విశ్వనాథ్‌ సినిమాలు స్ఫూర్తినిస్తాయి

‘సమాంతర ప్రపంచంలో జరిగే సూపర్‌ హీరో సినిమా ఇది. గతంలో నేను సీరియస్‌ పోలీస్‌ ఆఫీసర్‌ పాత్రల్ని చేశాను. కానీ ఇందులో నా పాత్రను విభిన్నంగా డిజైన్‌ చేశారు. కాల్పనిక ప్రపంచంలో జరిగే ఈ కథ ప్రేక్షకులకు కొత్త అనుభూతినందిస్తుంది’ అని అన్నారు అగ్ర హీరో కార్తి. ఆయన తమిళంలో నటించిన ‘వా వాతియార్‌' చిత్రం తెలుగులో ‘అన్నగారు వస్తారు’ పేరుతో ఈ నెల 12న ప్రేక్షకుల ముందుకొస్తున్నది.

‘సమాంతర ప్రపంచంలో జరిగే సూపర్‌ హీరో సినిమా ఇది. గతంలో నేను సీరియస్‌ పోలీస్‌ ఆఫీసర్‌ పాత్రల్ని చేశాను. కానీ ఇందులో నా పాత్రను విభిన్నంగా డిజైన్‌ చేశారు. కాల్పనిక ప్రపంచంలో జరిగే ఈ కథ ప్రేక్షకులకు కొత్త అనుభూతినందిస్తుంది’ అని అన్నారు అగ్ర హీరో కార్తి. ఆయన తమిళంలో నటించిన ‘వా వాతియార్‌’ చిత్రం తెలుగులో ‘అన్నగారు వస్తారు’ పేరుతో ఈ నెల 12న ప్రేక్షకుల ముందుకొస్తున్నది. ఈ సందర్భంగా బుధవారం కార్తి విలేకరులతో సినిమా విశేషాలను పంచుకున్నారు.

• దర్శకుడు నలన్‌ కుమారస్వామి ‘సూదు కవ్వమ్‌’ చిత్రానికి చాలా మంది అభిమానులున్నారు. ఆయన ఎనిమిది ఏళ్ల తర్వాత చేస్తున్న చిత్రమిది. సూపర్‌ హీరోలనగానే మనకు బ్యాట్‌మ్యాన్‌, సూపర్‌మ్యాన్‌ గుర్తుకొస్తారు. కానీ మన సంస్కృతిలో ఎన్టీఆర్‌, ఎంజీఆర్‌లాంటి సూపర్‌హీరోస్‌ ఉన్నారు. అలాంటి సూపర్‌హీరోస్‌ తిరిగొస్తే ఎలా ఉంటుందన్నదే ఈ సినిమా కథ. 80 దశకం నేపథ్యంలో మాస్‌ కమర్షియల్‌ అంశాల మేళవింపుతో సాగుతుంది.
• నా వరకు చెప్పాలంటే ఇదొక రిస్కీ ప్రయత్నం. అందుకే ఓ సవాలుగా తీసుకున్నా. రచయితలకు పూర్తి స్వేచ్ఛను ఇచ్చినప్పుడే కొత్త కథలొస్తాయి. లేకుంటే రొటీన్‌ సినిమాలు చేయాల్సి ఉంటుంది. దర్శకుడు ఈ సినిమాను అవేంజర్స్‌ లాంటి విజువల్స్‌, మ్యూజిక్‌తో ప్రజెంట్‌ చేశారు. అయితే ఇది పీరియాడిక్‌ ఫిల్మ్‌ మాత్రం కాదు. కథ మొత్తం డిఫరెంట్‌ సెటప్‌లో నడుస్తుంది.
• కథలపరంగా కొత్తదనం చూపించాలని నిత్యం ప్రయత్నిస్తుంటాను. నటులకు ప్రత్యేకత తీసుకొచ్చేది వారి స్క్రిప్ట్‌ ఎంపికే. అలాగే నేను టీమ్‌ వర్క్‌ను బాగా నమ్ముతాను. దర్శకుడితో కలిసి స్క్రిప్ట్‌ డిస్కషన్‌ చేయడంతో పాటు అవసరమైన సూచనలు ఇస్తాను. ఈ సినిమాలో హీరోయిన్‌ కృతిశెట్టి స్పిరిట్‌ రీడర్‌ పాత్రలో కనిపిస్తుంది. ఆ పాత్రకోసం ఆమె ఎంతో పరిశోధన చేసి ఎఫర్ట్స్‌ పెట్టింది.
• కొత్త తరహా సినిమాల్ని మనందరం ప్రోత్సహించాలి. ‘సత్యం సుందరం’ వంటి సినిమాను ఒకవేళ ప్రేక్షకులు ఆదరించకుంటే మరోసారి అలాంటి ప్రయత్నం ఎవరూ చేయరు కదా? కె.విశ్వనాథ్‌ సినిమాలంటే నాకు చాలా ఇష్టం. ఆయన సినిమాల్లో భావోద్వేగాలు, పాత్రల చిత్రణ అద్భుతంగా అనిపిస్తాయి. ఎప్పుడు చూసినా ఆయన సినిమాలు ఏదో కొత్త విషయాన్ని తెలియజేస్తుంటాయి.