చిరంజీవితో ఆ 45 నిమిషాలు మ‌రిచిపోలేను.. సుధాక‌ర్ ఎమోష‌న్‌

November 11, 2021 / 04:30 AM IST

‘హీరో ఇమేజ్‌కు పరిమితం కాకుండా నటనకు ప్రాధాన్యమున్న మంచి పాత్రలు దొరికితే చేయడానికి సిద్ధంగా ఉన్నా’ అని అన్నారు సుధాకర్‌ కోమాకుల. ఆయన ప్రధాన పాత్రను పోషించిన చిత్రం ‘రాజా విక్రమార్క’. కార్తికేయ హీరోగా నటించిన ఈ చిత్రానికి శ్రీ సరిపల్లి దర్శకుడు. 88 రామారెడ్డి నిర్మించారు. రేపు ఈ చిత్రం ప్రేక్షకుల ముందుకురానున్నది. బుధవారం హైదరాబాద్‌లో సుధాకర్‌ కోమాకుల పాత్రికేయులతో ముచ్చటిస్తూ ‘దర్శకుడు శ్రీ సరిపల్లితో పదేళ్లుగా పరిచయముంది. ఆ సాన్నిహిత్యంతోనే ఇందులో ఏసీపీ గోవింద్‌ అనే కీలక పాత్ర కోసం ఆయన నన్ను సంప్రదించారు. నటుడిగా నాకు మంచి పేరుతెచ్చిపెడుతుందనే నమ్మకంతో అంగీకరించా. పాత్రలకు ప్రాముఖ్యముందనిపిస్తే హీరో, విలన్‌ అనే భేదాలు లేకుండా నవతరం నటులు అన్ని రకాల క్యారెక్టర్స్‌ చేస్తున్నారు. ఆ కోణం నుంచి ఆలోచించే ఈసినిమా చేశా.

‘లైఫ్‌ఈజ్‌బ్యూటిఫుల్‌’ తర్వాత నేను చేసిన సినిమాలేవి సరిగా ఆడలేదు. మంచి కథలు, పేరున్న దర్శకులతో సినిమాలు చేయాల్సింది. అనివార్య కారణాల వల్ల అవి సెట్స్‌పైకి రాలేదు. కథలు కుదరక చేసిన సినిమాలు ఆడలేదు. ఈ అపజయాల్ని చూసి నిరాశపడకుండా మంచి టైమ్‌ కోసం ఎదురుచూస్తున్నా. ఈ సినిమా నాకు పూర్వ వైభవం తీసుకొస్తుందనే నమ్మకముంది. కొవిడ్‌ సమయంలో నా భార్య హారికతో కలిసి చేసిన ‘ఇందువదన’ కవర్‌సాంగ్‌కు మంచి స్పందన వచ్చింది. ఈ పాట చూసి చిరంజీవిగారు అభినందించారు. ఆయన్ని కలవాలనుందని అడగ్గానే అంగీకరించారు. నలభై ఐదు నిమిషాలు ఆయనతో మాట్లాడటం నా జీవితంలో మర్చిపోలేను. ప్రస్తుతం ‘నారాయణ అండ్‌ కో’, ‘జీడీ’(గుండెల్లోదమ్ము) అనే సినిమాలు చేస్తున్నా. సుఖ మీడియా పేరుతో నిర్మాణ సంస్థను ప్రారంభించా. ఈ సంస్థ ద్వారా ఇతరుల భాగస్వామ్యంతో కొత్త కథాంశాలతో కూడిన సినిమాల్ని నిర్మించాలనుంది. ఒక ఇండిపెండెంట్‌ సాంగ్‌ కూడా చేశా. త్వరలో అది విడుదలకానుంది’ అని తెలిపారు.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి