కొత్తగా చేయాలనే ఆకలి తీరేది కాదు!

కన్నడ అగ్ర నటుడు ఉపేంద్రను ప్రయోగాత్మక చిత్రాలకు చిరునామాగా అభివర్ణిస్తారు. ఆయన చిత్రాలన్నీ సోషల్‌ సెటైర్‌తో మనిషి తాలూకు నిగూఢమైన వ్యక్తిత్వానికి దర్పణంలా కనిపిస్తాయి.

కన్నడ అగ్ర నటుడు ఉపేంద్రను ప్రయోగాత్మక చిత్రాలకు చిరునామాగా అభివర్ణిస్తారు. ఆయన చిత్రాలన్నీ సోషల్‌ సెటైర్‌తో మనిషి తాలూకు నిగూఢమైన వ్యక్తిత్వానికి దర్పణంలా కనిపిస్తాయి. దర్శకుడిగా, నటుడిగా దక్షిణాది చిత్రసీమలో ఆయనది ప్రత్యేకమైన ముద్ర. ప్రస్తుతం ఆయన ‘ఆంధ్ర కింగ్‌ తాలూకా’ చిత్రంలో కీలక పాత్రను పోషిస్తున్నారు. రామ్‌ హీరోగా మహేష్‌బాబు పి దర్శకత్వంలో రూపొందుతున్న ఈ చిత్రం ఈ నెల 27న ప్రేక్షకుల ముందుకురానుంది. అభిమాని కథగా రూపొందుతున్న ఈ చిత్రంలో ఉపేంద్ర వెండితెర సూపర్‌స్టార్‌ సూర్య పాత్రలో కనిపించనున్నారు. చిత్ర విడుదలను పురస్కరించుకొని మంగళవారం ఉపేంద్ర విలేకరులతో సినిమా సంగతుల్ని పంచుకున్నారు.

• ఈ కథని ఓ ప్రేక్షకుడిగా విని వెంటనే కనెక్ట్‌ అయిపోయా. ఇందులో అద్భుతమైన ఎమోషన్‌ ఉంది. అందరి జీవితాల్లో ఇలాంటి ఎమోషన్‌ ఉంటుంది. అసలు అభిమానుల ప్రేమకు ఎలాంటి లాజిక్‌ ఉండదు. వారు ఎందుకు అంతలా ప్రేమిస్తారు? మనం ఆ ప్రేమకు అర్హులమేనా? అనిపిస్తుంటుంది. ఈ ప్రశ్నలకు సమాధానంగా ఈ సినిమా కథ ఉంటుంది.
• అభిమానులతో నా అనుబంధం చాలా ప్రత్యేకం. నా పుట్టినరోజును (సెప్టెంబర్‌ 18) ఫ్యాన్‌డేగా ప్రకటించాను. ఆ రోజు ఎంతో మంది ఫ్యాన్స్‌ వస్తారు. లక్షల్లో ఖర్చుపెట్టి వేడుకలు చేస్తారు. పెద్దపెద్ద కటౌట్లు కడతారు. సింహాసనం మీద కూర్చొబెడతారు. నేను ఎంత వద్దని వారించినా..ఈ రోజు మాదే అంటారు. నిజంగా వాళ్ల అభిమానానికి అవధులు లేవు.
• ఈ సినిమాలో నేను సూపర్‌స్టార్‌ సూర్య పాత్రలో కనిపిస్తా. ఒక స్టార్‌ జీవితానికి దృశ్యరూపంలా నా పాత్ర సాగుతుంది. మానవ సంబంధాలతో పాటు ధనిక, పేద వర్గాల మధ్య సంఘర్షణ, సినిమా తాలూకు హంగుఆర్భాటాలు..ఇలా అన్ని అంశాలు కలబోసిన వాణిజ్య కథాంశమిది. ఒక స్టార్‌కి, ఆయన అభిమానికి మధ్య ఉండే బంధాన్ని ఈ సినిమాలో అద్భుతంగా ఆవిష్కరించారు.
• నా జీవితంలో ఫస్ట్‌డే ఫస్ట్‌షో అనుభవాలు చాలా ఉన్నాయి. చిన్నప్పుడు సినిమాలు చూడటమే పెద్ద విషయం. అయితే నేను సినిమాల్లోకి వచ్చిన తర్వాత రజనీకాంత్‌, చిరంజీవి సినిమాలను ఫస్ట్‌డే ఫస్ట్‌షో చూసేవాడిని. ‘శివ’ చిత్రాన్ని కూడా ఫస్ట్‌డే ఫస్ట్‌షో చూశాను.
• హీరో రామ్‌ నిజమైన అభిమానిగా తన పాత్రను ఓన్‌ చేసుకొని నటించారు. సగటు అభిమానిలో ఉండే అమాయకత్వం, మాస్‌ అప్పీల్‌ అన్ని అద్భుతంగా పండించాడు. ఒకస్టార్‌కి, అభిమానికి మధ్య ఉండే అనుబంధం డివైన్‌ ఫీల్‌తో ఉంటుంది. ఆ ఎమోషన్‌ స్క్రీన్‌పై అద్భుతంగా వచ్చింది.
• నా దర్శకత్వంలో చిరంజీవిగారితో సినిమా చేయాలని ఎప్పటి నుంచో అనుకుంటున్నా. అదొక పెద్ద డ్రీమ్‌. అన్ని కుదిరితే తప్పకుండా ఆ సినిమా చేస్తాను. ఇక ‘కూలీ’లో రజనీకాంత్‌గారితో నటించడం జీవితకాల అనుభవం. ఆయనకు నేను భక్తుడిని. ఆయనను ఓ డిక్షనరీలా ఫాలో అవుతా. ప్రస్తుతం నా దర్శకత్వంలో రాబోయే సినిమా గురించి కథా చర్చలు జరుగుతున్నాయి. అన్నీ ఫైనలైజ్‌ అయ్యాక ఆ వివరాలను నేనే స్వయంగా వెల్లడిస్తా. ఓ నటుడిగా, దర్శకుడిగా డ్రీమ్‌ క్యారెక్టర్స్‌ ఇంకా మిగిలే ఉంటాయి. ఇంకా ఏదో కొత్తగా చేయాలనే ఆకలి ఎప్పుడూ మిగిలే ఉంటుంది.