Tirumala | తిరుమ‌ల‌లో సినీ తారల సందడి.. శ్రీవారిని దర్శించుకున్న బాబీ సింహా, గోపీచంద్ మలినేని!

Lord Venkateswara | క‌లియుగ దైవం తిరుమల శ్రీ వేంకటేశ్వర స్వామివారి చెంత సినీ తారలు సందడి చేశారు.

Lord Venkateswara | క‌లియుగ దైవం తిరుమల శ్రీ వేంకటేశ్వర స్వామివారి చెంత సినీ తారలు సందడి చేశారు. ఆదివారం ఉదయం జరిగిన వీఐపీ విరామ దర్శన సమయంలో టాలీవుడ్‌కు చెందిన పలువురు ప్రముఖులు వేర్వేరుగా స్వామివారిని దర్శించుకుని మొక్కులు చెల్లించుకున్నారు. అలనాటి నటి ముచ్చర్ల అరుణ, మాస్ డైరెక్టర్ గోపీచంద్ మలినేని, జాతీయ అవార్డు గ్రహీత బాబీ సింహా, ప్రముఖ కొరియోగ్రాఫర్ బాబా భాస్కర్ త‌దిత‌రులు స్వామివారిని ద‌ర్శించుకున్నారు. గోపీచంద్ మలినేని, బాబీ సింహ తమ‌ కుటుంబ సభ్యులతో కలిసి శ్రీవారిని దర్శించుకోగా, టీటీడీ అధికారులు వీరికి ప్రోటోకాల్ ప్రకారం ప్రత్యేక దర్శన ఏర్పాట్లు చేశారు. దర్శనం అనంతరం రంగనాయకుల మండపంలో వేద పండితులు వీరికి వేదాశీర్వచనం పలుకగా, అధికారులు స్వామివారి శేషవస్త్రం మరియు తీర్థప్రసాదాలను అందజేశారు.

ఆలయం వెలుపల తమ అభిమాన తారలను చూసిన భక్తులు, పర్యాటకులు సెల్ఫీలు దిగేందుకు పోటీ పడ్డారు. ఈ సందర్భంగా దర్శకుడు గోపీచంద్ మలినేని మీడియాతో మాట్లాడుతూ, తన తదుపరి చిత్రాలు ఘనవిజయం సాధించాలని స్వామివారిని ప్రార్థించినట్లు తెలిపారు. ఆదివారం సెలవు దినం అయినప్పటికీ, తిరుమలలో భక్తుల రద్దీ సాధారణంగానే ఉండటంతో ప్రముఖుల దర్శనం సాఫీగా సాగిపోయింది.