వరల్డ్‌క్లాస్‌ మ్యూజిక్‌ స్టూడియో ఏర్పాటు చేస్తా!

‘కథలోని భావోద్వేగాలను బట్టే సంగీతం తాలూకు నాణ్యత ఆధారపడి ఉంటుంది. సినిమాలో ఎమోషన్‌ లేకపోతే మ్యూజిక్‌ డైరెక్టర్‌ ఏం చేసినా వృథానే. ఈ విషయాన్ని దృష్టిలో పెట్టుకొని సినిమాల ఎంపికలో మంచి కథలకే ప్రాధాన్యతనిస్తున్నా’ అన్నారు అగ్ర సంగీత దర్శకుడు తమన్‌.

‘కథలోని భావోద్వేగాలను బట్టే సంగీతం తాలూకు నాణ్యత ఆధారపడి ఉంటుంది. సినిమాలో ఎమోషన్‌ లేకపోతే మ్యూజిక్‌ డైరెక్టర్‌ ఏం చేసినా వృథానే. ఈ విషయాన్ని దృష్టిలో పెట్టుకొని సినిమాల ఎంపికలో మంచి కథలకే ప్రాధాన్యతనిస్తున్నా’ అన్నారు అగ్ర సంగీత దర్శకుడు తమన్‌. ప్రస్తుతం ఆయన ఓజీ, రాజాసాబ్‌, గేమ్‌ ఛేంజర్‌, డాకు మహారాజ్‌ వంటి భారీ చిత్రాలకు మ్యూజిక్‌నందిస్తున్నారు.

నేడు తమన్‌ జన్మదినం. ఈ సందర్భంగా శనివారం ఆయన పాత్రికేయులతో ముచ్చటిస్తూ పంచుకున్న విశేషాలు..

• ప్రస్తుతం తెలుగులో విభిన్న కథాంశాలు, కాన్సెప్ట్‌లతో సినిమాలొస్తున్నాయి. దానికి తగ్గట్టుగానే సంగీతంలో కొత్తదనం చూపించే ప్రయత్నం చేస్తున్నా. ఇప్పుడు నేను చేస్తున్న భారీ సినిమాలన్నీ వేటికవే ప్రత్యేకం.
• ‘అఖండ’ సినిమాకు మ్యూజిక్‌ చేసే టైమ్‌లో ఆ పరమశివుడే నన్ను ఆవహించాడనే భావన కలిగింది. అందుకే బ్యాక్‌గ్రౌండ్‌ స్కోర్‌ను పూనకాలు వచ్చే విధంగా డిజైన్‌ చేయగలిగాను. మళ్లీ ఆ స్థాయిలో నేపథ్య సంగీతం ఇస్తానో లేదో తెలియదు.
• ‘పుష్ప-2’లో కొద్ది భాగానికి బ్యాక్‌గ్రౌండ్‌ స్కోర్‌ చేశాను. ఈ సినిమా తర్వాత అవార్డులన్నీ అల్లు అర్జున్‌కే వస్తాయనుకుంటున్నా. అంత గొప్పగా నటించాడు. సినిమా కూడా అద్భుతంగా వచ్చింది. ఈ సినిమా కోసం పనిచేయడం గొప్ప అనుభూతినిచ్చింది.
• స్వరకర్తగా వందకుపైగా సినిమాలు చేశా. అయినా ఇంకా సాధించాల్సింది చాలా ఉంది. ప్రస్తుతం తెలుగు ఇండస్ట్రీ గ్లోబల్‌గా ఫేమస్‌ అవుతున్నది. విదేశీ ఆర్టిస్టులు మన సినిమాల్లో నటించడానికి ఆసక్తి చూపిస్తున్నారు. అందుకు తగినట్లుగా నేను కొత్త విషయాలను నేర్చుకొని గ్లోబల్‌ స్థాయిలో మ్యూజిక్‌ ఇవ్వాలనే ఆలోచన ఉంది.
• ఏఆర్‌ రెహమాన్‌ నాకు గురువు. ఆయన స్థాయికి వెళ్లాలన్నదే నా కల. శంకర్‌గారి సినిమాకు మ్యూజిక్‌ అందించాలనే నా కల ‘గేమ్‌ ఛేంజర్‌’తో సాకారమైంది. దిల్‌రాజుగారు ‘గేమ్‌ ఛేంజర్‌’ కోసం నన్ను శంకర్‌గారిని కలవమని చెప్పినప్పుడు ఎంతో టెన్షన్‌ పడ్డాను. ఆరు నెలల్లోనే ఆల్బమ్‌ పూర్తి చేశాను.
• ప్రభాస్‌ ‘రాజాసాబ్‌’ సినిమాలో మొత్తం ఆరుపాటలుంటాయి. అందులో ఓ రీమేక్‌సాంగ్‌ కూడా ఉంటుంది. జనవరి నుంచి పాటల తాలూకు అప్‌డేట్స్‌ వస్తాయి. త్రివిక్రమ్‌-అల్లు అర్జున్‌ చిత్రానికి కూడా నేనే పనిచేయబోతున్నా. ఆ సినిమాలో త్రివ్రిక్రమ్‌ దర్శకుడిగా మరో స్థాయికి వెళ్తారు. ఇందులో ఆయన కొత్త ప్రపంచాన్ని చూపించబోతున్నారు.
• హైదరాబాద్‌లో త్వరలో మ్యూజిక్‌ స్కూల్‌ ఏర్పాటు చేయబోతున్నా. ఆర్థికంగా వెనకబడిన వారికి ఉచితంగా సంగీత పాఠాలు నేర్పించాలన్నదే నా లక్ష్యం. మూడేళ్లలో హైదరాబాద్‌లో వరల్డ్‌క్లాస్‌ మ్యూజిక్‌ స్కూల్‌ను ఏర్పాటు చేస్తాను. అందుకు ప్రభుత్వం తరపున సహాయాన్ని కోరతాను. స్థలం ఇవ్వమని మాత్రం అడగను.