రవితేజ:‌ ముగ్గురు కుర్ర హీరోయిన్లతో రొమాన్స్

రవితేజ | 50 దాటిన రవితేజ 20 ల్లో ఉన్న ముద్దుగుమ్మలతో రొమాన్స్ చేస్తున్నాడు. ఒక్కో సినిమాలో ఇద్దరు ముగ్గురు హీరోయిన్లతో రొమాంటిక్ ట్రాక్ నడుపుతున్నాడు.

March 24, 2021 / 03:32 PM IST

రవితేజ:‌ ముగ్గురు కుర్ర హీరోయిన్లతో రొమాన్స్

రవితేజ ఒకే ఒక్క విజయంతో మళ్లీ సూపర్ ఫామ్‌లోకి వచ్చాడు. వరుస సినిమాలతో రచ్చ చేస్తున్నాడు మాస్ రాజా. దానికి తోడు ఆయన సినిమాలో హీరోయిన్లు కూడా ఇండస్ట్రీలో హాట్ టాపిక్‌గా మారుతున్నారు. దానికి కారణం కూడా లేకపోలేదు. 50 దాటిన రవితేజ 20 ల్లో ఉన్న ముద్దుగుమ్మలతో రొమాన్స్ చేస్తున్నాడు. అందులోనూ ఒక్కో సినిమాలో ఇద్దరు ముగ్గురు హీరోయిన్లతో రొమాంటిక్ ట్రాక్ నడుపుతున్నాడు రవితేజ. ప్రస్తుతం ఆయన నటిస్తున్న ఖిలాడి సినిమాలో ఇద్దరు హీరోయిన్లు ఉన్నారు. మీనాక్షి చౌదరితో పాటు గద్దలకొండ గణేష్‌లో ఐటం సాంగ్ చేసిన డింపుల్ హయతీ ఈ సినిమాలో హీరోయిన్లుగా నటిస్తున్నారు.
మరోవైపు త్రినాథరావు నక్కిన సినిమాలో ముగ్గురు హీరోయిన్లు నటించబోతున్నారు. ఈ సారి కూడా పూర్తిగా కుర్ర హీరోయిన్లతో రొమాన్స్ చేయబోతున్నాడు రవితేజ. ఈ సినిమాలో రవితేజ ద్విపాత్రాభినయం చేయబోతున్నాడని తెలుస్తుంది. త్రినాథరావు సినిమాలో లాయర్‌గా కనిపించబోతున్నాడు ఈయన.

నిజానికి మారుతి చెప్పిన సినిమాలో కూడా హీరో లాయర్ కావడంతో ఈ కథను కాదని.. త్రినాథరావుకు ఓకే చెప్పాడు. ఇదిలా ఉంటే ఈ సినిమాలో ముగ్గురు ముద్దుగుమ్మలతో నటించబోతున్నాడు మాస్ రాజా. 20ల్లో ఉన్న కుర్ర హీరోయిన్లతోనే స్క్రీన్ షేర్ చేసుకుంటున్నాడు.

కొత్త హీరోయిన్ శ్రీ లీలతో పాటు మొన్న అనిల్ రావిపూడి గాలి సంపత్ సినిమాలో నటించిన లవ్లీ సింగ్ ఈ సినిమాలో హీరోయిన్లుగా నటించబోతున్నారు. మరోవైపు జాతి రత్నాలు ఫేమ్ ఫరియా అబ్దుల్లా కూడా ఈ సినిమాలో హీరోయిన్‌గా ఫిక్స్ అయినట్లు ప్రచారం జరుగుతుంది.

50 ఏళ్లు దాటిన తర్వాత రవితేజ ఇలా ముగ్గురు ముద్దుగుమ్మలతో రొమాన్స్ చేయబోతుండటం టాక్ ఆఫ్ ది ఇండస్ట్రీగా మారిపోయింది. ఏప్రిల్ 13న ఈ సినిమా ప్రారంభించి.. మే రెండో వారంలో రెగ్యులర్ షూటింగ్ కు వెళ్ళనున్నారు. రవితేజ ప్రస్తుతం నటిస్తున్న ఖిలాడీ మే 28న విడుదల కానుంది. ఈ సినిమాతో పాటే మరో రెండు సినిమాలను లైన్‌లో పెడుతున్నాడు రవితేజ.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి