4 సినిమాలు లైన్‌లో పెట్టిన కుర్ర హీరో

కిరణ్ అబ్బవరం | విడుదలైంది ఒక్క సినిమా మాత్రమే. అది కూడా పెద్దగా ఆడలేదు. ఇప్పుడు రెండో సినిమా విడుదలకు సిద్ధమైంది. అప్పుడే ఆ హీరో చేతిలో నాలుగు సినిమాలు ఉన్నాయి.

July 14, 2021 / 09:37 PM IST

విడుదలైంది ఒక్క సినిమా మాత్రమే. అది కూడా పెద్దగా ఆడలేదు. ఇప్పుడు రెండో సినిమా విడుదలకు సిద్ధమైంది. అప్పుడే ఆ హీరో చేతిలో నాలుగు సినిమాలు ఉన్నాయి. బ్యాక్‌గ్రౌండ్ ఉందా.. వారసుడా అంటే అదీ కాదు. చేస్తున్న సాఫ్ట్‌వేర్ జాబ్ వదిలేసి సినిమాలపై ప్యాషన్‌తో వచ్చాడు. వచ్చీ రాగానే తనకంటూ ప్రత్యేక గుర్తింపు కోసం పాకులాడుతున్నాడు. ఆ హీరో పేరు కిరణ్ అబ్బవరం. ఈ పేరు పరిచయం కావడానికి కాస్త టైమ్ పడుతుందేమో..? కానీ గుర్తు పెట్టుకోడానికి మాత్రం ఎక్కువ టైమ్ పట్టేలా లేదు. ‘రాజావారు రాణిగారు’తో హీరోగా పరిచయం అయిన కిరణ్.. తొలి సినిమాతోనే మంచి గుర్తింపు తెచ్చుకున్నారు.

రెండో ప్రయత్నంగా ‘SR కళ్యాణమండపం’ సినిమా చేశాడు కిరణ్. ఈ చిత్రానికి కథ, స్క్రీన్ ప్లే, మాటలు కూడా ఈయనే అందించడం విశేషం. నటుడిగా మంచి గుర్తింపు తెచ్చుకోవడమే తన లక్ష్యం అంటున్నాడు ఈ కుర్ర హీరో. సాఫ్ట్‌వేర్ నుంచి సినిమాపై ప్యాషన్‌తో ఇక్కడికి వచ్చారు ఈయన. తెలుగు ప్రేక్షకులు తనను చాలా బాగా ఆదరిస్తున్నారని తెలిపాడు కిరణ్. తొలి సినిమాతో నటుడిగా మంచి గుర్తింపు తెచ్చుకున్న తర్వాత.. రెండో సినిమా కోసం గ్యాప్ తీసుకున్నాడు. ఎప్పటికీ గుర్తుండిపోయే మంచి పాత్రలు చేయాలనేది తన డ్రీమ్ అంటున్నాడు కిరణ్ అబ్బవరం. జూలై 15న ఈయన పుట్టిన రోజు సందర్భంగా ఫ్యూచర్ ప్రాజెక్ట్స్ గురించి చెప్పుకొచ్చాడు కిరణ్ అబ్బవరం.

‘SR కళ్యాణమండపం’ సినిమా గ్లింప్స్ జూలై14న విడుదల కానుంది. అలాగే ‘ సెబాస్టియన్ ’ సినిమా పోస్టర్ జూలై 14 సాయంత్రం 5.30 నిమిషాలకు విడుదల కానుంది. జూలై 15 ఉదయం 10.05 నిమిషాలకు ‘ సమ్మతమే ’ సినిమా ఫస్ట్ లుక్ విడుదల కానుంది. అదే రోజు ఉదయం 9 గంటలకు కిరణ్ అబ్బవరం 5వ సినిమా అనౌన్స్‌మెంట్ కూడా ఉండబోతుంది. ఈ మేరకు తనను ఇంతగా సపోర్ట్ చేస్తున్న ప్రేక్షకులకు, దర్శక నిర్మాతలకు మనస్ఫూర్తిగా కృతజ్ఞతలు తెలిపారు కిరణ్ అబ్బవరం. ఈయన నటించిన ‘SR కళ్యాణమండపం’ సినిమా ఆగస్ట్ 6న ప్రపంచ వ్యాప్తంగా విడుదల కానుంది. మొత్తానికి ఒక్క సినిమా అనుభవంతోనే నాలుగు సినిమాలతో ప్రేక్షకుల ముందుకొస్తున్నాడు కిరణ్ అబ్బవరం.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి