ట్రోల్స్‌ రాని సినిమా ఏదో చెప్పండి?

ప్రభాస్‌ వంటి పాన్‌ ఇండియా హీరోతో సాధారణ హారర్‌ కామెడీ చేయొద్దనుకున్నామని, ఫాంటసీ.. సైకలాజికల్‌ ఎలిమెంట్స్‌ జతచేసి లార్జ్‌ స్కేల్‌లో సినిమా చేశామని చెప్పారు ‘ది రాజాసాబ్‌' చిత్ర దర్శకుడు మారుతి.

ప్రభాస్‌ వంటి పాన్‌ ఇండియా హీరోతో సాధారణ హారర్‌ కామెడీ చేయొద్దనుకున్నామని, ఫాంటసీ.. సైకలాజికల్‌ ఎలిమెంట్స్‌ జతచేసి లార్జ్‌ స్కేల్‌లో సినిమా చేశామని చెప్పారు ‘ది రాజాసాబ్‌’ చిత్ర దర్శకుడు మారుతి. ఆయన నిర్ధేశకత్వంలో ప్రభాస్‌ కథానాయకుడిగా నటించిన ఈ సినిమా ఇటీవలే ప్రేక్షకుల ముందుకొచ్చింది. ఈ సందర్భంగా శుక్రవారం దర్శకుడు మారుతి విలేకరులతో మట్లాడారు.

• ఈ సినిమాకు అన్ని వర్గాల ఆదరణ దక్కుతుంది. సంక్రాంతికి ముందే 200కోట్ల వసూళ్లను సాధించడం ఆనందంగా ఉంది. సైకలాజికల్‌ ఎలిమెంట్స్‌తో కొత్త పాయింట్‌ను చూపించాం. అది ప్రేక్షకులకు చేరువ కావడానికి కాస్త టైమ్‌ పడుతుంది. ఇటీవలే ప్రభాస్‌ ఓల్డ్‌ గెటప్‌ సీన్స్‌ యాడ్‌ చేశాం. వాటికి అద్భుతమైన స్పందన లభిస్తున్నది.
• సినిమా ఫస్ట్‌టైమ్‌ చూసినవాళ్లు వారికి కావాల్సిన ఎలిమెంట్స్‌ వెతుక్కుంటారు. కానీ రెండోసారి చూస్తే సన్నివేశాల తాలూకు భావోద్వేగాల గాఢతను పూర్తిగా అర్థం చేసుకుంటారు. ఓ వ్యక్తి ట్రాన్స్‌లోకి వెళ్లాడన్నది విజువల్‌గా చూపించడం చాలా కష్టం. అతని సబ్‌కాన్షియస్‌ మైండ్‌ని తెరపై ప్రజెంట్‌ చేయాలి. ఈ సినిమాలో ఆ సీన్స్‌ చూపించే విషయంలో చాలా కష్టపడ్డాం.
• సోషల్‌ మీడియా ట్రోల్స్‌ గురించి అంతగా పట్టించుకోను. ట్రోల్స్‌ రాని సినిమా ఏదో చెప్పండి? ప్రభాస్‌ అభిమానులే నాకు ఫోన్‌ చేసి సినిమా బాగుందని అభినందిస్తున్నారు. బీసీ సెంటర్లలో మంచి కలెక్షన్స్‌ వస్తున్నాయి. ఈ ప్రాజెక్ట్‌ ద్వారా నేను పెద్దస్టార్‌తో సినిమా చేయగలనని నిరూపించుకున్నా. ప్రస్తుతం నా ఆలోచనలన్నీ ‘రాజాసాబ్‌’ చుట్టే ఉన్నాయి. చిరంజీవితో సినిమా చేసే అవకాశం వస్తే నా జీవితం పరిపూర్ణమైందని భావిస్తా.