Visit:
Actor S Srinivasan | “పవర్‌స్టార్”గా సుపరిచితుడైన త‌మిళ న‌టుడు ఎస్. శ్రీనివాసన్‌ని ఒక భారీ మోసం కేసులో ఢిల్లీ పోలీసులు అరెస్ట్ చేశారు. రూ.1000 కోట్ల లోన్ ఇప్పిస్తాన‌ని చెప్పి ఒక సంస్థ నుంచి రూ. 5 కోట్లు తీసుకుని మోసం చేసిన‌ట్లు ఆరోప‌ణ‌లు రావ‌డంతో అత‌డిని బుధవారం ఢిల్లీ పోలీసులు అదుపులోకి తీసుకున్నారు.
పోలీసులు తెలిపిన వివరాల ప్రకారం.. 2010లో ‘బ్లూ కోస్ట్ ఇన్‌ఫ్రాస్ట్రక్చర్ డెవలప్‌మెంట్ లిమిటెడ్’ అనే సంస్థకు రూ.1000 కోట్లు లోన్ ఇప్పిస్తాన‌ని శ్రీనివాసన్ హామీ ఇచ్చాడు. దీనికి బ‌దులుగా.. వారి వ‌ద్ద నుంచి రూ.5 కోట్లు అడ్వాన్స్‌గా తీసుకున్నాడు. నెల రోజుల్లో లోన్ వ‌స్తుంద‌ని రాక‌పోతే డ‌బ్బులు తిరిగిఇస్తాన‌ని హామీ ఇచ్చాడు. అయితే నెల కంటే ఎక్కువ రోజులు గ‌డుస్తున్న లోన్ మంజూరు కాక‌పోవ‌డంతో మోస‌పోయామ‌ని గుర్తించిన సంస్థ యాజ‌మాన్యం పోలీసుల‌ను ఆశ్రయించింది. అయితే ఈ కేసుపై విచారణ చేప‌ట్టిన పోలీసులు.. దర్యాప్తులో భాగంగా రూ. 5 కోట్లు నేరుగా శ్రీనివాసన్, అతని భార్య బ్యాంకు ఖాతాలకు బదిలీ అయినట్లు గుర్తించారు. అలాగే ఈ డ‌బ్బుని అత‌డి వ్య‌క్తిగ‌త అవసరాల కోసంతో పాటు సినిమాల నిర్మాణానికి ఉప‌యోగించిన‌ట్లు స‌మాచారం. ఈ కేసులో దర్యాప్తునకు సహకరించకుండా, విచారణకు హాజరుకాకుండా 2018 నుంచి శ్రీనివాసన్ త‌ప్పించుకుని తీరుగుతున్నాడ‌నే ఆరోప‌ణ‌లు కూడా ఉన్నాయి. దీంతో కోర్టు అత‌డిని నేర‌స్థుడి(Proclaimed Offender)గా ప్ర‌క‌టించింది. తాజా స‌మాచారం ప్రకారం అతడు చెన్నైలో ఉన్న‌ట్లు తెల‌వ‌డంతో అత‌డిని ఢిల్లీ పోలీసులు అదుపులోకి తీసుకుని తదుపరి విచారణ నిమిత్తం ఢిల్లీకి తరలించారు.
శ్రీనివాస‌న్‌పై ఇలాంటి ఆరోప‌ణ‌లు రావ‌డం ఇది కొత్తేం కాదు. గతంలో కూడా శ్రీనివాసన్ 2013లో ఇలాంటి ఒక కేసులో అరెస్ట్ అయ్యారు. అప్పట్లో రూ. 10 కోట్లు తిరిగి చెల్లిస్తానని హామీ ఇచ్చి బెయిల్‌పై విడుదలయ్యారు, కానీ రూ. 3.5 లక్షలు మాత్రమే చెల్లించి పరారయ్యారని పోలీసులు తెలిపారు.
