Jailer 2 | ఓటీటీ వివాదం.. ఆ మల్టీప్లెక్స్‌లలో ‘జైలర్ 2’ హిందీ వెర్షన్‌కు నో ఎంట్రీ!

Jailer 2 Hindi Version | సూపర్‌స్టార్ రజనీకాంత్ హీరోగా, నెల్సన్ దిలీప్‌కుమార్ దర్శకత్వంలో తెరకెక్కిన పాన్-ఇండియా చిత్రం ‘జైలర్ 2’ అక్టోబర్ 15న ప్రపంచవ్యాప్తంగా థియేటర్లలో విడుదల కానుంది.

Jailer 2 Hindi Version | సూపర్‌స్టార్ రజనీకాంత్ హీరోగా, నెల్సన్ దిలీప్‌కుమార్ దర్శకత్వంలో తెరకెక్కిన పాన్-ఇండియా చిత్రం ‘జైలర్ 2’ అక్టోబర్ 15న ప్రపంచవ్యాప్తంగా థియేటర్లలో విడుదల కానుంది. అయితే రజనీకాంత్ నటిస్తున్న ఈ సినిమా హిందీ వెర్షన్ ఉత్తరాదిలో కొన్ని చోట్ల ప్రదర్శనకు నోచుకోవడం లేదు. ప్రముఖ మల్టీప్లెక్స్ చైన్‌లైన పీవీఆర్-ఐనాక్స్, సినీపోలిస్‌లలో ఈ చిత్ర హిందీ వెర్షన్ విడుదల కాకపోవడానికి ఓటీటీ వివాదమే ప్రధాన కారణమని తెలుస్తుంది.

సినిమా థియేట్రికల్ విడుదలకు, ఓటీటీ స్ట్రీమింగ్‌కు మధ్య కనీసం ఎనిమిది వారాల గ్యాప్ ఉండాలని ఈ మల్టీప్లెక్స్ సంస్థలు పట్టుబడుతున్నాయి. అయితే, నిర్మాత సన్ పిక్చర్స్, డిస్ట్రిబ్యూటర్ పెన్ మరుధర్ ఎంటర్‌టైన్‌మెంట్ మాత్రం అన్ని భాషలకు కేవలం నాలుగు వారాల విండో మాత్రమే ఉండాలని కోరుకుంటున్నాయి. ఈ వాగ్వాదం కారణంగానే ఒప్పందాలపై సందిగ్ధత నెలకొని, ఉత్తరాదిలోని పీవీఆర్-ఐనాక్స్ మరియు సినీపోలిస్‌లలో హిందీ వెర్షన్ ప్రదర్శనలను రద్దు చేసుకున్నట్లు ఇండస్ట్రీ వర్గాలు వెల్లడించాయి.

అయితే ఈ వివాదం కేవలం హిందీ వెర్షన్‌కే పరిమితం కాగా, నవంబర్ నెలలో దీపావళి కానుకగా ఈ చిత్రం అమెజాన్ ప్రైమ్ వీడియోలో అన్ని భాషల్లో ఓటీటీ ప్రీమియర్ కానుందని సమాచారం. ఉత్తరాదిలో ఈ మల్టీప్లెక్స్ చైన్‌లు కాకుండా కేవలం సింగిల్ స్క్రీన్‌లు, ఇతర స్టాండర్డ్ థియేటర్లలో మాత్రమే హిందీ వెర్షన్ ప్రదర్శితం కానుంది. ఈ భారీ చిత్రంలో హృతిక్ రోషన్, విద్యాబాలన్, మిథున్ చక్రవర్తి, విజయ్ సేతుపతి, ఎస్.జె. సూర్య తదితరులు కీలక పాత్రల్లో నటిస్తుండగా, అనిరుధ్ రవిచందర్ సంగీతం అందించారు.