మిత్‌ అకాడమీ సభ్యత్వానికి రాజీనామా చేశాడు. గత ఆదివారం జరిగిన ఆస్కార్‌ వేడుకల్లో వ్యాఖ్యాత క్రిస్‌ రాక్‌పై విల్‌ స్మిత్‌ చేయిచేసుకున్నాడు. అయితే అది తనను ఎంతో బాధించిందని, తాన ప్రవర్తన క్షమించరానిదని చెప్పాడు. ఈ నేపథ్యంలో తాను మోషన్‌ పిక్చర్‌ అకాడమీకి రాజీనామా చేస్తున్నానని, బోర్డు ఎలాంటి శిక్ష వేసినా దానికి తాను అంగీకరిస్తానన్నాడు.

Will Smith has resigned from the Academy: “The list of those I have hurt is long. I betrayed the trust of the Academy. I deprived nominees and winners of their opportunity to celebrate and be celebrated for their extraordinary work. I am heartbroken.”

(https://t.co/LT3CWGG6uY) pic.twitter.com/CiyMtqGlZm

— Film Updates (@FilmUpdates) April 1, 2022

ఆస్కార్ వేడుకలో తాను ప్రవర్తించిన విధానం షాకింగ్​గా, బాధాకరంగా ఉందని విల్‌ స్మిత్‌ ప్రకటించాడు. అందుకే అకాడమీ సభ్యత్వానికి రాజీనామా చేస్తున్నాని తెలిపాడు. బోర్డు సభ్యులు తీసుకునే ఎలాంటి చర్యలకైనా సిద్ధంగా ఉన్నానని, ఎలాంటి శిక్షలు వేసినా వాటన్నింటినీ అంగీకరిస్తానని స్పష్టం చేశాడు. అకాడమీ అవార్డుల వేడుకలో తన ప్రవర్తన క్షమించరానిదన్నాడు. కాగా, స్మిత్‌ రాజీనామాను అంగికరిస్తున్నామని అకాడమీ ప్రకటించింది. అయితే అతనిపై చర్యలు మాత్రం కొనసాగుతాయని స్పష్టం చేసింది.

గత ఆదివారం జరిగిన 94వ ఆస్కార్‌  అవార్డుల ప్రదానోత్సవా కార్యక్రమంలో ప్రముఖ కమెడియన్‌ క్రిస్‌ రాక్‌ వ్యాఖ్యాతగా వ్యవహరించాడు. ఈ సందర్భంగా ఓ కామెడీ ట్రాక్‌ను చెబుతూ అందులో విల్‌ స్మిత్‌ భార్య జాడా పింకెట్‌పై కామెంట్‌ చేశారు. అలోపేసియా అనే అనారోగ్య సమస్య కారణంగా జాడా పూర్తిగా గుండుతో కన్పించడంతో.. క్రిస్‌ రాక్‌ ఆమెను జీ.ఐ.జేన్ చిత్రంలో డెమి మూర్ పోషించిన పాత్రతో పోల్చాడు. ఆ పాత్రలో డెమి మూర్‌ కూడా గుండుతో కనిపించింది.

అయితే అతడి వ్యాఖ్యలను స్మిత్‌ తొలుత సరదాగా తీసుకున్నట్లు కనిపించినా.. ఆ తర్వాత నేరుగా వేదికపై వెళ్లి క్రిస్‌ను చెంపదెబ్బ కొట్టాడు. తర్వాత కొద్దిసేపటికి ఉత్తమ నటుడిగా విల్‌ స్మిత్ ఆస్కార్‌ అందుకున్నాడు. అయితే ఈ ఘటనపై వేదికపైనే స్పందించిన స్మిత్‌ అకాడమీకి, సహచరులకు క్షమాపణలు తెలిపారు. ఆ మరుసటి రోజు ఇన్‌స్టాగ్రామ్‌ వేదికగా బహిరంగా క్షమాపణలు కోరాడు. తన భార్యపై జోకులు వేయడాన్ని భరించలేకే అలా చేశానని వెల్లడించాడు.