తనయుడితో కొత్త సినిమా?

టాలీవుడ్‌ దర్శకుడు పూరీ జగన్నాథ్‌ను క్రికెటర్‌ సెహ్వాగ్‌తో పోలుస్తుంటారు. చేస్తే సెంచరీ..చేరితే పెవిలియన్‌ అన్నట్లుంటుంది సెహ్వాగ్‌ తీరు. పూరీ సినిమాలూ అంతే కొడితే సూపర్‌ హిట్‌ లేకుంటే ఫట్‌. దేశవ్యాప్త ప్రచారంతో హైప్‌ తీసుకొచ్చిన ‘లైగర్‌’ సినిమా ఫలితం ఈ దర్శకుడి శైలిని మరోసారి చూపించింది. దీంతో విజయ్‌తో చేయాలని తలపెట్టిన ‘జనగణమన’ ప్రాజెక్ట్‌ సందిగ్ధంలో పడింది.

‘లైగర్‌’ ఫలితంతో పూరీ జగన్నాథ్‌ చేయాలనుకున్న సినిమాల లైనప్‌ మొత్తం మారిపోయిందని తెలుస్తున్నది. తాజాగా ఈ దర్శకుడు తన కొడుకు ఆకాష్‌తో ఓ చిత్రానికి ప్లాన్‌ చేసుకుంటారని తెలుస్తున్నది. ఆకాష్‌తో నిర్మాతగా సినిమాలు చేసిన పూరీ జగన్నాథ్‌..ఈసారి దర్శకుడిగా బాధ్యతలు భుజాన వేసుకుంటున్నారు. కొంత ఆలస్యమైనా బలమైన కథలతోనే సినిమాలు చేస్తానని ఇటీవల ‘లైగర్‌’ ప్రచార కార్యక్రమాల్లో ఈ దర్శకుడు చెప్పుకున్నారు. అలా మంచి కథలతో, రీజనబుల్‌ స్క్రీన్‌ప్లేతో పూరీ సినిమాలు చేస్తే తనతో పాటు ఇండస్ట్రీకి మంచిదే కదా.