Sree Vishnu | కామెడీ హీరో నుంచి కంటెంట్ స్టార్‌గా శ్రీవిష్ణు.. వరుస ప్రాజెక్టులతో ఫుల్ బిజీ షెడ్యూల్

Sree Vishnu |  టాలీవుడ్‌లో సహజ నటన, టైమింగ్‌తో నవ్వులు పంచే హీరోలలో శ్రీవిష్ణు ఒక ప్రత్యేక స్థానాన్ని సంపాదించుకున్నారు. చిన్న చిన్న పాత్రలతో కెరీర్‌ను ప్రారంభించిన ఆయన, క్రమంగా తన టాలెంట్‌ను నిరూపించుకుంటూ హీరోగా నిలదొక్కుకున్నారు. ఓవర్ యాక్షన్‌కు దూరంగా, సహజమైన కామెడీతో ప్రేక్షకులను ఆకట్టుకోవడమే శ్రీవిష్ణు స్టైల్.

Sree Vishnu |  టాలీవుడ్‌లో సహజ నటన, టైమింగ్‌తో నవ్వులు పంచే హీరోలలో శ్రీవిష్ణు ఒక ప్రత్యేక స్థానాన్ని సంపాదించుకున్నారు. చిన్న చిన్న పాత్రలతో కెరీర్‌ను ప్రారంభించిన ఆయన, క్రమంగా తన టాలెంట్‌ను నిరూపించుకుంటూ హీరోగా నిలదొక్కుకున్నారు. ఓవర్ యాక్షన్‌కు దూరంగా, సహజమైన కామెడీతో ప్రేక్షకులను ఆకట్టుకోవడమే శ్రీవిష్ణు స్టైల్. అందుకే ఇప్పుడు “శ్రీవిష్ణు సినిమా అంటే కచ్చితంగా నవ్వులు ఉంటాయి” అనే నమ్మకం ఆడియన్స్‌లో బలంగా ఏర్పడింది. ఇటీవల ఆయన ఖాతాలో పడిన వరుస హిట్లు ఈ బ్రాండ్‌ను మరింత బలపరిచాయి. సామజవరగమన, ఓం భీమ్ బుష్, స్వాగ్, సింగిల్ వంటి సినిమాలు శ్రీవిష్ణును కంటెంట్ బేస్డ్ కామెడీ హీరోగా నిలబెట్టాయి. ముఖ్యంగా ‘సింగిల్’ విజయం తర్వాత యూత్ ఆడియన్స్‌లో ఆయన క్రేజ్ గణనీయంగా పెరిగింది. ఈ సినిమాతో శ్రీవిష్ణు కెరీర్ కొత్త గేర్‌లోకి వెళ్లిందనే చెప్పాలి.

ఈ విజయోత్సాహంతో శ్రీవిష్ణు కొత్త ఏడాదిని కూడా బాక్సాఫీస్ సందడితో ప్రారంభించేందుకు రెడీ అవుతున్నారు. ప్రస్తుతం ఆయన నటిస్తున్న మృత్యుంజయ్, కామ్రేడ్ కళ్యాణ్ చిత్రాలు షూటింగ్ చివరి దశలో ఉన్నాయి. ఈ రెండు సినిమాల్లోనూ శ్రీవిష్ణు పాత్రలు గతానికి భిన్నంగా ఉంటాయనే టాక్ వినిపిస్తోంది. పాత్రల ఎంపికలో ఎప్పటికప్పుడు కొత్తదనం చూపిస్తున్న శ్రీవిష్ణు, ఈ సినిమాలతో మరోసారి తన వర్సటిలిటీని చూపించనున్నారని సినీ వర్గాలు అంటున్నాయి. ఇక శ్రీవిష్ణు కెరీర్‌లో కీలక మైలురాయిగా నిలిచిన ‘సామజవరగమన’ దర్శకుడు రామ్ అబ్బరాజుతో మరోసారి జతకట్టేందుకు ఆయన సిద్ధమవుతున్నట్లు సమాచారం. ఈ ప్రాజెక్ట్ మార్చి నెలలో సెట్స్‌పైకి వెళ్లే అవకాశాలు ఉన్నాయని తెలుస్తోంది. వీరి కాంబినేషన్‌పై ఇప్పటికే మంచి అంచనాలు ఉండటంతో, రెండో సినిమా కూడా అదే స్థాయిలో వినోదాన్ని అందిస్తుందని అభిమానులు ఆశిస్తున్నారు.

ఇదిలా ఉండగా, శ్రీవిష్ణు లైనప్‌లోకి తాజాగా మరికొన్ని ఆసక్తికర ప్రాజెక్టులు చేరినట్లు టాక్. ఈటీవీ విన్‌లో విడుదలైన ‘అనగనగా’ తో ప్రశంసలు అందుకున్న దర్శకుడు సన్నీ సంజయ్‌తో ఓ ఫుల్ ఎంటర్‌టైనర్ చేయనున్నారని సమాచారం. ఈ చిత్రాన్ని ప్రముఖ నిర్మాణ సంస్థ సితార ఎంటర్‌టైన్‌మెంట్స్ నిర్మించే అవకాశముందని సినీ వర్గాల్లో చర్చ నడుస్తోంది. అదేవిధంగా, మరో కొత్త దర్శకుడితో గీతా ఆర్ట్స్ బ్యానర్‌లో కూడా శ్రీవిష్ణు సినిమా ఫిక్స్ అయినట్లు తెలుస్తోంది. మొత్తంగా చూస్తే, ప్రస్తుతం శ్రీవిష్ణు చేతిలో ఏకంగా ఐదు ప్రాజెక్టులు ఉన్నట్లు సమాచారం. కామెడీ టైమింగ్‌ను తన బలంగా మార్చుకుని, కొత్త కథలు, కొత్త దర్శకులతో ముందుకు సాగుతున్న శ్రీవిష్ణు రాబోయే రోజుల్లో టాలీవుడ్‌లో తన స్థాయిని మరింత పెంచుకునే దిశగా అడుగులు వేస్తున్నాడు.